Acts 8

¹Saulo aari mmosa w'ale aakhulenle wira Sitefano aiviwe. Nihiku nenlo yaahipaceriwa olupatthiwa vanci-ene Ekerexa y'oYerusalemu. Atthu othene oowaamini, waahiya arummwa yaanimwareela mmittettheni s'oYuteya ni s'oSamariya.

²Atthu akina yaamweettela Muluku yaahinvitha Sitefano ni khumunlela vanci-ene.

³Tthiri Saulo aanilipiherya omaliha Ekerexa, aanikela mmaitthokoni anaavara alopwana n'athiyana, aanatthukwela mukhatteya.

⁴Atthu ale yaamwaramwareiye yaanilaleya Ehapari Yooreera mapuro othene.

⁵Filipe aahirowa muttetthe w'oSamariya khupacerya walaleerya sa Kristu atthu a weiwo.

⁶Muttitthi wothene waaniwiriyana oratta-ene iye Filipe saahimy'awe ni yaaniweha miiriirya siir'awe.

⁷Tthiri atthu anci-ene yaavariwe minepa sootakhala saanaakhuma ikhuwelaka, nave-tho atthu anci-ene oorakala yaanivonihiwa.

⁸Tivo atthu a muttetthe owo yaahitteeliwa murima vanci-ene.

⁹Nto aahikhala weiwo mutthu mmosa iihaniwa Simoni yoowo okathi munci-ene aasuwelaxiwe okhala namaxitta nave atthu a oSamariya yaanikhala ootikinihiwa, ni yaanihimya wira aari mukhulupale.

¹⁰Nto atthu othene a omuttettheni yaaninwiriyana oratta-ene okhuma aalupale mpakha akhaani, nto yaanihimya wira: ?Mutth'ula t'uwerya wuulupale wa Muluku.?

¹¹Yaaninwiriyana oratta-ene okhala wira yaahiviriha okathi munci-ene etikinihiwaka mwaha wa maxitt'awe.

¹²Nto okathi vaamwiwaly'awe Filipe alavulaka Ehapari Yooreera y'oMwene wa Muluku ni woopowa onrwa mwa Yesu Kristu, owo aahaamini nave atthu anci-ene alopwana n'athiyana yaahipatisiwa.

¹³Nave-tho Simoni aahaamini khupatisiwa, khuvira eettaka ni Filipe. Nto oonaka miiriirya ni mitikiniho suulupale siiraneya aahitikinihiwa vanci-ene.

¹⁴Okathi arummwa yaari oYerusalemu vaaiwaly'aya wira atthu a oSamariya yaahaakhela masu a Muluku, yaahimurumihela-wo Petru ni Yohani.

¹⁵Vaaphiyaly'aya-wo, yaahaavekelela atthu oowaamini, wira yaakhele Erooho Yooreera,

¹⁶okhala wira Erooho Yooreera eyo khiyaamukhuruwenle mutthu a yaawo. Yaapatisiwe ni nsina na Pwiya Yesu paahi.

¹⁷Nto awo yaahiwiixatherya matata, siiso yahaakhela Erooho Yooreera.

¹⁸Vaawehaly'awe atthu yakhelaka Erooho Yooreera, okathi arummwa vaawiixathery'aya matata, Simoni aahaavaha musurukhu,

¹⁹aahimeeryaka wira: Ni miyo-tho mukivahe owerya iwo, wira miyo kamwixatherya matata mutthu, owo aakheleke Erooho Yooreera.

²⁰Nto Petru aahimwakhula wira: Nnyuwo vamosa ni musurukhu anyu okhale ni nyuwo mwaarowaka opweteya. Munuupuwela wira soovaha sa Muluku sinthummwa ni musurukhu?

²¹Nyuwo khamumphwanela ovara mutek'ola ni hiyo, okhala wira murim'anyu kholonke ohoolo wa Muluku.

