John 19

¹Tivo Pilato aamukunx'awe Yesu khuruma owaxuliwa.

²Anakhotto yahuupa ekhara ya miiwa, khunwariha mmuruni; yaahimukhuneela mmakhatani ni mukhumi wooxerya,

³numala yanirowa ohoolo wawe emwiirelaka: Moxeleliwa, mwene a aYuta? Emmanaka mphatamaaru.

⁴Pilato ahikhumela-tho vate, khwahimeerya atthu wira: Va kinomukumiherya ohoolo wanyu, wira musuwelexe wira nkinimphwanyana mulattu.

⁵Vano Yesu ahikumiheriwa vate, awarihiwe-ene ekhara ya miiwa mmuruni n'ikuwo yooxerya. Pilato aahahimeerya atthu awo wira: Mutthu anyu ola va.

⁶Vano, makhulupale a anamukuttho ni alipeleli, emoonakaru Yesu, yaahikhuwela yiiraka: Akhomeliwe! Akhomeliwe! Pilato aahahimeerya wira: Mmukuxeke yenyu, mwamukhomeleke! Miyo va nkinimphwanyana mulattu!

⁷Ayuta yahimwaakhula wira: Hiyo nookhalana ikano sahu. Vano, natthara ikano sahu seiyo, owo onniphwanela okhwa, maana ohiipaka Mwaana a Muluku.

⁸Pilato vaiwalyawe moolumo ala, aahitepa woova.

⁹Ahikela-tho mpaani, khumukoha Yesu, iiraka: Nyuwo munkhuma vayi? Nto Yesu khaamwakhunl'etthu.

¹⁰Tivo Pilato ahimuhimeerya wira: Khamunkaakhula etthu? Khamunsuwela wira miyo kirina owerya wo wootaphulani, ni kirina-tho owerya wo wookhomelani vamwiikimanyo?

¹¹Yesu ahimwaakhula wira: Nyuwo khamwaakhalana owerya w'okiiriha etthu, mwahaavahiwe osulu. Tivo, ole okivaherenrye wa nyuwo t'otempe ottheka.

¹²Okhuma okathi yoowo, Pilato aaniphavela omutaphula Yesu. Nto aYuta yaanikhuwela, yiiraka: Mwamutaphula vale, khamuhiyo mpatthani a Kesari. Mutthu ti mutthu oniikhaliha mwene oninvirikanya Kesari?

¹³Pilato vaaiwaly'awe moolumo awo aahimukumiherya Yesu ota, khukilaathi nipuro naaphukiwa milattu, nenlo niihaniwa nipuro naapatthiwe ni maluku, mwa eHeperi Kapatha.

¹⁴Nihiku nenlo naari nihiku n'omureherya Paasikha: Vaari vakhiviru othana eriyari. Pilato aahahimeerya aYuta wira: ?Mwene any'ula va!?

¹⁵Vaavo awo yahikhuwela yiiraka: ?Aiviwe! Aiviwe? Mmukhomele!? Pilato aahaakoha wira: ?Kimukhomele mwene anyu?? Makhulupale a anamukuttho yaahakhula wira: Khanrina mwene mukina, ahikhanle Kesari!

¹⁶Vano Pilato ahavahererya Yesu wira yamukhomele.

¹⁷Awo yaahimukuxa Yesu, nave owo aahikuxa mwiikimanyo awe anarowa nipuro nniihaniwa Kalavariyo, ni eHeperi, Kolokota.

¹⁸Weiwo, anakhotto yahimukhomela Yesu vamwiikimanyo. Nipuro nenlo, yahaakhomela-tho alopwana akina anli: Mmosa moono woolopwana, mukina moono woothiyana, Yesu khukhala eriyari.

¹⁹Pilato ahiruma olempwa nipawe n'uthomeiwa vamwiikimanyo; nipawe nlo nalempwe moolumo ala: ?Yesu muNasareti, mwene a aYuta.?

²⁰Ayuta anci-ene yahisoma nipawe nlo, okhala wira nipuro naakhomeliwawe Yesu nattamenle omuttettheni. Vano nalempwe ilavulelo tthaaru: Eheperi, ni elatino n'ikereku.

²¹Makhulupale a anamukuttho yaanimuhimeerya Pilato wira: ?Muhilepe Mwene a Ayuta.? Mulepe wira ola aanihimya wira: ?Miyo ki mwene a Ayuta.?

²²Pilato ahiwaakhula wira: ?Elempyaka, koolepa!?

