1 Peter 4

¹Tthiri, veekeekhayi Kristu aahinihaawela mweerutthuni mw'awe, nyuwo-tho mwiilipihe ni muupuwelo mmosa-ru yoowo ole ohaan'we mweerutthuni okhoontty'awe khuluwi khumaliha itampi;

²wira okathi woohalenleni wira erutthu anyu nlelo ekhaleke vathi-va, muheetteleke sinasivela atthu oonanara murima, mweetteke ntoko sintthun'awe Muluku.

³Maana vanniphweela wuupuwela wira mooviriha okathi munci-ene muttharaka sootakhala s'atthu ahinaamini, mweettaka enamuttompe, ni wira sintthuna erutthu anyu, makhalelo anyu ootakhala: Ohapaliwa, wiipeliwa, owuryexa, waakokhorela amuluku atthiru yaawo ahikhanle oottittimihiwaka.

⁴Nto awo annitikinihiwa mwaha nyuwo woohitthuka muloko n'awo mmeetteloni mw'aya, ohittharuwa onamuttompe ti vo anooruwan'ayani.

⁵Nto awo Muluku onimwaakumiherya mulattu n'uwo ohanle waalamula atthu akumi n'ale akhwiiye.

⁶Okhala wira tivo ehalaka olaleeriwa Ehapari Yooreera, atthu akumi n'alipa-ookhwa, wira veekeekhayi yaahaana olamuliwa ntoko atthu a erutthu, nave yeetteke ntoko sintthun'awe Muluku muroohoni;

⁷Nto omala wa itthu sothene woophiya. Tivo, mukhalaneke ankhili, mwiisuumaalihake n'ulipelela ni mavekelo.

⁸Ehinatthi khul'etthu mukhaleleke nthiti ophentana. Okhala wira ophentana onnikhuneela itampi, hata saantte-ene;

⁹Mwaakhelanaka mukina ni mukhw'awe, vate v'anyu nave waapana ohikhaleke.

¹⁰Khula mutthu aarumeeleke akhw'awe aakawelaka oreeriwa ovahiw'awe ni Muluku ntoko murumeyi oororomeleya a iparakha soohilikana sa Muluku.

¹¹Akhala mutthu onlavula, alavuleke masu a Muluku; ole oniweettiha akhw'awe aweettiheke ntoko mwa ikuru sivahiw'awe ni Muluku; wira mwa itthu sothene Muluku attittimihiwe mwa Yesu Kristu, yoowo orina nttittimiho n'ikuru, sa mahiku othene. Amen!

¹²Apatthani aka oophentiwa, muhitikinihiwe n'uhaawa onoophwanyani, iwo onlikana ni mooro wa weevalani. Muhuupuwele vano wira etthu ela enookhumelelani ti yotikiniha.

¹³Nto mutteeliweke murima okhala wira mookaweliwa ohaawa wa Yesu Kristu, wira-tho nave vanrow'aya okumiheriwa ovuwa w'awe, nyuwo mutepeke ohakalala n'utteeliwa murima.

¹⁴Mwaaruwaniwaka mwaha wookhala aKristu, mooreeriwa okhala wira erooho yoovuwa wa Muluku eri mwa nyuwo.

¹⁵Ahikhale mwa nyuwo omphwanela ohaawa mwaha wo mwiiva mutthu hata mwaha wo wiiya, nnakhala wo wira sootakhala wala mwaha wo mutuphela nakoso a axineene.

¹⁶Nto, mwaahaawa mwaha wookhala muKristu, muhuuliwe muru, mutepeke omuttittimiha Muluku mwaha wa nsina nla.

¹⁷Maana woophirya okathi woolamuliwa nipaceriwaka hiyo atthu a Muluku, nto napaceriwa olamuliwa hiyo, ankhi entthuna waakhumelela exeeni ale ahinkupale Ehapari Yooreera ya Muluku?

¹⁸Nto woopowa onnaarikela anaxariya, vano antthuna wiirihiwa exeeni atthu ootakhala nan'atampi?

¹⁹Siiso, ale anihaawa ntoko sintthun'awe Muluku etepeke ovara miteko sooreera yiivahereryaka ni murim'aya woothene wa Muluku mpattuxa oororomeleya.