2 Peter 1

¹Miyo, Simoni Petru, murumeyi ni murummwa a Yesu Kristu, w'ale nakhenly'ahu vamosa waamini wooreerexa, mwaha w'exariya ya Muluku ahu ni Moopoli, Yesu Kristu.

²Nvahiwe voowaattexa mahala ni murettele, mwaha w'omusuwela w'anyu Muluku, ni Pwiy'ahu Yesu.

³Mwaha woowi owerya w'eMuluku awe oonivaha soothene siluluwanne ni ekumi ni nttittimiho, mwaha wa ikharari sirin'awe ole oniitthanenle nttittimiho ni oreera murima;

⁴Mwa seiyo oonivaha sooreera suulupalexa ni sooreerexa siniroromelihaly'awe, wira mwaha waiseiyo n'vareke muteko wa Muluku, muttharuwaka wira soonanara sinikhumelela mwaha w'osiveliwa n'itthu siri moolumwenkuni,

⁵Nave-tho nyuwo, muttharihelaka miruku s'anyu, muncererye waamini w'anyu n'ureera murima ni oreera murima anooniherya masuwelelo maalupale.

⁶Ni osuwelaxa, wiisiinanela, ni wiisiinanela, ovilela ni ovilela, oreera murima.

⁷Ni oreera murima, waaphenta axinna, ni waaphenta axinna niphento.

⁸Maana mwakhalana sooreera iya soowaatta, sooreera seiya sinimookhaliheryani ovara miteko sooreera, sinoophwanyihani omusuwela Yesu Kristu Pwiy'anyu.

⁹Tthiri ole ohikhalanne sooreera seiyo onlikana ni mutthu ohinoona, oneetta aapapelaka, owo ooliyala wira ootthukuriwa itampi s'awe sa khalayi.

¹⁰Tivo, axinn'aka, mutepeke olipiherya wiihaniwa w'anyu n'uthanliwa w'anyu maana mwiira siiso, khamunipaka-tho sootakhala.

¹¹Siiso-tho munootthuniheriwa vookhweyaxa okela moomweneni ohinimala mwa Apwiy'ahu ni Moopoli ahu Yesu Kristu.

¹²Tivo, nkinihiya wootumereryani mahiku othene, iye siluluwanne ni myaha iya, munaamwi nyuwo musuwelaka, mulipiheriwe mwa ikeekhayi mwaakhenly'anyu naanaano.

¹³Nave kinoona wira kihaana owuupuxeryani ni woottaruxani vaava kiry'aka mukumi.

¹⁴Koosuwela wira muhina mookathi vakhaani nnoophiya nihiku kinrow'aka ohiya erutthu aka ela ntoko-tho nave Pwiy'ahu Yesu Kristu sikihimeeraly'awe.

¹⁵Nave, nto miyo kinrowa ophavela okathi woothene wira kakhwa vale muhale muupuwelaka itthu iya mahiku othene.

¹⁶Maana khinoosuwelin'heni oreera murima ni orwa w'Apwiy'ahu Yesu Kristu, nttharihelaka ihantisi soowaaleliwa; nnya hiyo mmansihu noonale ni maitho ahu ovuwa w'awe wuulupalexa.

¹⁷Maana oovahiwa ni Mukulu Tiithi nttittimiho ni ovuwa, okathi nsu na Muluku muulupalexa naamuhimeery'aya wira: ?Ola Mwan'aka onimphentex'aka, mwa y'ola kinnitteeliwa murima.?

¹⁸Ni hiyo naaiwale nsu nla nikhumaka wirimu, okathi waary'ahu vamosa n'uwo omwaako woowaarya.

¹⁹Siiso aalipihiwa masu a maprofeta ankupal'ihu ni nyuwo munniira saana nwiriyanaka masu awo, okhala wira anlikana ni muthuko onivarela mw'epiphini mpakha oxa ni mpakha nivoroxa ophattuwa mmurimani mw'anyu;

²⁰mpaceryeke osuwela etthu ila wira khaavo oniwerya otaphulela mekh'awe masu a Muluku alempwe.

²¹Maana masu awo khantonko okumihiwa n'utthuna w'atthu nto atthu ale yaalavunle ni nsina na Muluku yeettihiwaka ni Erooho Yooreera.