Acts 4

¹Petru ni Yohani nlelo elavulaka n'atthu, naanaanoru yaahirwa anamukuttho ni makhulupale a makwarta a mpaani mwa Muluku n'aSatukhi.

²Vaahananara okhala wira arummwa yaaniwixuttiha atthu ni yanalaleerya sa Yesu ni ohihimuwa w'alipa ookhwa.

³Awo yaahavara khwaarihela mukhatteya mpakha mmeeloni mwaya, okhala wira vaahiila.

⁴Nto, atthu anci-ene yaaiwale moolumo awo yaahaamini. Siiso atthu oowaamini yaanitepa wuncerereya khuphiya atthu vakhiviru ikonto thanu alopwanaru paahi.

⁵Mmeeloni mwaya makhulupale a aYuta ni mahumu n'awiixuttihi a ikano yaahithukumana oYerusalemu,

⁶aahikhala-vo Haana, mukhulupale a anamukuttho, ni Kaifa, ni Yohani, n'Alexantre ni muloko wothene wa makhulupale a anamukuttho.

⁷Yaahiruma oruuhiwa ohoolo waya Petru ni Yohani yahaakoha wira: ?Owerya xeeni wala nsina nawani mwiiraly'anyu itthu iya??

⁸Nto Petru asareiye-ene Erooho Yooreera aahiwaakhula, iiraka: ?Nyuwo makhulupale ni mahumu a Isarayeli,

⁹okhala wira munninikoha mwaha w'etthu yooreera nimwiirenly'ahu mutthu oorakala ni enamuna ovonihiw'awe,

¹⁰vano musuwele saana nyuwo atthu a Isarayeli othene, wira ni nsina na Yesu Kristu muNasareti yoowo nyuwo mmukhomenly'anyu vamwiikimanyo yoowo Muluku omuhihimuxaly'awe mookhwaani, nto munsina na Yesu yoowo mulopwan'ola tukhanly'awe mukumi.

¹¹Yesu yoowo tukhanle nluku murihaly'anyu nyuwo, alipa ooteka empa, tukhalihiwe nluku ninlipiha empa.

¹²Nave khaavo mukina oniwerya woopola, maana vathi veerimu khanivo nsina nikina na mutthu ninwerya onoopola hiyo.?

¹³Makhulupale awo yaahitikinihiwa n'usuwela wa Petru ni Yohani okhala wira yaahisuwelihiwa wira y'ari atthu yahaasomme ni yahaasuwela etthu masi yaahisuwela wira awo yaheetta ni Yesu.

¹⁴Siiso, khiyaawenrye omuhimeerya etthu Petru ni Yohani mwaha wookhala vamosa ni mutth'ule aavonihiwe.

¹⁵Tivo, yaahaaruma okhuma-vo ohoolo wa makhulupale oophuka milattu khuhala evaanelaka yaaworu.

¹⁶Nave yaanikohana yiiraka: ?Niwiirihe exeeni atthu ale? Atthu othene anikhala oYerusalemu annisuwela wira mutikinih'ola muulupale wiiriwe ni yaawo, nave hiyo khaninwerya ovaanya.

¹⁷Nto wira ehaal'ila ehitepe ovuwa eriyari y'atthu, nrowe nakhoottiherye niwoopopihaka, wira okhuma olelo orowa ohoolo ahimulaleerye-tho mutthu sa Yesu.?

¹⁸Yaahiwiihana nto khwaakhoottiherya wira ahilaleye-tho hata wixuttiha sa Yesu.

¹⁹Nto Petru ni Yohani yaahiwaakhula wira: ?Mutthokolele oratta-ene yaari-ene etthu ya xariya ohoolo wa Muluku, ohiya omwiiwelela Muluku, wira niwiiweleleni nyuwo.

²⁰Hiyo khaninwerya ohiya olaleya itthu soonaly'ahu ni siiwaly'ahu.?

²¹Nto makhulupale ale yaahiwoopopiha-tho, numala, khwaahiya erowaka. Nave khiyaawenrye waahukhumu, okhala wira atthu othene yaanimuttottopela Muluku mwaha w'etthu ile yaakhumelenle.

²²Tthiri mulopwan'owo aavonihiwe muhina mwa mwiriirya, aarina iyaakha soovikana miloko mixexe.

²³Okathi Petru ni Yohani vaataphuliw'aya, yaahirowa okumana n'akhw'aya nto khwaahimeerya sothene makhulupale a namukhuttho ni mahumu saahimeenry'aya.

²⁴Vaaiwaly'aya, othene aya yaahinvekela Muluku yiiraka: Apwiya, ti nyuwo mpattunxe erimu n'ilapo ya vathi n'iphareya n'itthu sothene siri moolumwenkuni.

²⁵Nyuwo moohimya, ni moolumo a Tiith'ihu Taviti murumeyi anyu asareiye-ene Erooho Yooreera aahihimya wira: Exeeni maloko makina anikhal'aya oowukhuwa, natthu anikhal'aya yuupuwelaka voohikhalana akhili?

²⁶Mamwene a mulaponi ahiilikanyiherya ni makhulupale a atthu yiiwanana waavirikanya Apwiya ni onvirikanya Moopoli aya.

²⁷Vekeekhayi, mmuttettheni-mu m'oYerusalemu, Heroti ni Ponsio Pilato yaahiiwanana n'atthu a ilapo sikina vamosa n'atthu a Isarayeli wira anvirikanye Mwan'inyu Ooreera murima Yesu Moopoli ahu.

²⁸Siiso, awo yaahimaliherya sothene suupuwenly'anyu ni saatthun'anyu opaka n'uwerya wanyu.

²⁹Vano, Apwiya, nweheke sootakhala siniireliw'aya ni mwaavahe nroromelo arumeyi anyu, wira alaleyeke masu anyu ehoovaka etthu,

³⁰wira mooniherye owerya wanyu wowavoniha aretta ni wira sotikiniha ni miiriirya, n'uwerya wa nsina na Mwan'inyu ooreera murima Yesu.

³¹Okathi vaamalinh'aya ovekela, opuro owo waathukumanne aya waahitetereya. Othene aya yaahisareya Erooho Yooreera ni khupacerya olaleya masu a Muluku ehoovaka etthu.

³²Atthu othene oowaamini yaanikhala vamosa yiiwananaka oratta-ene, ni murima mmosa ni muupuwelo mmosaru. Khaavo aahimya wira mireerelo saarin'awe saari sawaweru paahi, masi sothene saarin'aya saari s'atthu othene.

³³Arummw'awo yaanilavula n'uwerya wuulupale onamoona wohihimuwa w'Apwiya Yesu, nave mahala manci-ene yaari n'iy'awo.

³⁴W'atthu awo oowaamini khaavo aathoiwa, okhala wira ale yaarina imatta n'ipa yaanitumiha sothene, musurukhu-ene yaanaavahererya arummwa,

³⁵wira awo emukaweleke khula mmosa ettharihelaka othoiwa wawe.

³⁶Yosefe yoowo arummwa yaanvahaly'aya nsina na Parnapa n'elavulelo aya nnihimya mwaana onaalipiha akhw'awe, aari mulevi a elapo y'oKipero

³⁷Okhala wira aahikhalana ematt'awe, aahitumiha, musurukhu ene khurowana mmatatani mw'arummwa.