Acts 2

¹Vaaphiyaly'aya nihiku na niira na Pentekosti, awo othene yiira ethukumanne-ene nipuro nimosa.

²Naanaanoru waahiiwanyeya okhumaka osulu, oruma ntoko epheyo enoopa n'ikuru yaasanrye mpa mothene mwaary'aya.

³Nto yaahaakhumelela ntoko malumi a mooro khusareya-mo, ni yaanimmorela khula mmosa.

⁴Othene aya yaahisareya Erooho Yooreera, vano yaahipacerya olavula ilavulelo sikina ntoko Erooho Yooreera yavah'aya wira elavuleke.

⁵Okathi-ene yoowo yaanikhala-wo oYerusalemu aYuta yaamweettela Muluku yaaruiye ilapo sothene sa moolumwenku-ni.

⁶Vaaiwanyenyaaya oruma iwo, yaahithukumana atthu anci-ene ni othene aya yaahikhala etikinihiwe-ene, okhala wira khula mutthu aawiiwa elavulaka elavulelo awe.

⁷Atthu othene yaahitikinihiwa vanci-ene, khiyahimya mukina ni mukhw'awe yiiraka: Atthu ala othene anlavula, kahiyo a oKalileya?

⁸Nto vanikhala sayi khula mutthu awiiwaka olavula elavulelo eyareliw'awe.

⁹Aakhala vaava atthu anikhuma elapo y'oPartiya ni y'oMetiya ni ya wElami ni y'oMesopotamia ni y'oYuteya ni y'oKapatosiya ni y'oPonto ni ya wAsiya

¹⁰ni y'oFrixia ni y'oPanfilia ni ya wExitu ni y'oLipia waattamenle oKireene. Akina-tho akhumme oRooma n'aYuta oohikhala eyarewo.

¹¹Nlelo akina akhumme oKereta ni akina akhumme wArapiya. Othene ahu nniwiiwa elavulaka elavulelo ahu ehimyaka miteko suulupale Muluku sinipak'awe.

¹²Othene aya yaahitikinihiwa, ahisuwelaka etthu yoowupuwela, ni yaanikohana yiiraka: ?Enihimya ni etthu ila??

¹³Nto akina yaanihimya etheyaka wira: Awo aroohapalasiwa!

¹⁴Vano Petru aaheemela vamosa n'arummwa ale muloko ni mmosa khwahimeerya atthu awo arunyaka wira: Nyuwo aYuta. Ni nyuwo othene munkhala oYerusalemu, nwiriyane oratta-ene moolumo aka ni musuwele itthu sikhumelenle.

¹⁵Atthu ala khahapaliwe, ntoko sinuupuwel'anyu, maana nlelo iwoora thanu naxexe sa vasiisu.

¹⁶Etthu enikhumelela t'ile elempwale mulivuruni mwa profeta Yoweli wira:

¹⁷?Mahuku ookiserya, anihimya t'Apwiya wira: Kinimwaavaha voomalela Erooho aka atthu othene; an'inyu axilopwana, an'inyu axithiyana Anoolaleya Ehapari aka; amiravo anyu animooniheriwa sootikiniha, Anakhulu anyu anooloha.

¹⁸Nave-tho kinimwaavaha voomalela Erooho aka arumeyi aka axilopwana n'axithiyana, vano tho mahiku awo, awo anoolaleya Ehapari aka.

¹⁹Osulu wirimu, kinimwiira sootikiniha, nave kinimooniherya elapo ela ya vathi ithoonyeryo sootikiniha. Ephome, mooro ni otthuwa wa mwiixi.

²⁰Nsuwa ninrowa okhala epiphi ni mweeri onrowa okhalana ephome, nihinatthi ophiya nihiku nuulupale ni Noottittimihiwa Nihiku n'Apwiya.

²¹Nto ale anrowa ovekela mwa nsina n'Apwiya animoopowa.?

²²Nyuwo a Isarayeli nwiriyane moolumo ala: Yesu muNasareti aari mutthu aakupaliwe ni Muluku ohoolo wanyu, ntoko soonaly'anyu ithonyeryo ni itthu sotikiniha ni miiriirya Muluku sipakaly'awe muhina mwa yoowo, ntoko nyuwo mwaxineene sinsuwel'anyu.

²³Mwaahivahereriwa Yesu nto nyuwo khumwiiva mmukhomelaka vamwiikimanyo mmatatani mw'atthu ahinaxariya.

