1 John 1

¹Nsu n'Ekumi naakhanle woopaceryani, hiyo nihiiwa nenlo, nihoona ni maitho ahu ala, ayo nihoona ni noovara ni matat'ahu ala nsu nnlo n'Ekumi

²Maana Ekumi ehiisooniherya, nave hiyo nihoona, ninnikhalela onamoona, ninnilaleerya Ekumi ehinimala, yeeyo yaari ni Muluku, vano ehisooneiha wa hiyo.

³Ele yoonaly'ahu ni yiiwaly'ahu, eyo hiyo ti noolaleeryaahuni wira ni nyuwo-tho mwaataane ni hiyo; nave waataana w'ahu nno waataana ni Muluku, vamosa ni Mwaan'awe, Yesu Kristu.

⁴Nto ninnoolepelani itthu iya, wira otteeliwa wahu murima omalele.

⁵Nto ela Ehapari emwiiwaly'ahu yoowo, vano enoolaleeryaahuni nyuwo t'ila wira: Muluku muthuko, ni Mwa Muluku khivo epiphi nnakhala vakhaani.

⁶Naahimyaka wira hiyo ninnataana ni yoowo, nto khuneetta mweepiphini, hiyo nnimootha ni khanneettela ekeekhayi.

⁷Nave neettaka mmuthukoni, ntoko owo siry'awe mmuthukoni, hiyo nnookhalana waataana mukina ni mukhw'awe, nto ephome ya Yesu Kristu, Mwaana a Muluku, enoonireeriha, enoonirapiha itampi sahu sothene.

⁸Nahimya wira hiyo khanrina etampi nnisoototha mmansihu nave ekeekhayi khikhanle ni hiyo.

⁹Nto naahimyakaru itampi sahu, Owo t'oororomelya ni naxariya, onoonlevelela itampi sahu ni onoonirapiha wa sootakhala sothene.

¹⁰Nave nahimyaka wira hiyo khanrina etampi, ninnihimya wira Muluku nawoothe, nto Nsu n'awe khanikhanle mwa hiyo.