Acts 7

¹Nto mukhulupale a anamukuttho aahimukoha Sitefano yakhala wira eyo yaari ekeekhayi.

²Owo aahaakhula iiraka: ?Axinn'aka n'axitiithi a Isarayeli! Nwiriyane! Muluku anttittimiho aahimukhumelela tiith'ihu Aparahaamu, okathi aakhal'awe oMesopotamia, ohinatthi orowa okhala oHarani,

³ni aahimuhimeerya wira: Mukhume mulaponi ni mweemusini mw'anyu, murowe elapo entthun'aka wothoonyeryani.?

⁴Siiso, owo aahikhuma elapo y'oKhalteya khurowa okhala oHarani. Numala okhwa atiith'awe, Muluku aahimurowana elapo ela enkhal'anyu.

⁵Muluku khaanvanhe yoohalana nnakhala nipuro namukhaani. Nto aahimuroromeliha wira aarowa onvaha elapo ela yothene owo n'suulu awe. Okathi Muluku waammanenly'awe natiri ula Aparahaamu iira nlelo ahiyanre.

⁶Muluku aahimuhimeerya wira: ?Osuulu anyu onrowa okhalaka mulaponi mw'axineene, weiwo anookhalihiwa ipottha ni anoohaxiwa mpakha iyaakha miloko miloko mixexe (400).?

⁷Nlelo Muluku aahihimya iiraka: Kinoohukhumu elapo enrowa wokhalihani ipottha. Numala munookhuma elapo eyo, ni munimoorwa okirumeela nipuro nenla.

⁸Muluku aahataana n'Aparahaamu, vano olyihiwa masoma teri ethonyeryo y'owataana iwo. Tivo, Aparahaamu aahimuyara mwan'awe Isakhi khumulyiha masoma nihiku na netthanu neeraru. Nave Isakhi aahimulyiha masoma mwan'awe Yakope. Nave-tho Yakope aahalyiha masoma an'awe muloko n'anli, akhanle axitiith'ihu.

⁹Axitiith'ihu yaawo yaahimukhalela nrima munn'aya Yosefe, khumutumiha wira orowaniwe w'Exitu. Nave Muluku akhala n'uwo,

¹⁰ni ahimwaakiha moohawani mwawe mothene. Aahinvaha akhili ni mahala ohoolo wa Farawo, mwene a w'Exitu, aamuthanlale okhala kuvernatoro a w'Exitu n'itthoko ya mwene.

¹¹Nto yaahikhumelela etala elapo yothene ya we'Exitu ni y'oKanani. Waahikhala ohaawa wuulupale mpakha axitiith'ihu ohikhalana etthu yoolya.

¹²Vano okathi Yakope vaasuwenly'awe wira w'Exitu yaahikhala-wo etriku, aahaaruma axitiith'ihu orowela ekwaha yopacerya.

¹³Ekwaha ya nenli yaaronw'aya, Yosefe aahiisuweliha wa axinn'awe awo, Nave Farawo aahasuwela amusi a Yosefe.

¹⁴Nto Yosefe aahiruma oroweliwa atiithi awe n'amusi awe othene yaawo yaari atthu miloko mithanu na miili n'atthu athanu.

¹⁵Yakope aahirowa w'Exitu, kukhwela weiwo, owo vamosa n'axitiith'ihu.

¹⁶Numala, yaahirowa ovitha mirutthu saya oSikhemi, mahiye yaawo Aparahaamu aathumme awe mmatatani mwa osuulu w'Amori

¹⁷Nto waattamelaka okathi Muluku waarow'awe ommaliherya natiri aammanenly'awe Aparahaamu, nloko n'atthu a Isarayeli yaanitepa wuncerereya mulaponi mwa w'Exitu.

¹⁸Mpakha okhumelela mwene mukina ahaamusuwenle Yosefe.

¹⁹Mwene owo aahoototha nloko nahu, kwahaaxa axitiith'ihu, mpakha wakhanyererya wanyanyala anamwane yaayar'aya wira ekhwe.

²⁰Okathi yoowo t'ayariw'awe Monse, aari mwaana ooreeraxa, nave axitiithi awe yaahimukhapelela mpakha miyeri miraru.