²²Muttharuwe yootakhala ela yiiraly'anyu ni munvekele Muluku wira siiso atthunaka woolevelelani muupuwelo wa murim'anyu.

²³Tthiri kinoona wira muri oosareya owaawa ni sootakhala sihootthukwani.

²⁴Simoni aahiwakhula iiraka: ?Mukivekelele yenyu w'Apwiya wira ehiiraneye etthu, wa iye sihimaly'anyu.?

²⁵Tthiri numala wiirela onamoona n'ulaleya moolumo a Apwiya yaahihokolowela oYerusalemu, ni yaanilaleya Ehapari Yooreera mittetthe sinci-ene s'oSamariya.

²⁶Nihiku nimosa munkelo w'Apwiya waahimuhimeerya Filipe wira: ?Nvenye murowe epantte y'okusini, ephiro ya wothakoni enrowa oYerusalemu enivira oKasa.?

²⁷Owo aahivenya vale anarowa, okathi yoowo aahikumana ni mulopwana oohuliwa, aari mukhulupale a anamuteko, nave-tho aari mulipa-aasuka musuruku ni mukhulupale a piyamwene Kantasi a wEtiyopiya. Owo aaronwe oYerusalemu omukokhorela Muluku.

²⁸Vano aahokolowela elapo awe, iira akilanthe-ene mukaaroni mwawe asomaka eliivuru ya profeta Yesaya.

²⁹Nto Erooho ya Muluku yaahimuhimeerya Filipe wira: Mwaattamele ekaaro ele.

³⁰Filipe aahitthimakela khuphwanya ekaaro eyo ni khumwiiwa mwEtiyopiya owo asomaka eliivuru ya profeta Yesaya, khumukoha iiraka: ?Khino nyuwo munniiwa-mo sinsom'anyu??

³¹Owo aahimwaakhula iiraka: Kinwerya sayi wiiwa-mo ahikhanle mutthu ookitaphulela? Nto aahinvekela wira akele ni akilaathi vamosa mukaaroni.

³²Nipuro na Soolempwa sa Muluku naasom'awe tinla: Aakuxiwe ntoko epwittipwitthi enrowaniwa wiiviwa ntoko epwittipwitthi yoolopwana enimaala ohoolo w'ole ommettha, siiso khaatthukunle iyano sawe.

³³Aahiyevihiwa khukhoottiwa wireliwa exariya ti pani onwerya olavula sa osuulu awe? Okhala wira ekumi awe ennikumihiwa vathi-va.

³⁴Mulopwana owo a wEtiyopiya aahimukoha Filipe iiraka: ?Kinoovekelani wira, mukileele profeta xeeni onihimmwa? Oniihimya mmansawe wala onimuhimya mukina??

³⁵Nto Filipe aahikelela omwixuttiha apaceryaka nipuro nenle vaalempw'aya masu a Muluku khumulaleerya Ehapari Yooreera ya Yesu.

³⁶Erowaka siiso yaahiphiya nipuro naari maasi, mwEtiyopiya aahimwirela wira: Maasi t'ala va! Yookhala etthu enikhoottiha miyo opatisiwa?

³⁷Filipe aahimwaakhula wira: ?Nyuwo mwaaminikiru ni murim'anyu wothene, khiivo enikhoottiha.? Owo aahaakhula wira: Miyo kinnaamini wira Yesu Kristu mwaana a Muluku.

³⁸Nto aaheemexa ekaaro, oowanli aya yaahikela mmaasini, nto Filipe aahimpatisa mwEtiyopiya owo.

³⁹Okathi vaakhumaly'aya mmaasini, Erooho y'Apwiya yaahimukuxa Filipe, mulopwana owo khuhimoona-tho, nto khutthikela ekwah'awe atteeliwe-ene murima.

⁴⁰Filipe aahikhumelela muttetthe w'Axitoti, khuvira alaleyaka Ehapari Yooreera muttetthe ni muttetthe mpakha ophiya oKesareya.