1 John 4

¹Anoophentaakani, muhikupaliki irooho soothene, nto mutokoseke khula munepa wira musuwele wakhala wira irooho iyo sinrwa wa Muluku; maana maprofeta manci-ene oowootha aamwareela mulaponi.

²Siiso musuweleke Erooho ya Muluku: Erooho ya Muluku t'ile enihimya wira Yesu Kristu ohiikhaliha mutthu.

³Nto khula erooho ehinihimya wira Yesu Kristu ohiikhaliha mutthu, eyo khuhiyo erooho enrwa wa Muluku; eyo erooho enrwa wa nwanani a kristu, yoowo mwiiwaly'anyu wira onimoorwa, nto vano ohoorwa mulaponi-mu.

⁴An'aka, nyuwo mw'atthu a Muluku, ni muhaawerya awanani a Kristu; maana ekhulupale t'ile eri mwa nyuwo, ovikana ele eri mulaponi-mu.

⁵Awo atthu a vathi va. Tivo vanlavulaya itthu sa vathi-va, nto atthu avathi-va anawiiwelela.

⁶Nto hiyo n'atthu a Muluku; ole onimusuwela Muluku onniniiwelela. Tivo vanweryaahu osuwela Erooho y'Ekekhayi ni erooho woowootha.

⁷Anoophentakani, niphentaneke mukina ni mukhw'awe, maana mphento ti wa Muluku, ni wa khula mutthu oniphenta, owo oyariwe ni Muluku ni-tho onnimusuwela Muluku.

⁸Ole ohiniphenta, khanimusuwela Muluku, maana Muluku Ophenta.

⁹Nto mphenta wa Muluku onoonihery'awe t'ula: Owo omuruma Mwan'awe mmosa-ene orwa vathi-va wira hiyo nikhalane ekumi mwa Yoowo.

¹⁰Nave ophenta ti nno: Khanihiyo hiyo nimphentale Muluku, nto Owo t'oniphentale hiyo, khunvahererya mwan'awe ntoko mukuttho wooliverya itampi sahu.

¹¹Anoophentakani, siiso Muluku siniphentaly'awe nto hiyo-tho nihaana ophentana mukina ni mukhw'awe.

¹²Nnakhala khaavo otonko omoona Muluku; nto naaphentanaka mukina ni mukhw'awe, Muluku onkhala mwa hiyo, nave ophenta wa Muluku ti woomalela mwa hiyo.

¹³Ni yeeyo tinnisuweliha wira hiyo ninkhala mwa yoowo, nave owo mwa hiyo, ti vo owo oonivaha Erooho awe.

¹⁴Nto hiyo nihoona, ni nanamoona wira Atiithi amuruma Mwan'aya orwa oowoopola atthu a elapo ya vathi.

¹⁵Ole onaamini wira Yesu Mwaana a Muluku, Muluku ori ni yoowo, nave owo ori ni Muluku.

¹⁶Nto hiyo noosuwela, ni ninnamini ophenta; ole oneetta n'uphenta onikhala mwa Muluku, nave Muluku mwa yoowo.

¹⁷Ti vaavo ophenta vanimaliheriw'aya mwa hiyo, wira nihiku noolamuliwa nikhalane nroromelo, okhala wira makhalelo ahu vathi-va anlikana ni makhalelo a Kristu.

¹⁸Nto ole omphenta khanoova, maana ophenta woomalela onnoomola woova, okhala wira ole onoova, ohukhummwa. Nave ole onoova khamphenta vomalela.

¹⁹Nto hiyo ninnimphenta owo, okhala wira owo t'opacenrye oniphenta.

²⁰Vano akhala mutthu onihimya wira: Miyo kinniphenta Muluku, nave amunanarihaka munn'awe, owo nawoothe. Tthiri ole ohinimphenta munn'awe, onimoon'awe, owo onwerya sayi omphenta Muluku, yoowo ohimoonaly'awe?

²¹Siiso mwa yoowo nihaana yooruma ela enihimya wira: Ole onimphenta Muluku, amphenteke munn'awe.