1 John 2

¹An'aka, kinoolepelani itthu iya wira muhiireke etampi. Nto akhala onttheka, nookhalana mutthu onnaakiha ohoolo wa Muluku Tiithi; ti Yesu Kristu yoowo ori naxariya;

²Owo ti mukuttho w'olivela itampi sahu, ni kahiyo itampi sahu-ru paahi nave-tho itampi s'atthu othene.

³Naattharaka ikano sawe, eyo t'itthu enooniherya wira ninnimusuwela Muluku.

⁴Vano ole oniira: ?Miyo kinnimusuwela Muluku,? nto ahiiwelelaka ikano sawe, mutth'uwo nawoothe, ni ekekhayi khinkhala mwa yoowo.

⁵Nave ole oniiwelela masu a Muluku, ophenta wa Muluku ori mwa Yoowo vekekhayi ni ti woomalela. Siiso hiyo ti vansuwelahu wira nri mwa Yoowo.

⁶Ole oniira wira ninkhala mwa Yoowo, nave-tho ohaana weetta ntoko owo seettaly'awe.

⁷Asinn'aka, miyo nkinoolepelani yooruma ya naanaano. Nto yooruma ya khalayi, yeeyo yiiwaly'anyu okhuma woopaceryani Yoruma eyo khalayi ti nsu nipacenry'anyu khalayi wiiwa.

⁸Kinnoolepelani-tho yoruma ya naanaano, eri yeekeekhayi mwa yoowo ni mwa nyuwo, okhala wira epiphi ennivira, nto vano muthuko w'ekeekhayi onnimwaleela.

⁹Ole oniira ori mmuthukoni, nto kiyamunyokha munn'awe, mutth'uwo nlelo onkhala mweepiphini.

¹⁰Ole onimphenta munn'awe onikhala mmuthukoni, mwa yoowo khiivo etthu enimunanariha.

¹¹Nto ole onimunyokha munn'awe, owo onikhala mweepiphini, ni oneetta mweepiphini, ahisuwelaka onkel'awe, okhala wira epiphi yooriipiha maitho awe.

¹²An'aka, kinoolepelani nyuwo maana wa nsina nawe, mooleveleliwa itampi s'anyu.

¹³Kinoolepelani nyuwo, alipa-ooyara, maana nyuwo munnimusuwela ole onkhala, okhuma woopaceryani. Kinoolepelani nyuwo amiravo, maana nyuwo monwerya mutakhali.

¹⁴Kinoolepelani nyuwo an'aka, okhala wira nyuwo munnasuwela Atiithi. Kinoolepelani nyuwo alipa-ooyara, maana nyuwo munnimusuwela ole onkhala okhuma woopaceryani. Kihoolepelani nyuwo amiravo, maana nyuwo moolipa. Nsu na Muluku ninkhala mwa nyuwo. Nyuwo moonwerya mutakhali.

¹⁵Muhiphenteke olumwenku. Nnakhala itthu siri moolumwenkuni. Akhala mutthu omphenta olumwenku, mphento w'Atiithi khukhanle mwa yoowo.

¹⁶Maana itthu sothene siri mulaponi: Ntoko ophavela itthu s'erutthu, ophavela okhalana sothene sinoon'ahu, wisoona, sothene iya kahiyo itthu s'Atiithi, iya sinikhuma wa makhalelo ootakhala mulaponi.

¹⁷Olumwenku onoomala, makhalelo ootakhala anoomala vamosa n'itthu simphavelexaya; nto ole oneettela otthuna wa Muluku onookhala mahiku othene.

¹⁸An'aka, ola t'ukathi wookiserya, ntoko siiwaly'anyu wira anookhumelela awanani a Kristu, nto vano aakhumelela awanani anci-ene a Kristu; ti vo, vansuwel'ahu wira okathi wookiserya woophiya.

¹⁹Awo akhumale munlokoni mw'ahu, nto khiyaahiyo awihu. Maana yaari awihu, yaatthuna okhalaka ni hiyo. Tivo, vansuwanyeyaya wira awo kahiyo awihu othene.

²⁰Nto nyuwo muhaakhela Erooho Yooreera, ti vo nyuwo othene munnisuwela ekeekhayi.

²¹Miyo nkoolepenleni wira khamunsuwela ekekhayi ni-tho okhala wira wootha khunrwa mw'ekeekhayini.

²²Nto nawoothe t'ani? Nawoothe t'ule onikhootta wira Yesu Moopoli. Yoowo t'ukhanle nwanani a Kristu; owo onnimukhootta Muluku Tiithi, vamosa ni Mwaana.

²³Tthiri ole ohinimukupali Mwaana, nave-tho khankhala Tiithi. Nto ole onimukupali Mwaana, nave-tho onnikhala n'Atiithi.

²⁴Vano-nto Ehapari yiiwalyanyu okhuma woopaceryani, ekhale ni nyuwo yeeyo yiiwaly'anyu okhuma woopaceryani, yaakhala mmurimani mw'anyu, ni nyuwo-tho munookhala mwa Mwaana ni mwa'Atiithi.

²⁵Ola ti natiri owo anroromelinh'awe: Ekumi ehinimala.

²⁶Miyo koolepenleni itthu iya mwaha w'ale aniwootothani;

²⁷Nto Erooho Yooreera ovahiw'anyu ni yoowo okhale mwa nyuwo, ti vo muhiphaveleke wira mwiixuttihiwe ni mutthu; maana Erooho Yooreera onniwixuttihani itthu sothene, oniwixuttihani ekekhayi ni khunootha. Siiso mukhaleke mwa Kristu ntoko siwixuttihalyaweni.

²⁸Nto an'aka, mukhaleke mwa Kristu, wira nihiku ninrw'awe, mukhalane nroromelo, ni wira muhuulihiliwe muru nihiku nenlo.

²⁹Nyuwo moosuwela wira owo naxariya; ti vo musuweleke-tho wira othene ale anvara miteko sa xariya, awo aana a Muluku.