1 Corinthians 11

¹Mukitakiheke miyo, ntoko miyo-tho kinimutakih'aka Kristu.

²Axinn'aka, miyo kinnoottottopelani, okhala wira mwa sothene munnikuupuwela miyo, munneettela ikano, ntoko miyo soolepenly'akani.

³Nto kintthuna wira musuwele wira Kristu ti muru w'atthu othene, nave mulopwana ti muru wa muthiyana, nave Muluku ti muru wa Kristu.

⁴Mulopwana onkhuneela muru awe aavekelaka wala aalaleyaka masu a Muluku, khonttittimiha muru awe.

⁵Nto muthiyana onvekela wala onlaleya masu a Muluku ahikhuneenle muru, khonttittimiha muru awe, okhala wira onkhala ntoko ometthiwe mputu.

⁶Tivo muthiyana ohintthuka muru awe n'eveeru, fataari ametthe mputu. Nto muthiyana vaamuulihaka muru omettha mputu, atthukeke muru awe n'eveewu.

⁷Tthiri mulopwana ahitthukeke muru awe, okhala wira owo onlattana ni Muluku nave nttittimiho na Muluku.

⁸Okhala wira mulopwana khakhumme wa muthiyana nto muthiyana t'okumihiwe wa mulopwana.

⁹Nave-tho mulopwana khopattuxeriwe muthiyana, nto muthiyana topattuxeriwe mulopwana.

¹⁰Tivo muthiyana vakhanly'awe oowaraka mmuru mwawe ethoonyeryo y'owiiwelela wawe, mwaha w'ankelo.

¹¹Ohiya vo, ohoolo w'Apwia mulopwana khankhala ahikhanle muthiyana, hata muthiyana ahikhanle mulopwana.

¹²Tthiri, ntoko muthiyana okumihiw'awe mwa mulopwana, siiso-tho mulopwana oniyariwa wa muthiyana, siiso oowanli aya anikhuma wa Muluku.

¹³Mutthokelele nyuwo axineene wira: Vannireerela muthiyana onvekelaka Muluku ahitthunke muru?

¹⁴Wala ephattu ahu khennixuttiha wira kahiyo yoottittimiheya mulopwana ookhalana ikharari soorekama mmuru mwawe?

¹⁵Vano muthiyana ookhalana ikharari soorekama-sa, etthu yoottittimiheya, maana muthiyana ovaheriwe ikharari iyo wira siranttelihe eveewu.

¹⁶Nto akhala mutthu ontthuna okivaanyiha, asuweleke wira hiyo khanlimalenle siiso, hata ikerexa sa Muluku khilimalenle.

¹⁷Vano moolumo antthun'aka woohimeeryani nyuwo, miyo nkinoottottopelani, okhala wira kahiyo munthukumanela itthu sooreera, munthukumanela itthu sootakhala.

¹⁸Opacerya wene, kootthokiheriwa wira okathi onthukuman'anyu mukerexa, wookhala okawanyeya eriyari anyu, vakina-vo miyo kinnaamini.

¹⁹Khaavo ontikhina wira vanniphwanelela wira okhale okawanyeya eriyari anyu, nave-tho wira atthu a ekeekhayi esuwenyeye.

²⁰Nto-vano, okathi onthukuman'anyu nipuro nimosa, kahiyo munthukumanela olya yoolya y'Apwiya.

²¹Okhala wira mwaarowaka olya, khula mutthu onnipacerya olya y'oly'awe, nave akhala akina anvoliwa etala, akina anoohapaliwa.

²²Nto nyuwo khamukhalanne itthoko sanyu mukhanly'anyu ooly'aka-mu n'uwurya? Wala munveeha ekerexa ya Muluku, wala munwuulihiha muru alipa oothoiwa? Koohimeenryeni exeeni? Kihaana wottottopelani? Siiso-so nkinoottottopelani.

²³Maana ele kiwiixuttihaly'akani kaakhenle w'Apwiya, enihimya wira: ?Ohiyu y'ole Apwiya Yesu waavarihiw'aya yaahikuxa mukatthe;

²⁴numala omuxukhuru Muluku, yaahikawanya mukatthe owo khuhimya wira: Mukuxeke mukhuureke, ela ti erutthu aka enivahiw'anyu nyuwo, mwiireke iya mukuupuwelaka miyo.?

²⁵Siiso-tho, vaamanly'aya olya, aahikuxa ekoopho khuhimya wira: Ekoopho ela ti Waataana wa Naanaano olipihwe n'iphome aka, imaara sothene muniir'anyu nwureke, mwiireke mukuupuwelaka miyo.

²⁶Tivo okathi wothene muniir'anyu mukhuureke mukatthe ola n'ukathi muniir'anyu nwureryeke ekoopho ela, munlaleya okhwa w'Apwiya, mpakha vanrw'aya.

²⁷Nave-tho ole onkhuura mukatthe ola wala owurerya ekoopho ela y'Apwiya ahiphwanelaka, onnitthekela erutthu n'iphome y'Apwiya.

²⁸Nto khula mutthu apaceryeke okoha murim'awe, numala akhuureke iyo ni awurereryaka ekoopho eyo.

²⁹Okhala wira mutthu onikhuura mukatthe n'uuwurerya ekoopho ahaaminiki, onikhuura ni oniwurya ehukhumu awe.

³⁰Mwaha wookhuuraka n'uwurerya ekoopho ehaaminiki, akhala atthu anci-ene eriyari anyu oohilipa ni ari aretta.

³¹Maana hiyo naapacerya okala murim'ahu, khinaaphukiwa.

³²Nto okathi ninphukiw'ahu, ninnittaruxiwa n'Apwiya wira nihilamuliwe n'atthu a moolumwenkuni.

³³Vano axinn'aka mwaathukumanelaka y'olya y'Apwiya, nwehereryaneke mukina ni mukhw'awe.

³⁴Akhala oovoliwa etala alyeeke owaani, wira Muluku ohoohukhumuni mwaha wa othukumana wanyu. Itthu sikina, kinimoorwa olokiha okathi vanrw'aka.