Acts 6

¹Mahiku awo atthu oowaamini yaanitepa wuncerereya. Tivo waahikhumelela ohiiwanana eriyari y'aKereku n'aHeperi okhala wira anamukhweli aya ale yaalavula ekereku yaaniliyaliwa yaakaiwaka yoolya mahiku othene.

²Nto arummwa muloko nanli yaahathukumanya atthu othene oowaamini khwaahimeerya wira: Khivanreerela hiyo ohiya olaleya moolumo a Muluku, wira nikaweke soolya.

³Tivo axinn'aka mwaathanle variyari vanyu atthu athanu nanli oororomeleya, oosareya Erooho Yooreera ni aankhili, wira naavahe muteko owo wookawa.

⁴Nto hiyo nlelo nnamukhalela nthiti ovekela n'ulaleya masu a Muluku.

⁵Othene aya yaahikupali muruku ola, nto yaahimuthanla Sitefano mutthu oowaamini ni oosareya Erooho Yooreera ni Filipe ni Prokoro ni Nikanore ni Timoni ni Parmena ni Nikolawo aari a elapo ya wAntiyokhiya.

⁶Atthu ala yaahiroohiwa w'arummwa, awo yaahaavekelela awiixatheryaka matata vamuru vaya.

⁷Siiso masu a Muluku yaanitepa omwaramwareya ni mwaattelo w'atthu oowaamini waamutepa wuncerereya oYerusalemu. Nave-tho anamukuttho anci-ene yaaniiwelela waamini.

⁸Sitefano asareiye-ene waamini n'uwerya wa Muluku aanipaka miiriirya ni sootikiniha eriyari y'atthu.

⁹Vaavo nto yaahikhumelela aYuta akina a empa yootthukumana yiihaniwa ?Atthu owoopowa? n'atthu yaarwiye mittetthe s'oKireni ni a wAlixantriya ni oSilisia ni a wAsia awo yaaninyakulihana ni Sitefano,

¹⁰Nto khiyaawerya onvaanya Sitefano mwaha wa Erooho y'ankhili yaalavulan'awe.

¹¹Yaahaliva atthu akina wira ehimyeke wira: ?Noomwiwa mutth'ula alavulaka anveehaka Monse ni anveehaka Muluku!?

¹²Nto yaahatharamula atthu, ni mahumu n'awiixuttihi a ikano. Numala, yaahimurowela naanaanoru, khunvara Sitefano khomurowana ohoolo makhulupale amphuka milattu.

¹³Yaahimootherya ehimyaka wira: ?Mutth'ula khiivo-tho etthu eniir'awe ehikhanle oveeha emp'ahu Yooreera ya Muluku ni ovirikanya ikano sa Monse.

¹⁴Hiyo noomwiiwa ahimyaka wira Yesu yoowo muNasareti onoopwexakasa empa ya Muluku ni onoorukunuxa itthu s'ephattu Monse sinihiyenry'awe.?

¹⁵Makhulupale othene oophuka milattu yaaninwehexexa Sitefano, ni yaahimoona wira owiitho wawe waalikana n'owiitho wa munkelo.