John 21

¹Vahoolo vaya, Yesu ahiisooniherya-tho w'awiixutti awe oxerexere wa nratta n'oTiperiyati. Aisonihenrye so:

²Yaari vamosa Simoni Petru, ni Tome y'ole iihaniwa Maphapo, ni Nataniyeli, aari a oKana w'oKalileya, ni anaawe Sepeteyo n'awiixutti akina anli.

³Simoni Petru aahahimeerya akhw'awe wira: ?Miyo kinrowa ototha ihopa.? Awo yahimwakhula wira: Ni hiyo nnimottharani. Yaahivenya tthiri, khukela mukalawani. Nto ohiy'uwo khiyaavanre etthu.

⁴Ox'aka Yesu aaheemela orattani, nto awiixutti awo khiyaamusuwela wira ti yoowo.

⁵Yesu aahaakoha, wira: An'aka, khamurina etthu enlyiwa? Awo yahimwaakhula: Nnaari! Khanirina!

⁶Owo aahahimeerya wira: Murihele nthavi moono woolopwana w'ekalawa: Munoophwanya. Awo yaahirihela siiso, ehinawerya opurula-tho mwaha wa ihopa sahaareere waatta.

⁷Mwiixutti ule aphentexiwa ni Yesu, ahimwiirela Petru: ?T'Apwiya!? Simoni Petru, aiwakaru wira t'Apwiya, aahiwara mukhumi awe, maana aaroorula atothaka, khutuphela mmaasini.

⁸Awiixutti akina yaahirwa mukalawani, epurulaka ntthavi n'ihopa, maana khiyaarakamelanne, omookoni yaari mavalo miloko miloko miili.

⁹Vakhumenlyaya ota, yahoona makhala a mooro n'ihopa vasulu vaya, yaahoona-tho mikatthe.

¹⁰Yesu ahiwiirela: ?Muruuhe ihopa siivalyanyu naanaano.?

¹¹Simoni Petru aahikela mukalawani, khupurulela ntthavi ota. Ntthavi nlo nasanrye ihopa suulupale miloko muloko ni mithanu n'ihopa tthaaru. Saarimwaattaru siiso, ntthavi khinanyunwe.

¹²Yesu ahiwiirela: Rwaani, mulyeeke! Khaavo aawiixutti awo aaminyalenle omukoha wira: ?Nyuwo mwa pani?? Tthiri yanisuwela, wira t'Apwiya.

¹³Vano Yesu ahiwaattamela, ahikuxa mikatthe, khwaavaha: Siiso-tho ahaavaha ihopa.

¹⁴Ela yaari emaara yaneeraru Yesu yaisonihenryaawe wa awiixutti awe, numala ohihimuwa wawe mw'alipa ookhwa.

¹⁵Vamanlyaya olya, Yesu ahimukoha Simoni Petru wira: Nyuwo Simoni, mwaana a Yohani! Munnikiphenta, vowaavikana akin'ala? Owo ahimwaakhula wira: Ayo, Pwiya! Nyuwo moosuwela wira Kinnophentani! Yesu ahimwiirela: Mulyihe ipwittipwitthi saka.

¹⁶Yesu ahimukoha emaara yanenli, iiraka: Nyuwo Simoni, mwaana a Yohani! Munnikiphenta? Owo ahimwaakhula wira: Ayo, Pwiya! Nyuwo moosuwela wira kinnoophentani! Yesu ahimwiirela wira: ?Mukhapelele ipwittipwitthi saka.

¹⁷Ahimukoha-tho emaara yaneeraru, iiraka: ?Nyuwo Simoni, mwaana a Yohani! Munnikiphenta? Petru ahiriipiwa murima mwaha w'okohiwa emaara yaneeraru wira: ?Nyuwo munnikiphenta?? Tivo amwakhunlyawe wira: Pwiya, nyuwo moosuwela sothene! Nyuwo moosuwela wira kinnophentani! Yesu ahimwiirela: Mulyihe ipwittipwitthi saka.

¹⁸Miyo kinohimeeryani ekhweeli wira: Mwaryanyu mmiravo, nyuwo mwaniwara mmansinyu, khiyarowa waatthunanyu. Vano okathi onuuluvalanyu, munimookola matat'anyu, mukina oowariheni, ooroiheni ohintthunanyu-wo.

¹⁹Yesu ahimuhimeerya siiso wira amuthonyerye makhwelo aarowawe omuttittimihano Muluku. Numala, Yesu ahimwiirela: ?Mukithare!?

²⁰Petru, arukunuwaka, aahimoona mwiixutti aphentexiwa ni Yesu, aattharaka ottuli. Mwixutti uwo ti yole aphitenrye etthirima ya Yesu, okathi walyawe, amukohaka wira: ?Pwiya, t'ani uwo onrowa wovahereryani??

²¹Petru, vamoonalyawe, ahimukoha Yesu, iiraka: Pwiya, ankhi ula?

²²Yesu ahimwaakhula wira: Miyo katthuna wira owo akhale mpakha vanrw'aka, erivo yawinyu exeeni? Nyuwo mukitthareke paahi!

²³Vano vaahivuwela mw'axinna wira mwiixutti uwo khankhwa. Nto Yesu khahimyale wira: ?Owo khankhwa.? Ahimyale wira: Miyo katthuna wira owo akhale mpakha vanrw'aka, erivo yawinyu exeeni?

²⁴Mwiixutti uwo ti yoola ori namoona a itthu iya, khulepa sothene. Hiyo noosuwela wira onamoon'awe ti w'ekeekhayi.

²⁵Tthiri nlelo sihaavo itthu sinci-ene siiraly'awe Yesu. Itthu iya sothene saalempwale emosa-emosa, kinoona wira hata elapo yothene ya vathi khiyaarowa ophiyerya iliivuru saarowa olempwa.