²¹Okathi waanyanyaliw'awe, mwaana a Farawo aahimukhaliha mwan'awe, ni aahimuhuwa ntoko mwan'awe.

²²Tivo Monse aahiixuttihiwa osuwela wothene w'atthu a w'Exitu ni aari mutthu oowerya ni moolumo ni miteko.

²³Okathi vaaphiyenry'awe iyaakha miloko mixexe, Monse aahuupuwela orowa waxekurya axinn'awe anaIsarayeli.

²⁴Nto vaamoonaly'awe mutthu a w'Exitu amuhaaxaka mutthu a nloko nawe, aahimwaakiha ni aahimunlela ikuhu khumwiiva mw'Exitu.

²⁵Monse uupuwela wira axinn'awe yaarowa osuwela wira Muluku aatthuna oowoopola muhina mwa yoowo. Nto awo khiyaasuwenle.

²⁶Mmeeloni mwaya aahiwoona anaIsarayeli anli ewanaka. Owo aahikelela owaakiha aahimeeryaka wira: Alopwana, nyuwo mw'axinna! Xeeni munihaaxan'anyu mukina ni mukhw'awe?

²⁷Nto, ole aamuhaaxa mukhw'awe aahinvaanyiha amukohaka wira: ?Ti pani oothanlaleni okhala mukhulupale ahu ni mphuki ahu?

²⁸Ni miyo, mumphavela okiiva ntoko nsana simwiivaly'anyu mw'Exit'ule??

²⁹Vaaiwaly'awe moolumo ala, Monse aahitthyawa w'Exitu arowaka oMetiyani. Weiwo aahaayara an'awe anli.

³⁰Nuvira iyaakha miloko mixexe, okathi w'ary'awe moothakoni wa mwaako Sinayi waahimukhumelela munkelo a Muluku vamooroni waavarela vamwirini wa miiwa.

³¹Monse aahitikinihiwa n'itthu ile yoon'awe nto aahaattamela wira owehe oratta-ene. Vano aahiiwa nsu n'Apwiya nihimyaka wira:

³²?Miyo ka Muluku aaxitiith'inyu, Muluku a Aparahaamu ni a Isakhyi ni Yakope.? Monse athukumelaka mwaha w'owoova, hata khaatthuna woona.

³³Vano Apwiya yaahimuhimeerya wira: Murule isantaalya sanyu, okhala wira muri nipuro nooreera.

³⁴Kinnoona ohaawa w'atthu aka ari w'Exitu, ni kinniiwa wipulela waya. Kikhuruwenle wira kiwoopole, vano nto murwe koorumeeni orowa wExitu.

³⁵Monse owo ti yoole atthu a Isarayeli yaamurunne aya, okathi waahimy'aya wira: ?Ti pani oothanlaleni okhala mukhulupale ahu ni mphukhi ahu?? Nto Muluku aahimuruma okhala muhooleli ni moopoli, muhina mwa munkelo aamukhumelenle vamwirini wa miiwa.

³⁶Ti Monse yoowo aakumihale atthu a Isarayele wExitu, ni ohiira miiriirya ni sootikiniha elapo yeeyo, n'ophareya Yoxerya ni moothakoni, mpakha iyaakha miloko mixexe.

³⁷Ti Monse yoowo aahimeenrye anaIsarayeli wira: Muluku onomuthanla eriyari y'axinn'anyu profeta mmosa ntoko sikithanlaly'awe miyo mmwiiweleleke.

³⁸Ti Monse yoowo aathukumanne n'atthu a Isarayeli moothakoni, yoowo taahimya masu a munkelo eriyari y'axitiith'ihu vamwaako Sinayi. Ti yoowo aakhelenle masu a ekumi wira onivahererye hiyo.

³⁹Nto axitiith'ihu khiyaatthunne omwiiwelela, ohiya vo yaahikhootta khutthuna ohokolowela wExitu.

⁴⁰Okathi yoowo yaahimuhimeerya Arawu wira: ?Nintthuna wira munipakele amuluku wira enihooleke, okhala wira khansuwenle etthu emukhumelenle Monse yoowo onikumihale wExitu.?

