1 Peter 5

¹W'amakhulupale ari variyari v'anyu, kinnootumereryani miyo nave kikhanle mukhulupale mukhw'inyu vamosa ni yaawo, nnamoona a soohaawa wa Kristu, kikaweliwaka ovuwa wa nttittimiho ninrowa wooniheriwa:

²Mulyihe nikoto na ipwittipwitthi sa Muluku siri variyari v'anyu, mukhapeleleke oratta-ene, voohikhanyereriwa, voowiivahererya w'anyu, wala voohitthuna oliviwa muhina mwa makhalelo ootakhala, nnya ni wiivahererya woomalela;

³Hata muhaalamuleleke mwiikhalihaka vasulu va mukela-mpa wa Muluku, nnya n'weettiheke saana wira etthareke ele eniir'anyu.

⁴Siiso, okathi onrow'awe mwaneene makampusi munrowa otthuveliwa n'ikorowa ohinintta mu nttittimihoni mw'awe.

⁵Siiso-tho nyuwo amiravo, nwiiweleleke axuulupal'inyu oowaamini. Vano kinaahimeerya atthu othene wira musareye wiiyeviha murumeelanaka okhala wira, Muluku onnaakhootta atthu oowiisoona, nave onnaavaha mahala atthu oowiiyeviha.

⁶Waaso nto, mwiiyeviheke tthiri nvilelanaka wa Muluku ooweryaxa wira attittimihiwe okathi onthanlaly'awe.

⁷Muhele mmatatani mw'awe ovela'vela w'anyu woothene okhala wira owo onnookhapelelani.

⁸Mwiisuumaalihe, mwiipasoope, nwanan'inyu Satana onoorukureryani ntoko kharamu onoopa murukulu, amphavelaka omukhuura mutthu.

⁹Mmukhootteke Satan'owo, mulimp'ene moowaaminini, musuwelaka wira soohaawa simosaru sinaaphwanya axinn'inyu a elapo yothene.

¹⁰Nave Muluku orina mahala othene, yoowo owiihanneni mwa Yesu Kristu mwaha wa nttittini-ho n'ave, numala ohaawa vakhaani, owo mmans'awe onimooreerihani, onimookhomaalihani, onimoolipihani, onimookhaliheryani.

¹¹Mwa yoowo ottittimihiwe omwene awe mahiku othene! Amen!

¹²Kikhaliheriwaka ni Silvano, munn'inyu oororomeleya, ntoko sintthokaaka, kihoolepelani ni moolumo vakhaani, kituumereryaka ni wiirela namoona wira oreeriwa weekeekhayi onivahiw'anyu ni Muluku ti nno. Weiwo muniilipih'anyu-no.

¹³AKristu ari oPaPilooni annookhomasani, ni mwan'aka Marku.

¹⁴Mukhomasaneke mukina ni mukhw'awe mooniheryanaka mphento. Murettele okhale ni nyuwo othene muri mwa Kristu Yesu. Amen!