John 18

¹Vamalihalyawe olavula masu ala, Yesu ahivenya vamosa n'awiixutti awe, khurowa ekhopela ya muro keturoni, waari-wo ematta. Yesu aahikela memmo n'awiixutti awe.

²Vano Yuta, yoole aarowa onvariha, aanisuwela nipuro nlo, okhala wira Yesu aanithukumana weiwo mahiku manci-ene n'awiixutti awe.

³Yuta ahirowa weiwo, aahoolaka anakhotto anci-ene ni alipa-oolipelela, yarumwe ni makhulupale a anamukuttho n'aFarisi, ekunxene mithuko n'iyuuma s'ekhotto.

⁴Vano Yesu, asuwelaka sothene saarowa omukhumelela, aahirowa okumanana, khwaakoha wira: Munimphavela pani?

⁵Awo yaahimwaakhula wira: Yesu muNasareti. Yesu aahahimeerya wira: Ti yoomi. Nave Yuta, aarowa onvariha, aari n'atthu awo.

⁶Okathi Yesu wakhunlyaawe wira: ?Ti yoomi?, atthu awo yaaheetta n'ittuli, khumorela vathi.

⁷Yesu ahaakoha-tho wira: Munimphavela pani? Awo yaahaakhula wira: Yesu muNasareti.

⁸Yesu aahahimeerya wira: Kihooleelani wira ti yoomi. Nto mwaakiphavelaka miyo, mwahiye akin'ala erooweke.

⁹Wira emaliheriwe masu yaahimmwe wira: ?Tiithi, w'ale akivahalyanyu khaavo okirimenle nnakhala mmosa.?

¹⁰Simoni Petru aahikhalana exoowa, aahimutholola khukwasa niyaru na moono woolopwana na murumeyi mmosa a mukhulupale a namukuttho. Murumeyi uwo iihaniwa Maalikho.

¹¹Vano Yesu aahimwirela Petru: Mmuttikiherye xoowa mwaary'awe nyuwo munuupuwela wira miyo nkikhanle ohaawa ntoko atiithi sintthun'aya?

¹²Vano anakhotto ni mukhulupale aya ni alipa-oolipelela a aYuta yaahinvara Yesu, khumutthukwa.

¹³Opacerya wene yaahimuroiha wa Hana. Hana owo aari tat'awe Kaifa amuthelenlyaawe. Kaif'owo aari mukhulupale a anamukuttho eyaakha yeeyo.

¹⁴Kaifa ti yoole aahimenrye aYuta wira: ?Vanreerela mutthu mmosa paahi aakhwele atthu othene.?

¹⁵Simoni Petru ni mwiixutti mukina yaahimutthara Yesu. Mwiixutti uwo mukina aanisuweliwa oratta-ene ni mukhulupale a anamukuttho tivo wavolonw'awe vamosa ni Yesu vate va mukhulupale owo.

¹⁶Vano Petru ahanle vamukhora mpantte w'ota. Vano mwiixutti uwo mukina, aasuweliwe ni mukhulupale a anamukuttho aahikhuma, khulavula ni muthiyana aalipelela mukhora, khumukeliha Petru mpuwa.

¹⁷Vano mwali uwo alipelela mukhora ahimukoha Petru iiraka: Nyuwo, khamuhiyo mwiixutti a mulopwan'ole? Petru aahimwaakhula wira: Nnaari! Nkihiyo!

¹⁸Yaahikhala vaavale arumeyi ni alipa-oolipelela yaisenle mooro, khiyoora, okhala wira vaaniriirya. Nave Petru ahihala vamosa n'awo, khiyoora.

¹⁹Mukhulupale a anamukuttho aahimukoha Yesu mwaha w'awiixutti awe ni mwaha wa miixuttiho sawe.

²⁰Yesu ahimwaakhula wira: Miyo kaalavula voohipithiha vamaithoni v'atthu a vathi-va nave Mahiku othene kaxuttiha mpaani moothukumana ni mpaani mwa Muluku, memmo munthukumanaya aYuta othene. Khiivo kihimyaly'aka wiiphini.

