Acts 5

¹Mulowana mmosa iihaniwa Ananiya nave amwar'awe yiihaniwa Safira, yaahitumiha ematt'aya.

²Iiwananaka ni mwar'awe aahivukulanya musurukhu-ene, khwiisukerya, epantte ekina aahiroha, khwannyererya arummwa.

³Nto Petru aahimukoha Ananiya iiraka: Xeeni muhalaka omuhiya Satana okelaka mmurimani mwanyu, ni khoototha Erooho Yooreera muhavulanyaka musurukhu othumeliwe ematt'anyu?

⁴Hata mwaasunke nlelo khiwaakhala wawinyu? Ni hata vatuminh'anyu musurukhu-ene kahiyo wawinyu? Viireiye sayi mutthokolelaka wira etthu siiso? Musuweleke wira khammootonthe mutthu mmootonthe Muluku!

⁵Ananiya iiwakaru moolumo ala, aahimorela vathi khukhwa. Nto atthu othene vaasuwenly'aya etthu ila yaahoova vanci-ene.

⁶Nave yaahirwa amiravo ophapa murutthu khurowa ovitha.

⁷Vaaviraly'aya vakhiviru va iwoora ttharu, nave-tho aahiphiya mwar'awe Ananaiya, ahisuwelaka yaakhumelenle.

⁸Petru aahimukoha wira: Mukileele! Musurukhu othumeliwe ematt'anyu nyuwo n'aiyanyu ti yoola? Owo aahaakhula wira ayo.

⁹Nto Petru aahimuhimeerya wira: Exeeni nyuwo muhalaka wiwanana woototha Erooho y'Apwiya? Amiravo awo vamukhora vo yaaronwe wavitha aiyanyu nave-tho anrowa wookuxani nyuwo.

¹⁰Okathi-ene yoowo, Safira aahimora kukhwa ohoolo wa Petru. Amiravo akelakaru mpaani yamphwannye okhwiiye-ene vano yaahirowa onvitha vakhiviru n'iy'awe.

¹¹Atthu othene oowaamini n'atthu akina yaaiwale etthu ila yaahoova vanci-ene.

¹²Arummwa yaaniira miiriirya sinci-ene ni sootikiniha eriyari y'atthu. Atthu oowaamini othene, yaaniiwanana vanci-ene, yaanithukumana vamosa Mpwaro mwa Salomoni.

¹³Khaavo oohaamini akhala vamosa ni yoowo, nto atthu othene yaanattottopela yaawo.

¹⁴Nave mwaattelo w'alopwana n'athiyana yawaamini Apwiya waamutepa wuncerereya.

¹⁵Siiso nto atthu yaanarowana aretta mmaphironi ewaatalenle-ene volihini ni munrepani, wira okathi Petru waavir'awe eruku awe yaaphwanye akina w'arett'awo.

¹⁶Muttitthi muulupale w'atthu waanirwa okhumaka mittetthe soowattamela oYerusalemu waaruhaka aretta n'ale yaavariwe minepa sootakhala, awo othene aya yaanivonihiwa.

¹⁷Nto mukhulupale a anamukuttho n'akhw'awe, yaari a muloko wa maSatukhi esareiye-ene nrima,

¹⁸yaahaavara arummwa khuruma otthukweliwa mukhatteya.

¹⁹Nto ohiyu yoowo munkelo a Muluku waahitthukula mikhora sa khatteya khwaakumiherya vate arummwa, nto khwaahimeerya wira:

²⁰Murowe mpaani mwa Muluku, ni mwaahimeerye atthu moolumo ala a ekumi.

²¹Arummwa yaahiiwelela, vasiisu-ene yaahirowa mpaani mwa Muluku, khupacerya owiixuttiha atthu. Nto vaaphiyaly'awe mukhulupale a anamukuttho n'akhw'awe yaahalattula makhulupale amphuka milattu s'aYuta ni mahumu othene ni makhulupale a atthu orowa othukumana nto khuruma oroweliwa arummwa mukhatteya.

