Acts 1

¹Nyuwo Tiyofilo, koolepa eliivuru yopacerya, kihimyaka mwaha wa itthu sothene Yesu sipacenry'awe wira ni wiixuttiha,

²mpakha nihiku niwelihiw'awe wirimu, amanle-ene waavaha soruma muhina mwa Erooho Yooreera arummwa aathanlaly'awe.

³Numala okhwa, nave-tho aahisooniherya wa yawo arye-ene mukumi n'inamuna sinci-ene, ooniwaka ni yawo mpakha mahiku miloko mixexe ni alavulaka myaha s'oMwene wa Muluku.

⁴Arye-ene n'awo aahaaruma iiraka: Muhikhume oYerusalemu. Mulipeleleke omaliheriwa natiri aTiithi aamuhimaly'aya, yoowo miyo kooleenly'akani.

⁵Tthiri, veekeekhayi Yohani oopatinseni ni maasi, nto yavira mahiku vakhaani, nyuwo munrowa opatisiwa ni Erooho Yooreera.

⁶Tthiri, ale yaathukumanne, yaahimukoha yiiraka: ?Pwiya okathi yoola onrowanyu ottikiherya Omwene w'atthu a Isarayeli??

⁷Yesu aahiwaakhula iiraka: ?Kahiyo yawinyu osuwela okathi wala nihiku aTiithi athanlaly'aya n'uwerya waya.?

⁸Nto nyuwo munimwaakhela ikuru sa Erooho Yooreera enrowa wokhuruwelani, ni munrowa okhala anamoon'aka oYerusalemu ni oYuteya wothene ni oSamariya, mpakha omalenle elapo.

⁹Nto, okathi yowo wahimeery'awe moolumo ala, aahiwelihiwa wirimu, awo emoonaka, nave neeku naahimukhuneela, awo khuhimoona-tho.

¹⁰Awo yaahanle nlelo ewehexexaka osulu, okathi Yesu vaawelihiw'awe. Naanaanoru yaahikhumelela atthu anli awanre-ene ikuwo sotteela,

¹¹khwahimeerya wira: Nyuwo aKalileya! Muhalenleni va nwehaka osulu? Yesu yoowo omoonaly'anyu akhumaka eriyari anyu arowaka wirimu onimoorwa-tho siisaale simoonaly'anyu arowaka osulu.

¹²Numala, arummwa yaahivenya omwaako wihaniwa Olivera, khuhokolowela oYerusalemu waari woorakamelana vakhiviru ni ekilomo emosa.

¹³Nave okathi yoowo yaahiwela empa y'osulu yeeyo yaathukuman'aya Petru, Yohani, Yakopo, Antere, Filipe, Tome, Partolomewu, Matewu, Yakopo (mwaana a Alfewu, Simoni mukanani ni Yuta mwan'awe Yakopo.)

¹⁴Othene aya yaaniira mpantta mithukumano sa mavekelo mahiku othene ni murima mmosaru, vamosa n'athiyana akina, ni Maria ame awe Yesu, n'axinn'awe Yesu.

¹⁵Nihiku nimosa yaahithukumana atthu yaari vakhiviru miloko muloko n'atthu miloko miili. Petru aaheemela eriyari y'arummwa, khwahimeerya wira:

¹⁶Axinn'aka, saahaana wiraneya itthu seiyo Erooho Yooreera sihimmy'aya mwa soolempwa ni moolumo a Taviti, emuhimyaka Yuta, yoowo aahoonle atthu yaanvanre Yesu.

¹⁷Okhala wira aari mmosa a muloko ahu yoola, tthiri aahiphwanya oreeriwa wa muteko yoola.

¹⁸Nto owo aahithuma ematta ni yootakhala yiiraly'awe anvarihaka Yesu. Khukhwela memmo, erukulu awe yaahiphuleya, marupo awe othene khumwareela vathi.

¹⁹Atthu othene a oYerusalemu yaahiiwa ehimmwaka etthu ila, siiso yaahivaha ematt'eyo nsina n'ilavulelo aya, Hakeldama, enihimya wira ?ematta y'ephome.?

²⁰Okhala wira yoolepwa muliivuruni mwa Masalimu wira: Emp'awe ethaammwe ni ahikhale-tho onrowa okhala-mo. Nave-tho ennihimya wira: Mutthu mukina akele muteko awe.

²¹Tthiri vannireerela wira nimuthanle mulopwana mukina eriyari y'atthu y'ale yaarin'ahu okathi wothene Pwiy'ahu, Yesu vaary'awe ni hiyo;

²²okhuma epatisimu ya Yohani mpakha nihiku niwelihiw'awe wirimu, mutthu mukina ohaana okela munlokoni mwahu wira akhale namoona oohihimuwa wawe.

²³Yaahemexiwa alopwana anli: Yosefe iihaniwa Parsapa aasuweliwe-tho ni nsina na Naxariya, ni Matiyaxi.

²⁴Numala yaahivekela yiiraka: Apwiya munsuwela mirima s'atthu othene, munooniherye w'atthu ala anli tuuvi omuthanlaly'anyu

²⁵wira avareke muteko ni hiyo ntoko murummwa akelaka opuro awe Yuta yowo ahapunwe arowaka nipuro nawe.

²⁶Numala yaahaverya eparakha nto khummorela Matiyaxi, khukhala oothanliwa akelihiwa munlokoni mw'arummwa muloko ni mmosa.