1 Corinthians 9

¹Miyo nkihiyo murummwa? Nkihiyo ootaphuwa? Miyo nkimoonne Yesu Kristu, Pwiy'ahu? Nyuwo khamuhiyo muteko aka wavarenly'aka Apwiya?

²Vakhala wira akina khankikupali miyo okhala murummwa, nto wa nyuwo ka murummwa, okhala wira nyuwo mw'ekanyeryo yoorummwa waka mw'Apwiya.

³Nno ti wiisaakiha waka, waale ankiv'anya.

⁴Hiyo khanrina ehakhi w'olya hata w'owurya?

⁵Hiyo khanrina ehakhi yoomwittana munn'ihu muthiyana, ntoko siniir'aya arummwa akina, n'axinn'aya Apwiya, ni Kefa?

⁶Wala miyo ni Parnapa khanrina exariya y'ohiya ovara muteko?

⁷Ti pani onrowa okhottoni onailiva mwaneene? Ti pani oniphatteya mwiri wa ikhacu, khuhiyalya muhokorokho aya? Wala ti pani onlyiha inama sawe khuhinawurya eleeti y'enam'eyo?

⁸Iya sinihimy'aka nkinittharihela miruku sa mutthu, nave-tho ikano sa Monse khasinihimya siiso?

⁹Maana mulivuruni mwa ikano sa Monse moolempwa wira: ?Muhitthukwe iyawo s'enyompe ennyakela inaku.? Munuupuwela wira Muluku onuukhuwa mwaha wa inyompe?

¹⁰Wala, veekeekhayi khanihimya siiso aniirelaka hiyo? V'ekeekhayi moolumo ala alepeliwe hiyo, wira ole onlima alimeke n'uroromela, n'ule onihepha, ahepheke n'uroromela waakhela epantte ya mihokorokho sihantty'awe.

¹¹Hiyo naalale-ene itthu sa muroohoni mmurimani mwanyu, vanrowa orikarika ohepha mireerelo s'erutthu.

¹²Atthu akina yookhanyereryani waliva muteko woovarenly'ayani, hiyo khantempe ophwanela? Nto hiyo vo ninnivilela sothene wira nihipisihe olaleya Ehapari Yooreera ya Kristu.

¹³Nyuwo khamunsuwela wira ale anvara muteko mpaani mwa Muluku anaakhela yoolya yampaani memmo? Ni wira ale anihela mukuttho yoowo?

¹⁴Nave-tho Apwiya anniruma siiso, wira ale anlaleya Ehapari Yooreera elyeeke muteko yoowo w'Ehapari.

¹⁵Nto miyo nkintthuna olinvwa, hata nkilempe epaphelo ela wira kookhanyereryeni okiliva, maana fataari kikhwe kihiinre siiso, ni khaavo onwerya okhaliha ethiri wiittottopa waka.

¹⁶Okhala wira nkimphwanela wiittottopa mwaha woolaleya Ehapari Yooreera, tthiri owo muteko aka, nave ootakhaliwa ti miyo kaahilaleyeke Ehapar'ila Yooreera.

¹⁸Vano etthuvo aka tiivi? T'ila olaleya mahala Ehapari Yooreera, kikhoottaka waakhela ixariya saka mwaha woolaleya Ehapar'iyo.

¹⁹Miyo ki mutthu ootaphuwa vamaithoni v'atthu othene, ntoko kihiikhaliha epottha y'atthu othene wira kaarowane atthu anci-ene wa Kristu.

²⁰Nave kihiikhaliha ntoko muYuta eriyari y'aYuta wira kaarowane wa Kristu aYuta, eriyari y'ale aneettela ikano sa Monse, kinneettela ikano seiyo, wira kaarowane wa Kristu ale aneettela ikano iyo.

²¹W'ale ahineettela ikano sa Monse, kaakhala ntoko mutthu ohineettela ikano sa Monse nkinihiya weettela ikano sa Muluku, kiiwale wa Kristu ale ahineettela ikano sa Monse.

²²Kihiikhaliha ntoko mutthu oohilipalipa, eriyari y'atthu oohilipalipa, wira kaarowane wa Kristu atthu oohilipalipa, kihiikhaliha makhalelo othene eriyari y'atthu a makhalelo othene wira wa makhalelo yaawo kiwoopole atthu akina.

²³Miyo kinniira siiso mwaha w'Ehapari Yooreera, wira kiphwanele okaweliwa sooreera saya.

²⁴Nyuwo khamunsuwela wira ale antthimakasa mukampu, veekeekhayi othene aya annitthimaka, nto mutthu mmosa paahi kahi tonikuxa etthuvo? Tivo mutthimakeke wira mphwanye etthuvo eyo.

²⁵Mutthu oniilokiherya ovathaana n'akhw'awe onnisuumaliha wa sothene, owo oniira siiso wira aphwanye etthuvo enintta, nto hiyo nintthimakela etthuvo ehinintta.

²⁶Tthiri miyo kinnitthimaka siiso, kahiyo kinttimakela etthu ehinsuwel'aka, kinniwana, nto kahiyo ntoko kimmana epheyo.

²⁷Ohiya vo kinnihaaxa erutthu aka nave kinnikhaliha epottha, wira kamala walaleerya atthu akina, miyo mmansaka kihikhoottiwe.