²²Vano, okathi asurutaato vaaphiyaly'aya okhatteya khiyaaphwannye-mo. Yaahirowa wahimeerya makhulupale amphuka milattu wira:

²³?Niphwannye mikhora sothene s'ekhatteya siwaliwe-ene, ni makwarta elipelelaka vamukhora, nto vatthukunly'ahu mukhora khinimphwannye-mo mutthu.?

²⁴Okathi mukhulupale a makwarta a mpaani mwa Muluku ni makhulupale a anamukuttho vaaiwaly'aya etthu ila, yaahikhala ehisuwelaka etthu yaakhumelenle arummwa khuhimya wira enrowa okhala etthu xeen'iyo.

²⁵Okathi yoowo aahirwa mutthu aahimyale wira: ?Musuwele wira atthu yale mwaatthukwenly'anyu mukhatteya ari mpaani mwa Muluku aniiwixuttiha atthu!?

²⁶Nto mukhulupale a makwarta aahivenya n'asurutaato awe yaarowelaka arummwa. Nave khiyaakunxe n'uwali okhala wira yaanoova ovonyakasiwa maluku n'atthu.

²⁷Yaahaarowana ohoolo wa makhulupale amphuka milattu vano mukhulupale a anamukuttho aahaakoha iiraka:

²⁸?Hiyo khanookhoottihenryeni olavula nsina na mutth'uwo!?

²⁹Vano Petru n'arummwa akina yaahaakhula wira: Etthu yuulupale omwiiwelela Muluku ohikhanle owiiwelela atthu.

³⁰Muluku a axitiith'ihu oomuhihimuxa Yesu, yoowo nyuwo mwaamwivaly'anyu mmukhomelaka vamwiikimanyo.

³¹Nto Muluku oonvaha nipuro noottittimiheya amukhalihaka Mukhulupale ni Moopoli, wira aavahe atthu a Isarayeli okathi woottharuwa soottheka saya ni wooleveleliwa itampi saya.

³²Hiyo n'anamoona a itthu seiya sothene hiyo ni Erooho Yooreera, yeyoo Muluku onaavah'awe ale animwiiwelela.

³³Okathi vaaiwaly'aya moolumo ala makhulupale oophuka milattu, yaahinanariwa vanci-ene khuupuwela owiiva.

³⁴Mulopwana mmosa aari nFarisi iihaniwa Kamaliyeli mwiixuttihi a ikano sa Monse, ni aanittittimihiwa n'atthu othene, aaheemela khuruma wira arummwa ekumiheriwe ota okathi vakhaani,

³⁵nto aahahimeerya makhulupale amphuka milattu wira: Nyuwo a Isarayeli, mwiipasoope n'itthu enrow'anyu owiiriha atthu ala!

³⁶Mahiku avinre aahikhumelela Teuta aaihimya okhala mukhulupale. Owo aahitthariwa n'atthu vakhiviru miloko mixexe, nto owo aahiviwa, vano atthu ale othene yaamutthanre khumwaramwareya

³⁷Nuvira aahikhumelela Yuta muKalileya okathi waarepeliwa atthu. Nave-tho atthu anci-ene yaahimukupali, nave-tho owo aahikhwa atthu othene yaamutthara khumwaramwareya.

³⁸Vano mwaha ola miyo kinnivaha miruku saka wira muhiwiirihe etthu yootakhala atthu ala. Mwaahiye erowaseke, okhala wira vakhala wira muteko ola ni mweettel'ola onikhuma mmuruni mw'atthu onoomala mmansaya,

³⁹nto vakhala wira sinkhuma wa Muluku, munimooceela omaliha ni vannoopiha okhala nwanaka ni Muluku! Awo yaahikupali miruku sa Kamaliyeli.

⁴⁰Yaahiwiihana arummwa, khuruma ohukhummwa, ni khwakhoottiherya wira ehilaleye-tho nsina na Yesu. Numala yaahaataphula.

⁴¹Arummw'awo yaahikhuma-mo mphwaro mwaaphukiwa milattu etteeliwe-ene murima mwaha woophwanelihiwa ni Muluku ohaawa mwaha wa nsina na Yesu.

⁴²Nto khiyaahiyale owiixuttiha atthu mahiku othene mpaani mwa Muluku ni mmawaani elaleyaka Ehapari Yooreera yiiraka Yesu ti Kristu (Moopoli).