²³Anakhotto vamukhomenlyaya Yesu vamwiikimanyo, yaahittottela sowara sawe, khukawanya ipantte xexe: Khula nakhotto epantte awe. Siiso-tho, yahikuxa nlaya na Yesu. Vano nlaya nlo narotthaviwa, okhuma osulu mpakha vathi, khinaattotthiwe.

²⁴Tivo, anakhotto yahihimeeryana wira: Nihikhere nlaya nla: Naavererye eparakha, nimoone onrowa okhala mwaneene. Nto anakhotto yaahiira siiso wira emaliheriwe ele elempwale enihimya wira: Awo aakawelana sowara saka: Vano nlaya naka ahavererya eparakha Nto anakhotto yaahiira siiso.

²⁵Vakhiviru vamwiikimanyo wa Yesu, yaheemela ame awe ni munn'aya ame awe ni Maria, mwar'awe Kelopha, ni Maria aoMatala.

²⁶Yesu ahiwoona ame awe ni mwiixutti uwo amphentexawe, akhanleene vamosa ni ame awe. Vano aahahimeerya ame awe wira: Muthiyana, mwan'iny'uwo vo!

²⁷Numala, ahimuhimeerya mwiixutti uwo wira: Amam'inyu awo vo! Okhuma okathi yoowo, mwiixutti uwo ahiwaakhela ame awe Yesu owannyawe.

²⁸Numala, Yesu voonaly'awe wira sothene soomaliheriwa nto wira simaliheriwe saalempwe, Yesu aahiira: ?Nookivola ntthona.?

²⁹Wahikhala-vo murinki wasareiye eviinyu yoonyunya. Anakhotto yaahikuxa nttapwatta, yaahinaniha ni eviinyo yoonyuunya, etthukwelela vamutathini, khumuroihela mwaano wawe.

³⁰Vano Yesu valawihalyawe eviinyu iyo yoonyunya, aahihimya wira: ?Sothene soomaliheriwa!? Numala, ahuuramiha muru, khukhwa.

³¹Nihiku nlo naari nihiku n'omureherya Paasikha. Ayuta khiyaatthunne wira irutthu s'atthu ale yaakhomeliwe sikhale vamwiikimanyo nihku na saapato, okhala wira esaapato iyo yaari nihiku nuulupale. Tivo, yaahinvekela Pilato wira arume wuntakasiwa metto n'ukuruxiwa mirutthu.

³²Anakhotto yaahirowa, wuntakasa metto s'alopwana ale anli yaakhomeliwe vamosa ni Yesu.

³³Vano vaaphiyaly'aya vaari Yesu, yaahimoona wira ohookhwa, khuhimuntakasa metto.

³⁴Nto nakhotto mmosa ahimuhoma mpararini nnivaka: Naanaanoru yaahikhuma-mo ephome ni maasi.

³⁵Nave yoowo oonne ookhalela onamoona nave onamoona awe ti weekeekhayi, nave yoowo onnisuwela wira itthu sinihimy'awe ti s'ekeekhayi wira nyuwo tho mwaamini.

³⁶Itthu iya saahikhumelela wira emaliheriwe moolumo alempwe, wira: ?Khinnintiwa nikhuwa nawe, nnakhala nimosa.?

³⁷Vakina-tho volempwa wira ?Anonweha yoowo amuhommyaya.?

³⁸Vaamanlyaya itthu iya, Yosefe a wArimathaya, ahirowa onvekela Pilato wira amutthuniherye okuxa murutthu wa Yesu. Yosefe owo aari mwiixutti a Yesu; ni mwiitiho, okhala wira aaniwoova aYuta. Pilato ahimutthuniherya. Tivo, ahirowa okuxa murutthu wa Yesu.

³⁹Ahirwa-tho Nikotemu, yoowo khalayi aronwe ohiyu okumaana ni Yesu. Nikotem'owo aahiruuha emiira yinci-ene yootakanxeriwa alowe eyo p'iyo makhura oowunkhela.

⁴⁰Oowanli aya yaahikuruxa muruthu wa Yesu, yaahiphapa n'isanta, khwitthela makhur'ale oowunkela, ntoko aYuta salimalenlyaya ovithana.

⁴¹Nipuro nakhomeliwawe Yesu, yaahikhala ematta. Mmatta memmo yahikhala mahiye masya, (mahiye awo yaari Nikhuku Nsya), yahatonko ovithiwa-mo mutthu nlelo.

⁴²Yesu ahivithiwa memmo, okhala wira Paasikha a aYuta ahikhuveela, vano mahiye ale yaari vakhiviiru.