Acts 3

¹Nihiku nimosa, iwoora tthaaru sa makaripi, Petru ni Yohani yaahirowa ovekela mpaani mwa Muluku.

²Nave aaniruuhiwa weiwo khula nihiku mulopwana aayariwe oorakala-ene khuyakilaathihiwa vamukhora v'empa ya Muluku yoowo wiitthaniwa Mukhora Wooreera, wira aavekeleke esimula atthu yaakela-mu.

³Okathi vaanwehaly'awe Petru ni Yohani avolowaka aahavekela wira anvahe esimula.

⁴Awo yaahinwehexexa nto Petru khumuhimeerya wira: ?Muniwehe hiyo!?

⁵Owo aahaawehexexa, aroromelaka wira aanvahiwa etthu.

⁶Nto Petru aahimuhimeerya wira: Nkirina eparatha nnakhala eweero nto yeeyo erin'aka: Kinimoovahani, ni nsina na Yesu Kristu muNasareti nvenye mweetteke.

⁷Numala, Petru aahinvarela ntata noolopwana, khumukhaliherya wemela. Naanaanoru inawu ni makhuva yaahimulipa

⁸nto owo aahitupha kweemela, khupacerya weetta. Aahikela ni yoowo mpaani mwa Muluku, eettaka, atupha-tuphaka ni amuttottopelaka Muluku.

⁹Atthu othene yaahimoona eettaka amuttottopelaka Muluku.

¹⁰Yaahimusuwela wira aari y'ole aakilaathi-xa ?vamukhora Wooreera? wa mpaani mwa Muluku avekelaka esimula nto yaahitikinihiwa vanci-ene ni woova w'ile yaakhumelenle.

¹¹Mutth'uwo aavonihiwe aanimuttharelela Petru ni Yohani. Nto atthu othene etikinihiwe-ene yaahitthimakela nipuro n'ary'aya niphiryo n'empa ya Muluku naaitthaniwa ?Epwaro ya Salomoni.?

¹²Okathi Petru vaawehaly'awe siiso aahaalavuliha atthu awo iiraka: ?Nyuwo a Isarayeli, exeeni munikhalaanyu ootikinihiwa, n'etthu ila? Wala exeeni munniwehexex'anyu hiyo siiso? Munuupuwela wira eyo yiiren'ye n'uwerya wahu wala muhina w'oreera wahu murima tu mweettihale mutth'ula?

¹³Muluku a Aparahaamu, ni a Isakhi ni a Yakope, Muluku a axitiith'ihu t'otthunne siiso omuttittimiha murumeyi awe Yesu yoowo nyuwo mwanvaherenry'anyu mmatatani mwa makhulupale. Ni okathi Pilato waaphavelawe omutaphula, nyuwo mwaahimuruna.

¹⁴Moomukhootta ole aari ooreera murima, naxariya, nto khunvekela otaphuliwa nakhirini.

¹⁵Siiso nyuwo moomwiva Mwaneene Ekumi. Nto Muluku oomuhihimuxa mookhwaani, hiyo va n'anamoona.

¹⁶Mwaha wo waamini nsina na Yesu, nsina nenlo tininvahale ikuru mutth'ula, y'ola, nyuwo munimoon'anyu ni munimusuwel'anyu. Omwaamini wawe Yesu tonvonihale voomalela, ntoko nyuwo othene sinimoon'anyu.

¹⁷Axinn'aka miyo koosuwela wira hata nyuwo ni makhulupale anyu mwiirale mwaha woohisuwela.

¹⁸Nto siiso soomaliheriwa seiye Muluku saahimaly'awe okhuma khalayi ni moolumo a maprofeta othene: Wira Kristu aahaana ohaawa.

¹⁹Tivo, murukunuxe mirima sanyu ni muttharuwe wira sootakhala muhokolowelaka wa Muluku wira ooleveleleni itampi;

²⁰siiso Apwiya animoovahani mahiku a murettele mwaha w'Apwiya. Nave owo onimoorumihelani Yesu ntoko saahimmy'awe okhuma khalayi.

²¹Vano Yes'uwo ohaana okhala wirimu mpakha ophiya okathi sinrow'aya wuluuliwa itthu sothene, ntoko Muluku sihimmy'awe ni moolumo a maprofet'awe ooreera murima okhuma khalayi.

²²N'ekeekhayi, Monse oohimya wira: Apwiya Muluku anyu animoorumihelani profeta mmosa eriyari y'axinn'inyu onlikana ni miyo. Munammwiwelela sothene sinrow'awe wohimeeryani.

²³Ole ohinrowa omwiiwelela profeta owo onimoomoliwa munlokoni mw'atthu.

²⁴Siiso-tho maprofeta othene, okhuma S'amuweli mpakha ohoolo aalaleya itthu siniiraneya mahiku ahu ala.

²⁵Nyuwo mwa aana a maprofeta ni a waataana Muluku wapakaly'awe n'axitiith'ihu, amuhimeeryaka Aparahaamu wira: Mwaha wa osuulu anyu kinooreeriha maloko othene.

²⁶Muluku vamuhihimuxaly'awe Murumeyi awe, opacerin'he worumihelani nyuwo, wira ooreeriheni wira khula mutthu ahiye sootakhala sinir'anyu.?