1 Corinthians 10

¹Vano, axinn'aka nkintthuna wira muliyale, wira asitiith'ihu yaahikhala othene aya vathi va neeku, nave othene yaahilapuwa ephareya.

²Nave othene aya yaahipatisiwa muneekuni ni mphareya, ntoko atthu yaamutthara Monse,

³Othene aya yaahilya yoolya emosaru-ya muroohoni,

⁴nave othene aya yaahiwurya yoowurya emosaru ya muroohoni, maana othene aya yaawurya vanlukuni na muroohoni nenlo naahoola, nave nluku nlo ti Kristu.

⁵Varookhalaru siiso, Muluku khaasiveliwe n'atthu akina anci-ene mwa yaawo, ti vo yaahipweteya moothakoni.

⁶Itthu iya soonikhalela ithoonyeryo, wira nihiphaveleke itthu sootakhala ntoko awo saaphavel'aya.

⁷Muhiikhaliheke alipa anaakokhorela amuluku aethiru, ntoko akina ayawo, ntoko silempwal'aya wira: Atthu yaahikilaathi enalya ni enawurya, numala yaahivenya khukela otthapa.

⁸Niheetteke onamuttompe ntoko atthu akina a yaawo yeett'aya onamuttompe, nto nihiku nimosa paahi yaahikhwa atthu miloko miloko miili ni tthaaru.

⁹Nihimweehereryeke Kristu ntoko atthu akina mwa yawo-tho yaamwaaherenrye khukhwa mwaha w'olummwa n'inowa.

¹⁰Muhaapeke, ntoko atthu akina mwa y'awo-tho yaapa khupwetexiwa nimulipa-oowiiva.

¹¹Itthu iya sothene saahaakhumelela asitiith'ihu ntoko ithoonyeryo nave saahilempwa wira sinilopole, okhala wira omala w'olumwenku onnaattamela.

¹²Itthiri ole onoona wira orimweemela aipasoope wira ahimore.

¹³Weehereriwa oniphwany'anyu, onaaphwanya atthu akina, nto Muluku t'ororomeleya, yoowo ohinihiya mphwanyaka weehereriwe onvikana ikuru sanyu, okathi muneehereriw'anyu nave-tho Muluku onimoovahani oxintta, wira nwerye ovilela.

¹⁴Tivo axinn'aka muhuluweke wakokhorela amuluku aethiru.

¹⁵Kinlavula n'atthu arina ankhili, mulamuleke nyuwo mmansinyu sinihimy'aka.

¹⁶Nto ekoopho ya mareeriho yeeyo ereerinh'ahu, kahiyo waataana w'ephome ya Kristu? Yoolya okawanny'ahu kahiyo waataana w'erutthu ya Kristu?

¹⁷Maana hiyo nrimwaattaru ninkhala yoolya mmosaru n'erutthu emosaru, okhala wira othene ahu ninlya yoolya emosa y'eyo.

¹⁸Mwaaweheke atthu a Isarayeli, muttharihelaka makhalelo aya, nto kahiyo ekeekhayi wira ale anlya mikuttho, annattana n'altaari yaawo?

¹⁹Nto kinihimeryani siiso? Khino muluku aethiru tokhanle etthu? Wala soovaheriwa muluk'uwo ti khanle etthu?

²⁰Ohiya vo, kinihimya wira itthu amalapo sinihel'aya mukuttho, animuhelela Satana khaninvaha Muluku. Nave miyo nkintthuna wira mwaataanane Satana.

²¹Nyuwo khamunwerya owurerya ekoopho y'Apwiya vamosa ni ekoopho ya Satana, khamunwerya olya vamosa n'Apwiya n'ulya vamosa ni Satana.

²²Nintthuna otharamula ehace y'Apwiya? Munoona wira hiyo n'olipexa wavikana Apwiya?

²³Kinniwerya wira sothene, nto kahio wira itthu sothene ti soophwanela, kinniwerya wira sothene nto kahiyo itthu sothene sinincererya waamini.

²⁴Ahikhale omphavela oreeriwa wawe, ohiya vo, khula mutthu aphaveleke sinaaphwanyiha oreeriwa okhw'awe.

²⁵Mulyeeke wa sothene sintumihiwa opasari, muhaanyiheryaka etthu mwaha w'ankhili anyu.

²⁶Okhala wira elapo ni sothene sinkhala memmo ti sawaya Apwiya.

²⁷Akhala mutthu oohaamini oniwiihanelani yoolya, nyuwo khutthuna orowela mulyeke sothene sinooruuhel'aweni muhikohaka etthu mwaha muupuwelo anyu.

²⁸Nto akhala mutthu onoohimeeryani wira yoolya ela amuluku aethiru, muhilyeke, mwaha w'ole ooloponleni ni mwaha muupuwelo awe, okhala wira elapo n'itthu sothene sinkhala memmo ti saawaya Apwiya.

²⁹Nave kinihimya wira muhilyeke mwaha w'annkhili anyu, tthiri otaphuwa waka wookhala w'olamuliwaka mwaha w'ankhili a mutthu mukina?

³⁰Miyo kaaly'aka kimuxukhuruku Muluku, kiniveeheriwa-ni mulattu wa yoolya kinimuxukhurel'aka Muluku?

³¹Tivo mwaaly'aka wala mwaawuryaka, wala mwiiraka etthu p'itthu, mwiireke sothene voomuttittimiha Muluku

³²Mweetteke vooreera muhikhanly'anyu oowatthekiha, akhw'inyu, hata aYuta nnakhala aKresia, hata Ekerexa ya Muluku.

³³Ntoko miyo tho kinnaasiveliha atthu othene mwa sothene, kihiphavelaka oreeriwa waka, nto kimphavela waaphwanyiha oreeriwa atthu othene, wira siiso othene aya yoopowe.