²⁴Nto Muluku oomuhihimuxa mookhwani amwaakihaka owerya wa okhwa, maana khivaaweryaneya wira owo oweriwe n'ukhwa,

²⁵Tthiri Taviti oohimya mwaha wa yoowo iiraka: ?Okathi p'ukathi miyo kaaniwoona Apwiya ohoolo waka; awo yakhala moono aka woolopwana, wira miyo kihooveke etthu.

²⁶Tivo murim'aka vantteeliwaya vanci-ene, ni nlumi naka nintthap'aya. Hata erutthu aka ennimumula n'uroromela.

²⁷Maana khamunihiya munep'aka okhala mapuro aalipa ookhwa nnakhala khamuntthuniherya wira murumeyi anyu antte mmahiye.

²⁸Nyuwo mookithonyerya iphiro s'ekumi: Mukhalaka ni miyo, munnikisariha otteeliwa murima.?

²⁹Axinn'aka kimphavela wooleelani oratta-ene mwaha wa tiith'ihu Taviti, yoowo okhwiiye khuvithiwa. Nave mahiye awe nlelo akhala.

³⁰Owo aari profeta, aanisuwela wira Muluku aahimuroromeliha amulaphelaka wira mutthu mmosa a osuulu awe aarowa okilaathi veehiceni vawe.

³¹Oonaka eyo, aahihimya sa ohihimuwa wa Kristu wira: Khohiiwe mulaponi mw'alipa ookhwa, hata erutthu awe khiyinttale.

³²Muluku oomuhihimuxa Yes'uwo, yoowo hiyo othene nimmukhalel'ahu onamoona.

³³Owo oottittimihiwa akhalaka moono woolopwana wa Muluku, yoowo onvan'he Erooho Yooreera ntoko saaroromelihaly'awe, nave oonivaha hiyo, ntoko nyuwo sinoon'anyu ni siniiw'anyu.

³⁴Kahiyo Taviti owenle wirimu, okhala wira owo aahihimya wira: Muluku ohaahimeerya Apwiy'aka wira: Mukilaathi moono aka woolopwana,

³⁵mpakha miyo waahela awanan'inyu vathi va inawu sanyu.

³⁶Atthu otthene a Isarayeli esuweleke wira Yesu yoowo nyuwo mmukhomenly'anyu, Muluku oomukhaliha Pwiya ni Kristu.

³⁷Okathi vaaiwaly'aya moolumo ala murima waahaaripa vanci-ene khumukoha Petru n'arummwa akina yiiraka: ?Axinn'aka, nto niireke-ni??

³⁸Petru aahiwaakhula iiraka: ?Murukunuxe murima muhiyaka wira itthu sootakhala ni mpatisiwe mu nsina na Yesu Kristu, wira Muluku ooleveleleni itampi ni munimwaakhela Erooho Yooreera.

³⁹Tthiri natiri a Muluku t'awinyu nyuwo n'an'inyu ni t'atthu othene anikhala ottaiwene, n'ale Apwiya Muluku ahu antthun'aya owiihana.?

⁴⁰Petru aanatumererya ni moolumo makina manci-ene, ni aanaahimeerya wira: Mutthyawe ehukhumu enaarweela atthu ala ootakhala murima!

⁴¹Atthu anci-ene yahaamini moolumo awe khupatisiwa. Nave nihiku nenlo paahi yaahitakaahereya n'atthu oowaamini atthu vakhiviru imiya miloko miraru.

⁴²Atthu othene yaanikhalela nthiti wiiwa mixuttiho s'arummwa, ni wettihana n'uphenta, n'ukawana mukatthe (eyoolya) ni mmavekeloni.

⁴³Arummwa yaaniira mitikiniho ni mirirya sinci-ene. Vano atthu othene yanoova.

⁴⁴Othene ale yaamini yaakhala oowiwanana, yaanikawelana sothene saarin'aya.

⁴⁵Yaanitumiha imatta saya n'itthu sikina saarin'aya musurukhu-ene yaanikawelana, sothene envahaka khula mutthu ettharihelaka othoiwa wawe.

⁴⁶Mahiku othene yaanithukumana mpaani mwa Muluku. Yaanikawana yoolya mmawannyeya, yaanilya vamosaru n'utteeliwa murima ni wiiyeviha.

⁴⁷Yaanimuttottopela Muluku. Vano atthu othene yaanisiveliwa ni mwettelo aya. Nave khula nihiku Apwiya yaanahela mmulokoni memmo atthu akina yiihaneliwa woopowa.