2 Peter 3

¹Oophentiw'aka vano kinnoolepelani epaphelo ya nenli, mwa soopiil'iya kinoovenxani ni ntumereryo itthu siixuttihiw'anyu;

²wira nyuwo muupuwele moolumo mwaahimeeriw'anyu opacerya wene ni maprofeta a Muluku ni sooruma sa Apwiya ni Moopoli ahu siixuttihiw'anyu n'arummwa,

³opacerya wene musuwele wira: Mahiku ookiserya animoorwa atthu ooveeha, yeettaka ntoko sinruma soosivela s'erutthu aya;

⁴nto ehimyaka wira: Ole aahimmye wira onimoorwa ori vai? Okhala wira axitiith'ihu vakhwaaly'aya itthu sothene siri ntoko saary'aya ekhumelo ya woopaceryani w'olumwenku.

⁵Awo annitikhina mwayiini: Wira khalayi Muluku aahilavula khukhumelela erimu ni elapo ya vathi, yeeyo yaakumihiwe mmaasini nto khutikitheriwa eriyari va maasi vaavo vanikhal'aya.

⁶Wa seiyo elapo ya khalayi yaapwetexiw'aya ekhuneeliwaka ni maasi a mutaaseke.

⁷Vano erimu ya vano n'ilapo ya vano nsu nimosaru sookhapeleliwa ntoko muhakhu, nave soosukeriwa wira ipahiwe ni mooro nihiku ninrow'aya ophukiwa n'upwetexiwa atthu ootakhala murima.

⁸Vano oophentiw'aka, muhitikhine etthu emosa: Wira nihiku nimosa ohoolo w'Apwiya, nnoolikana n'iyaakha imiya muloko, nave iyaakha imiya muloko inoolikana nnihiku nimosa.

⁹Apwiya khanipisa wira ele elakenly'aya, nnaamwi akina ehimyaka wira awo annipisa; nto animovilelani maana khantthuna wira mutthu apweteya nnakhala mano mmosa, antthunexa wira atthu othene erukunuxe murima.

¹⁰Vano nihiku n'Apwiya ninrowa ophiya voohilaiha ntoko nawiiye ohiyu; vaavo erimu enoolakaseya ni oruma woowoopiha, ni itthu sa wirimu sinoopwetexiwa ni mooro; elapo n'itthu sothene sirimuumu sinoopahiwa.

¹¹Vaavo-tho itthu sothene sinrow'aya olakaseya nto nyuwo munrowa okhala ntoko pani? Mw'atthu ooreera murima ni omwiiwelela Muluku.

¹²Nwehereryaka nihiku n'Apwiya mwaakuvihaka orwa w'aya. Nihiku nenlo erimu enrow'aya ovya n'utothowa: Itthu sa vathi sinrowa ototoxiwa ni mooro?

¹³Nto hiyo ntoko Muluku sinroromelihaly'awe, ninniwehererya erimu esya ni elapo esya, ery'aya-mo exariya.

¹⁴Tivo, oophentiw'aka mulipelelaka wiiraneya wa itthu iya sothene mphaveleke wira muhina mwa seiyo mphwanyaneyeke muhiinre y'onanara nnakhala mano emosa muri mmuretteleni;

¹⁵Nave mukhalane woopowa muhina moovilela w'Apwiya, ntoko-tho Paulo munn'ihu oophenteya soolepenly'aweni, avahiwaka ankhili ni Muluku.

¹⁶Ipaphelo s'awe sothene sinihimya itthu seiyo, Mpapheloni-mmo aakhalamo moolumo makina oorika osuwela, vano atthu ahinsuwela saana ni oolosowela waamini annipahula moolumo awo ntoko simpahul'aya-tho soolempwa sikina siiso mwiirelo woowiipwetexa mmansaya.

¹⁷Vano nto, nyuwo, mpatthani aka, moolopoliwa vahinatthi, mwiipasoopeke wira muhikuxiwe n'uvonya w'atthu ootakhala murima, muhivukule nlipiheryo noowaamini w'anyu;

¹⁸Vahinatthi, muncereryeye mmahalani ni omusuwela Pwiy'ahu ni Moopoli ahu, Yesu Kristu. Owo avahiweke nttittimiho vano ni mahiku othene! Amen!