2 Peter 2

¹Khalayi yaahikhala variyari v'atthu maprofeta oowootha, ntoko-tho vanrow'aya okhala variyari v'anyu, awiixuttihi a ikano oowootha, anrowa oruuha voowoototha soowiixuttiha sinivirikanya exariya sinruuha opweteya. Awo anoomukhootta Mwiixuttihi owooponle nave siiso animwiiruuhela mmansaya opweteya weiwo onaakuva orwa.

²Atthu anci-ene anootthara iphiro soonanara. Mwaha wa yaawo, ephiro y'ekeekhayi enoothanyiwa.

³Nave ni milili awo anoowiiyeryani ni moolumo oowootha nto okhuma khalayi, ehukhumu aya yoolikana, opweteya w'aya onnaalipelela.

⁴Maana opuro Muluku ohaalevelenly'awe ankelo yaatthenke, nto ohaarihelasa omooroni weiwo otthukeliw'aya mweepiphini, esukeriwaka nihiku noolamuliwa

⁵Muluku, khaalevelenle-tho atthu a khalayi, nto aahaarupihela epula ya mutaaseke atthu awo othene ootakhala murima, amoopolaka Noowe paahi, yoowo aalaleya exariya, vamosa n'amusi awe athanu n'anli.

⁶Nave aahirumihela ihukhumu mittetthe sa oSotoma ni oKomora opahiwa ni mooro, siiso aahaathoonyerya alipa oottheka itthu saarow'aya wiirihiwa.

⁷Vano aahimoopola Loti, aari naxariya aavela-velihiwe mwaha wa makhalelo ootakhala atthu yaale yiir'aya.

⁸(Maana naxariy'owo, akhala eriyari aya, aanoona aaniiwa nihiku-ti-nihiku itthu soonanara siir'aya);

⁹Ti siiso Muluku onwery'awe owaakiherya sootakhala atthu ooreera murima, ni waasukerya ale ootakhala ehukhumu ya nihiku n'olamuliwa.

¹⁰Vanci-enexa ale antthara makhalelo a erutthu, antthara soosivela s'erutthu ni ahiniwiiwelela makhulupale. Owiikuxererya, oowisoona, atthu awo khanoova waveeha ankelo.

¹¹Khuniira ankelo, hata erina ikuru n'uwerya khanlavula eveehaka nihiku noolamuliwa vamaithoni v'Apwiya.

¹²Vano awiixuttihi oowootha ala, ari ntoko inama ihinuupuwela, antotholeliwa ovarihiwa mmiraakhoni ni wiiviwa, yaruwana ele ehinsuwel'aya awo anoopweteya ni wuntta w'aya.

¹³Yaakhelaka nliveryo nookhootta weettela exariya; tthiri atthu awo waasivela wiitthyaala wa nihiku-ti-nihiku, tonanara ni oowuuliha muru anniittottopa ni soowootha s'aya okathi anly'aya vamosa ni nyuwo.

¹⁴Maitho aya aasareya mararuwo, nto itampi khisinaaphweela, yootothaka irooho soolosowa, mirima s'aya ti soonamilili, aana ootakhaliwa;

¹⁵Yaawo ahin'ye ephiro yooreera, khurimeela, ekelaka ephiro yaavinre Palaamu, mwan'awe Posori. Yoowo aasiveliwa n'itthuvo yoowiira sootakhala;

¹⁶nto aahuulihiwa muru mwaha wa soottheka s'awe tthiri mwaaxaana a puuru ohinlavula, alavulaka n'insu na mutthu aahimaliha ololo wa profeta.

¹⁷Awo ari ntoko ihime sihirina maasi ni, meeku anikuxiwa n'ipheyo yaawo Muluku aasukenry'awe oriipela w'epiphi ehinimala.

¹⁸Maana ni moolumo a ethiru ni oololo, annahimeerya itthu soosiveliwa s'erutthu, atthu apacenrye watthyawa ale ahintthara ekeekhayi

¹⁹Annaaroromeliha atthu otaphuwa, khuniira awo mmans'aya enari ipottha sa sootakhala siniir'aya; maana mutthu onikhala epottha w'ele enimulema wira.

²⁰Maana nuukhala yopon'weene mwa itthu sootakhala sa vathi-va, mwaha woomusuwela Pwiya ni Moopoli, Yesu Kristu, okathi antthikel'aya soon'anara makhalelo aaya anootepa onanara ovikana ale oopacerya.

²¹Okhala wira vaamukhala saana yahaasuwenle ephiro y'ekeekhayi, vahikhanle okela ephiro eyo khunahapuwa ehiyaka ikano siixuttihiw'aya;

²²wa enamuna y'ela ehaakhumelela ele enihimmwa mmirukuni mw'ekeekhayi wira: Mwalapwa ootthikela olya marapheyo awe nave ekuluwe erapihiwaka-ru ennitthikela ophirikeya va mattopheni.