1 Corinthians 12

¹Axinn'aka nkintthuna wira mutikhihe mwaha wa soovaha sa muroohoni,

²nyuwo moosuwela wira mwaari amalapo, mweettihiwa n'amuluku ahinlavula, mwiira sothene saatthun'aya.

³Nto vano, kimphavela woosuwelihani wira, khaavo onlavula n'uwerya wa Erooho ya Muluku khuyahimya wira: Yesu atakhalihiwe; nave khaavo oniwerya ohimya wira: ?Yesu ti Pwiya.? Ahuupuxeriwe ni Erooho Yooreera.

⁴Vano soovaha sa muroohoni khasinlikana, nto Erooho ti emosaru.

⁵Nave orumeela khunlikana nto Pwiya ti mmosaru nimmurumeel'ahu

⁶Miteko khasinlikana, nto Muluku ti mmosaru yoowo onikawa miteko sothene mw'atthu othene.

⁷Nto khula mutthu onnivahiwa woniherya Erooho Yooreera wira atthu ereerihiwe.

⁸Okhala wira Erooho enninvaha mutthu mmosa olavula n'ankhili, na mutthu mukina mwa Erooho y'eyo emosaru ennivahiwa olavula n'usuwela,

⁹mutthu mukina, mwa Erooho y'eyo emosaru, onnivahiwa waamini, nave mutthu mukina mwa Munepa yoowo mmosaru, onnivahiwa soovaha soowavoniha aretta,

¹⁰nave mutthu mukina onnivahiwa opaka sootikiniha, nave mutthu mukina olaleya Masu a Muluku, mukina onnivahiwa yoovaha yoosuwela minepa s'amuluku aethiro, nave mutthu mukina onnivahiwa olavula malavulelo manci-ene, nave mutthu mukina onnivahiwa otaphulela malavulelo.

¹¹Itthu iya sothene siniiriwa ni Erooho y'eyo emosa-ru, yoowo onikawa sothene, omukawelaka khula mutthu ntoko sintthun'aya.

¹²Ntoko erutthu siry'aya emosa-ru enamwi ekhalanne-ene mipantte sinci-ene, ni mipantte sothene sa mweerutthuni sikhanle-ru sinci-ene, sinkhala erutthu emosa paahi, siiso-tho ti Kristu.

¹³Tthiri othene ahu noopatisiwa mwa Erooho emosa-ru n'upeyaka erutthu emosa, muYuta, hata muKresiya, wala epottha, hata ootaphuliwa, nto othene ahu niwurerihiwe Erooho emosa-ru.

¹⁴Siiso-tho erutthu khiyuupiwe n'epantte emosa paahi, yuupiwe ni mipantte sinci-ene.

¹⁵Nnawu nahimya wira: Xeeni kihikhalaka ntata, miyo nkikhanle varutthuni, hata nihimyaka siiso nnawu nlo nnoohiya okhala varutthuni?

¹⁶Nave niyaru nahimya wira: Xeeni kihikhalaka niitho, nkihiyo a varutthuni, niyaru nlo hata nihimyaka siiso ninnihiya okhala varutthuni?

¹⁷Erutthu yothene yaari niitho, niyaru naarowa okhala vaavi? Erutthu yothene yaari niyaru, ephula yaarowa okhala vaavi?

¹⁸Vano Muluku oohela mipantte iyo mwerutthuni, ohelaka khula epantte ntoko sitthunny'awe.

¹⁹Nto sothene saari mpantte mmosa paahi w'erutthu, erutthu yaarowa okhala vaavi?

²⁰Tthiri vano sookhala mipantte sinci-ene s'erutthu nave erutthu eri emosa paahi.

²¹Nave maitho khaninwerya ohimeerya ntata wira: Khinnoophavelani nyuwo; nnakhala-tho muru khunwerya ohimeerya inawu wira: ?Nkinoophavelani nyuwo.?

²²Vano nto, mipantte s'erutthu sinooniwa okhala sootteettheyaxa, seiyo ti soophaveleyaxa.

²³Nave seiyo sinuupuwel'ahu okhala soohittittimiheya mw'erutthuni ti seiyo ninttittimih'ahu vanci-ene, nave-tho iye mwa hiyo siri soohireera, ninnittittimiha vanci-ene.

²⁴Nto mipantte sooreera s'erutthu ahu khasimphavela eyo, nto Muluku uupale siiso erutthu avahaka nttittimiho ninci-ene ele yahaattittimihiwa.

²⁵Wira ohikhale okawanyeya mw'erutthuni, nto vano wira mipantte s'erutthu sithokoreryaneke voolikana ikina n'ikhw'aya.

²⁶Siiso, epantte emosa y'erutthu yaahaawaka, mipantte sothene sinnihaawa ni y'eyo, nave epantte emosa y'erutthu yaattittimihiwaka, mipantte sothene sinnitteeliwa murima ni y'eyo.

²⁷Tthiri, nyuwo mwa erutthu ya Kristu ni khula mutthu, ipantte s'erutthu y'eyo.

²⁸Nave Muluku akina ohaathanla mukerexa woopaceryani arummwa, va neenli maprofeta, va neeraru alipa-oowiixuttiha, voottharelana ale avahiwe wira sootikiniha, numala ale avahiwe wavoniha aretta, ale avahiwe wakhaliherya atthu, akina avahiwe olamulela, ale avahiwe olavula ilavulelo sootikiniha.

²⁹Nto othene arummwa? Wala othene maprofeta? Othene alipa-oowiixuttiha? Wala alipa anipaka sootikiniha?

³⁰Othene aakhalana yoovaha yoowavoniha aretta? Othene annilavula ilavulelo sootikiniha? Wala othene annitaphulela malavulelo?

³¹Vano, mulipiheryeke ophavela soovahiwa sooreeraxa. Nave-tho miyo kinrowa wothoonyeryani ephiro yootepaxa oreera.