John 20

¹Nihiku noopacerya n'asumana, vaasiisu-ene, vahinatthi oxa saana, Maria aoMatala ahirowa omahiye, khwoona wira nluku nattiyelaniwe nikhuku, nahikumihiwa.

²Tivo, ahitthimakela orowa okumana ni Simoni Petru ni mwiixutti mukina, yoowo Yesu amphentexawe, khwahimeerya wira: Apwiya aakuxiwa munikhukuni! Khanisuwenle wixathiwaya.

³Naanaanoru, Petru ni mwiixutti mukin'owo yaahivenya erowaka onikhukuni

⁴Oowanli yahitthimaka vamosa, vano mwiixutti uwo mukina ahitepa otthimaka onvikana Petru, khukhala muraaci ophiya onikhukuni.

⁵Owo ahuurama, khoona esanta-ru, nto khuhikela-mo.

⁶Nave Simoni Petru, ahanle ottuli, ahiphiya, khukela munikhukuni-mmo. N'uwo-tho aahoona esanta-ru,

⁷ni nleeso naatthukaniwe muru wa Yesu, Nleeso nlo khinaakhanle vamoa n'esanta, nlo naahiiwale nipuro nikina.

⁸Vano mwiixutti uwo mukina, aapacenrye ophiya onikhukuni, aahikela-tho: Ahiweha, khwaamini.

⁹Tthiri awo yiira nlelo ehisuwenle oratta-ene soolempwa wira: Yesu aahaana ohihimuwa mookhwaani.

¹⁰Numala itthu iya awiixutti awo anli yaahihokolowela owaani.

¹¹Vano Maria ahihala onikhukuni, mpantte w'ota, khiyanla. Anlaka siisale, ahithurumela munikhukuni,

¹²khuwoona ankelo anli ewanreene ikuwo soottela, ekilantheene vaari murutthu wa Yesu, mmosa waamuru, nikina waametto.

¹³Ankelo awo anli yaahimukoha wira: ?Muthiyana! Muniinlela-ni?? Owo aahaakhula wira: ?Apwiy'aka takuxiwe. Vano nkinsuwela vaixathiwaya-vo.

¹⁴Ahimyakaru siiso, aahiweha ottuli, khumoona Yesu, emenle vaavale; nto khaasuwenle wira aari Yesu.

¹⁵Yesu aahimukoha wira: ?Muthiyana! Muninlelani? Munimphavela t'ani?? Maria, uupuwelaka wira aari waneene ematta, aahimwirela: Napwiya, mwaari nyuwo mmukunxe, mukihimeerye omwixanthanyu-vo, miyo kirowe kamukuxe.

¹⁶Yesu ahimwiirela: Maria! Owo aahirukunuwa khwaakhula ni eHeeperi iiraka: Raponi (enihimya wira mwiixuttihi).

¹⁷Yesu ahimwiirela: Muhikivare, Nlelo nkironwe w'Atiithi. Vano murowe, mwaahimeerye axinn'aka wira miyo kinrowa w'Atiithi, yawo-tho akhanle Atiith'inyu: Kinrowa wa Muluku aka, yowo-tho okhanle Muluku anyu.

¹⁸Maria aoMatala ahirowa waahimeerya awiixutti ahaalela, wira: Kowoona Apwiya! Khwaleela sothene sahimeriwawe ni Yesu.

¹⁹Nihiku nenlo noopacerya n'asumana, makaaripi, awiixutti a Yesu yaari mpaani, mikhora siwaliweene mwaha w'owoova aYuta. Vano Yesu ahirwa, khwemela variyari vaya, khwaahimeerya wira: Murettele okhale ni nyuwo!

²⁰Ahimyaka siiso, ahiwoniherya matat'awe ni mpararini mwawe. Awiixutti awo yaahitteeliwa murima, ewoonaka Apwiya.

²¹Yesu ahaahimeerya-tho wira: Murettele okhale ni nyuwo! Ntoko Atiithi vakirummyaya, ni miyo kinnorumani nyuwo.

²²Ahimyakaru siiso, ahiwiseelela, khwahimeerya wira: Mwakhele Erooho Yooreera!

²³Ale anrowanyu walevelela itampi, anooleveleliwa: Ale anrowanyu ohaalevelela, khanleveleliwa.

²⁴Tome, ihaniwa Maphapo, mmosa a yaale muloko nanli, khakhanle-vo n'akhw'awe, okathi warwiyawe Yesu.

²⁵Vano awiixutti akina yaahimuhimeerya wira: Nowoona Apwiya! Nto owo ahiwaakhula wira: Miyo kahooneru mmatatani mwaya makhwatta mwathoroliwaya, kahikeliheru ekath'aka mmakhwattani mwaya, kahikeliheru ntata naka mpararini mwaya, nkinaamini!

²⁶Evinreene mahiku mathanu na mararu, awiixutti awe yaari-tho mpaani. Tome aari ni yaawo. Yesu aahirwa mikhora siwaliweene, aheemela variyari vaya, khwiira: Murettele okhale ni nyuwo!

²⁷Vano aahimuhimeerya Tome wira: Muruhe va ekath'inyu. Moone matat'aka. Mookole ntata nanyu, mukelihe mpararini mwaka. Muhikhale mutthu oohaamini: Nto mwaaminiki!

²⁸Tome aahimwaakhula wira: Pwiy'aka ni Muluku aka!

²⁹Yesu ahimuhimeerya wira: Nyuwo muhaamini, okhala wira mookoona. Ooreriwa t'ale anaamini ehoonne naari!

³⁰Tthiri Yesu aahiira vamaithoni v'awiixutti awe mitikiniho sinci-ene sikina sihilempwe eliivuru-ene y'ela.

³¹Vano itthu iya silempwe wira mwaaminiki wira Yesu ti Kristu, Mwaana a Muluku; nave-tho wira, mwaaminiki siiso, mphwanye ekumi mwa Yoowo.