⁴¹Vano yaahipaka elatarato yaalikana ni mwaanyompe, yaahiiva inama wira anvahe nave yaahitthapelela n'utteeliwa murima elatarato yaapakaly'aya ni matat'aya.

⁴²Vano Muluku aahaanyanyala, khwaahiya ekokhorelaka itheneeri. Ntoko silempw'aya mulivuruni mwa maprofeta wira: Atthu a Isarayeli! Mwaakiirela miyo nyuwo mwaiv'anyu ni mwahelel'anyu mukuttho wa inama wothakoni eriyari ya iyaakha miloko mixexe?

⁴³Ohiya vo, mwaahikuxa muxaxa wa muluku Molokhi n'elatarato y'etheneeri ya muluku Refa saari ilatarato seiyo, saapakaly'anyu ni matat'anyu, seiyo nyuwo s'akokhorel'anyu. Tivo kintthun'aka worowanani ovikana oPapiloni.

⁴⁴Axitith'ihu yaahikhalana moothakoni muxaxa woonamoona ntoko saarummw'awe Monse wira apake alikanyihaka n'ile yooniheriw'awe.

⁴⁵Axitith'ihu vaakhelenly'aya muxaxa owo nave-tho yaahikuxa ni Yoxuwa, okathi yaawakhaly'aya ilapo atthu yaawo Muluku aawomonly'awe vamaithoni vaya. Muxaxa owo waahikhala mpakha mahiku a Taviti.

⁴⁶Owo aahiphwanya mahala ohoolo wa Muluku, nto aahinvekela wira amutekele empa Muluku a Yakope.

⁴⁷Nto Salomoni t'atenke empa eyo ya Muluku.

⁴⁸Siiso, Muluku a wirimu-rimu khanikhala ipa sootekiwa n'atthu, ntoko sihimaly'awe profeta wira:

⁴⁹?Erimu ehice aka ni elapo etapeti ya inawu saka. Nto empa xeeni nyuwo enwery'anyu okitekela? Anihimya t'Apwiya, wala nipuro xeeni nenlo miyo naarow'aka omumula?

⁵⁰Kahi miyo kipakale itthu iya sothene??

⁵¹Atthu oolipa murima ni oowisoona ni oopisa wiiwa nyuwo munikhootta Erooho Yooreera, siiso, nyuwo munlikana n'axitiith'inyu.

⁵²Profeta xeeni axitiith'inyu ahimulupantthy'aya? Awo yaahiwivakasa ale yaalaleya orwa wa murumeyi a xariya, yoowo nyuwo munvarihaly'anyu ni mmwiiva.

⁵³Nyuwo mwaakhenle sooruma mmatatani mw'ankelo ni khamwiiwelenle sooruma iyo!

⁵⁴Okathi awo vaaiwaly'aya moolumo awo yaahinanariwa vanci-ene mmurimani mwaya, ni yaanilumanyiha maino anvirikanyaka yoowo.

⁵⁵Nto owo asareiye-ene Erooho Yooreera aahiweha wirimu, khuweha nttittimiho na Muluku ni Yesu aryeene moono woolopwana wa Muluku.

⁵⁶Nto aahihimya wira: Nkawehani! Kinoona erimu etthukunwe-ene ni Mwaana a Mutthu emenle-ene, moono woolopwana wa Muluku!

⁵⁷Vano awo yaahittiyela maaru, nto othene aya yaahimutuphela yoowo ekhuwelaka vanci-ene.

⁵⁸Yaahimoomola mmuttettheni ni yaaninvonyakasa maluku. Nto anamoona yaahimuhiyerya soowara sawe mmiravo mmosa iihaniwa Saulo.

⁵⁹Avonyakasiwaka siiso, Sitefano aanivekela iiraka: ?Pwiya Yesu mwaakhelele munepa aka!?

⁶⁰Numala aahikokhora, khukhuwela vanci'ene iraka: Pwiya muhaalamule mwaha wa etamp'ila! Ahimyaka-ru siiso, owo aahikhwa.