1 John 3

¹Mooneke ophenta wuulupale onnivahaawe Muluku Tiithi, wira niihaniweke aana a Muluku. Tivo atthu a vathi-va khaninsuwela hiyo, okhala wira khanimusuwela Muluku.

²Nyuwo oophentiwa, vano hiyo n'ana a Muluku; nto nlelo khinooneya enamuna enrow'ahu okhala. Noosuwela wira vanrow'awe wiisooniha makhalelo awe, ninrowa olikana ni yoowo, maana ninrowa omoona ntoko siry'awe.

³Ni ole okhalanne muroromelo ola, oniireriha mmansawe, ntoko owo ory'awe oreera.

⁴Ole oniira etampi, oniira yootakhala, maana etampi, ti yootakhala.

⁵Nto nyuwo moosuwela wira Yesu Kristu ohoorwa mulaponi-mu wira akumihe itampi sahu, nave mwa yoowo khiivo etampi.

⁶Siiso-tho ole onkhala mwa yoowo, khaniira etampi; ole oniira etampi khamoonne, nnakhala khamusuwenle yoowo.

⁷An'aka, muhihiye mootothiwaka ni mutthu. Mutthu oneettela exariya ti naxariya, ntoko owo oryawe naxariya.

⁸Ole oniira etampi ta Satana, maana Satana natampi okhuma woopaceryani. Tivo varwiyaawe Mwaana a Muluku, wira apwetexe miteko sa Satana.

⁹Ole oyariwe ni Muluku, khaniira etampi maana makhalelo awe ari mwa yoowo, nnakhala khaniira itampi, okhala wira owo oyariwe ni Muluku.

¹⁰Nto ennisuweliha okhala aana a Muluku wala ohikhala aana a Muluku t'ila: Ale ahinvara miteko sa xariya, wala ahinaaphenta akhw'aya, awo kahiyo aana a Muluku.

¹¹Maana ola t'ukhanle muhupi wiiwalyaanyu okhuma woopaceryani wira niphentaneke mukina ni mukhw'awe.

¹²Nihikhaleke ntoko kayini, yoowo aari mutthu amutakhali. Tivo vamwivaly'awe muhima'awe. Nto owo aamwivenleni? Aamwiivenle okhala wira miteko sawe saari sootakhala; nave miteko sa muhim'awe saari sooreera.

¹³Axinn'aka, atthu a vathi-va yoonyokhakani, nyuwo muhitikhine.

¹⁴Hiyo noosuwela wira noovira mookhwaani, khukela mwekumini, okhala wira hiyo ninnaaphenta akhw'ihu. Ole ohinaaphenta akhw'awe, nlelo ori mookhwaani.

¹⁵Ole onimunyokha munn'awe, nawiive nave-tho nyuwo munnisuwela wira khaavo nawiive onikhalana ekum'iyo ehinimala.

¹⁶Ennisuweliha ophenta t'ila: Kristu oovaha ekumi awe mwaha wa hiyo. Tivo, ni hiyo nihaana ovaha ekumi ahu mwaha w'axinn'ihu.

¹⁷Akhala mutthu orina muhakhu wa vathi va, nto amoonaka munn'awe oothoiwa, khuumiha murim'awe, khuhinvaha etthu, owo onkhalana sayi ophenta wa Muluku?

¹⁸An'aka, nihimphenteke munn'ihu ni moolumo, wala ni eyano paahi. Nto ophentana wahu okhaleke w'ekeekhayi ni wooneyeke ni miteko sahu.

¹⁹Ti siiso sinsuwel'ahu wira n'atthu a ekeekhayi, nave siiso-tho mirima sahu sinookhurunuwa vamaithoni va Muluku.

²⁰Nto nisuwelaka wira mirima sahu sinnilamula, nto Muluku ti muulupale ovikana mirima s'ahu ni owo onnisuwela itthu sothene.

²¹Anoophentaakani, vakhala wira mirima s'ahu khasinnilamula, nookhalana nroromelo ohoolo wa Muluku.

²²Nto owo onoonivaha etthu p'itthu enrow'ahu onvekela, maana ninniweha sooruma s'awe, niiraka vamaithoni vawe iye sinimusivela.

²³Nto yooruma ya Muluku t'ila: Naamini nsina na Yesu Kristu, Mwan'awe, ni wira niphentaneke, mukina ni mukhw'awe, ntoko sirummyaawe.

²⁴Ole oneettela sooruma sawe, onkhala mwa yoowo, nave Muluku onikhala mwa mutth'uwo. Nto vaavo tininsuwel'ahu wira owo onikhala mwa hiyo; mwaha wa Erooho Yooreera onnivah'awe.