John 17

¹Amalihakaru ohimya itthu iya, Yesu aahiweha wirimu, Khwiira: Tiithi, okathi woophiya! Mmunttittimihe Mwan'inyu, wira Mwan'inyu otiittimiheni-tho nyuwo.

²Siiso sinvahaly'ayu owerya wo waruma atthu othene, wira owo aavahe ekumi ehinimala othene ale anvahaly'anyu.

³Vano, ekumi ehinimala t'ila: Woosuwelani nyuwo, mukhanle Muluku mmosaru a ekeekhayi, n'omusuwela Yesu Kristu, yoowo omurummyanyu.

⁴Miyo kihoottittimihani vathi-va: Koomaliha muteko waakirummyaanyu ovara.

⁵Vano, Tiithi, mukittittimihe vamaithoni vanyu, ninttittimiho nenlo naarin'aka vamosa ni nyuwo olumwenku ohinatthi okhala.

⁶Kihaasuweliha nsina nanyu atthu akivahaly'anyu a vathi-va. Awo yaari awinyu, nyuwo khukivaha, nave awo anneettela masu anyu.

⁷Ni vano aasuwela wira sothene sikivahalyaanyu sinkhuma wa Nyuwo,

⁸Okhala wira miyo kinnalaleerya masu akivahaly'anyu, nave awo annaakhelela yaawo. Vano veekheekhayi annisuwela wira kikhumme wa nyuwo ni annaamini wira nyuwo mookiruma.

⁹Miyo kinaavekelela yaawo. Nkinavekelela atthu a vathi-va: Kinaavekelela ale mukivahalyanyu, okhala wira t'awinyu.

¹⁰Tthiri sothene sirinaka ti sawanyu, ni sothene sirinanyu ti sawaka. Siiso miyo koottittimihiwa mwa yaawo.

¹¹Nto nkinkhala-tho vathi-va, nto awo anookhala nlelo vathi-va, nave miyo kinrwa wa nyuwo. Tiithi ooreera murima mwaakhapelele mwa nsina nanyu yaale akivahaly'anyu wira awo ekhale mmosa-ru ntoko hiyo siry'ahu.

¹²Okathi waaryaka ni yaawo, miyo kihaakhapelela mwa nsina ale akivahalyanyu: Khuuvo orimenle nnakhala mmosa, omuhiya ole aari oorimeeleene, wira simaliheriwe Soolempwa.

¹³Ni vano miyo kinrwa wa nyuwo. Nto kinihimya itthu iya, nlelo kikhalaka vathi-va, wira awo esareye otteeliwa waka murima voolalela.

¹⁴Miyo kihalaleerya masu anyu: Vano atthu a vathi-va ahanyokha, okhala wira kahiyo awaya, siisale miyo kihikhanlyaka awaya.

¹⁵Nkinoovekelani wira mwaakumihe vathi-va, nto wira nwaakiherye mutakhali.

¹⁶Awo kahiyo a vathi-va, siisale miyo kihikhanlyaka a vathi-va.

¹⁷Mwaareerihe veekeekhayi okhala wira masu anyu ekeekhayi.

¹⁸Siisale nyuwo mukirummyanyu orwa vathi-va, ni miyo kihaaruma orowa eriyari y'atthu a vathi-va.

¹⁹Vano, mwaha wa yaawo miyo kiniireeriha wira n'awo ekhale ooreerihiwa veekeekhayi.

²⁰Nkinavekelela awiixutti aka yala paahi: Kinaavekelela-tho ale antthuna okaamini mwaha w'olaleya waya yaala.

²¹Wira othene ekhale mmosaru, ntoko Nyuwo Tiithi muryaanyu mwa miyo, ni miyo kiryaka mwa Nyuwo: Yawo-tho ekhale mmosaru mwa hiyo, wira atthu a vathi-va yaamini wira ti Nyuwo mukirumme.

²²Vano miyo kihaavaha muttitthimiho yoowo okivahalyanyu, wira ekhale mmosaru, siisale hiyo nryaahu mmosaru.

²³Miyo mwa yaawo, Nyuwo mwa miyo, wira yaawo ekhaleke mmosaru voomalela. Wira atthu a vathi-va asuwele wira ti nyuwo mukirumme, ni wira muhaaphenta ntoko sikiphentalyanyu.

²⁴Tiithi kintthuna wira vaavo vary'aka vo ale akivahaly'anyu akhaleke vaavo ni miyo wira yooneke nttittimiho naka nenlo nikivahaly'anyu, okhala wira mookiphenta elapo ya vathi ehinatthi opattuxiwa.

²⁵Tiithi axariya! Atthu a vathi-va khiyoosuwenleni: Nto miyo kihoosuwelani, nave-tho ala aasuwela wira ti Nyuwo mukirumme.

²⁶Miyo kihasuweliha nsina nanyu, ni nelo kinimwaasuweliha, wira niphento nenlo nikiphentann'anyu nikhale mwa yaawo ni miyo kikhale mwa yaawo.