²¹Munkikoheryani miyo? Mwaakoheke ale yiiwale itthu sihimyal'yaka, awo annisuwela oratta-ene itthu saahimeenry'aka.

²²Yesu ahimyakaru siiso, mulipa-oolipelela mmosa eemenle vakhiviru, ahimmana mphatamaaru, iiraka: ?Mukhulupale aanamukuttho onaakhuliwa siiso??

²³Yesu ahimwaakhula wira: ?Kahalavunle saana, muhimye vananarihalyaka. Vano kalavula oratta-ene, munkimanelani??

²⁴Vano, Hana aahiruma wira aroihiwe atthukiweene siisale, wa Kaifa, mukhulupale a anamukuttho.

²⁵Simoni Petru aari nlelo vaavale, ooraka; khukohiwa wira: Nyuwo! Khamuhiyo-tho mwiixutti a mulopwan'ole? Petru aahiruna, iiraka: Nnaari! Nkihiyo!

²⁶Mmosa a arumeyi a mukhulupale a anamukuttho, aari mmusi awe ole Petru aamukwanse awe niyaru, ahiira: ?Miyo nkowen'heni omatta, munari ni yoowo??

²⁷Petru aahimuruna-tho nto okathi ene yoowo, muthupi ahiipa.

²⁸Vano Yesu ahikumihiwa wa Kaifa, khuroihiwa owannyawe kuverenatoro. Niira nsuwa nikhumaka. Ayuta khiyakenle mpaani mmo, wira ehirave mwiikho, yoceele olya niira na Paasikha.

²⁹Tivo Pilato ahikhumela vate vaaryaya, khwaakoha wira: ?Etthu xeeni enimuhimyananyu mulopwan'ola?

³⁰Awo yaahakhula wira: ?Owo ahaakhanle mulavilavi, khinooruhelani.?

³¹Pilato ahiwiirela: ?Mukuxekeni nyuwo, mmulamuleke muttharaka ikano sanyu. Ayuta yaahimwaakhula wira: ?Hiyo khanrina owerya w'omwiiva mutthu.?

³²Wira emaliheriwe masu yahimyalyawe Yesu, athonyeryaka makhwelo awe.

³³Pilato ahikela-tho mpaani, ahimwiihana Yesu, khumukoha wira: ?Nyuwo mwa mwene aYuta??

³⁴Nave Yesu aahimwaakhula wira: Yookoha eyo mukumin'he mmansinyu wala murohimeeriwa sa miyo n'atthu akina?

³⁵Pilato ahimwiirela: Nto miyo ki mu Yuta? Atthu a nloko nanyu makhulupale a anamukuttho t'ovaherenryeni wa miyo mwiiraleni?

³⁶Yesu ahimwaakhula wira: Omwene aka khuhiyo wa vathi-va. Waari wa vathi-vaava, arumeyi aka yamukumiha ekhotto, wira kihiveleeliwe w'aYuta. Vano omwene aka khuhiyo wa vathi-va.

³⁷Pilato ahimukoha wira: Vano, nyuwo mwa mwene tthiri? Yesu ahimwaakhula iiraka: Ti nyuwo munihimya wira miyo ki mwene. Miyo kiyareliwe y'eyo, nave y'eyo kirweenly'aka vathi-va wira kikhale namoona a ekeekhayi nave ole a ekeekhayi onniiwa masu aka.

³⁸Pilato aahimukoha wira: Ekeekhayi, exeeni? Vaamukohaly'awe siiso aahirowa-tho waari aYuta khwaahimeerya wira: Miyo nkimphwanyanne yoowo etthu yootakhala. Ahimyakaru siiso, Pilato ahikhumela-tho ota, olavulana aYuta, khwaahimeerya wira: ?Miyo nkinimpwanyana mulattu mulopwan'ola.

³⁹Vano nyuwo, okathi wa Paasikha, moolimalela otaphuleliwa mutthu mmosa oottukeliwe. Munnitthuna wira kotaphuleleni mwene a'Yuta?

⁴⁰Vano awo yaahikhuwela-tho, yiiraka: Owo nnaari! Muntaphulele Parapa. Parapa owo aari mulavilavi.