1 Peter 3

¹Siiso, nave nyuwo athiyana, nwiiweleleke; asiyanyu vano vakhala wira aiyanyu khanaamini masu a Muluku, ephwanyihiweke waamini ni mweettelo anyu wooreera, muhilavunle masu.

²Mweettihe makhalelo anyu a nloko n'owoovelela.

³Oreera w'anyu ohikhale wa mweerutthuni, ntoko otthava ikharari n'uwara maniya a eweero n'ikuwo sooreeraxa,

⁴Nto mwiipithiheke oreera w'anyu, musuweleke ni murim'anyu, oreera ohinivira nave-tho okhaleke wa mmunepani, ohiisoona ni wiiyeviha. Nno tukhanle oreera wuulupale onimusivela Muluku;

⁵maana siiso ti saiphap'aya athiyana a khalayi yaamuroromela Muluku, ewiiwelelaka as'iyaya.

⁶Ntoko Sara saamwiiwelel'awe Aparahaamu amwiihanaka Apwiya, yoowo nyuwo mury'anyu an'awe, mwiraka sooreera nave mututhuwaka etthu.

⁷Siiso-tho nyuwo alopwana mukhaleke nniphento n'amwaar'inyu, musuwelaka wira makhalelo a muthiyana t'otteettheya ovikana awinyu. Mmuttittimiheke ntoko vamphwanel'aya, okhala wira onohiyeriwa vamosa ni nyuwo mahala a ekumi. Mwiireke siiso wira ehikhale etthu enohiihani wira mavekelo anyu.

⁸Wuumaliheryani, othene mukhale a murima mmosa, omorelana ikharari, mphentanaka n'axinn'inyu, ni murima woothene, oowoonelana othunku n'usiveliwa.

⁹Muhaalive ni sootakhala ale aniwiirelani sootakhala, hata muhaaruwane ale anooruwanani nto mwaavekeleleke, musuwele wira mwiihaneliwe yeeyo, wira mwaakhelele sooreera sa Muluku.

¹⁰Maana, ole ontthuna ophenta ekumi awe ni woona ni oreeriwa wa mahiku manci-ene akhoottiherye nlumi n'awe olavula soonanara, nave malaku awe ehilavule soowootha.

¹¹Ahuluwe soonanara iireke sooreera: Aphavele murettele eetteleke yoowo;

¹²Maana maitho a Apwiya anaaweha anaxariya nave maaru aya aniwiriyana mavekelo, nave owiitho w'aya annaaviruwela ale aniira sootakhala.

¹³Vano nto t'ani onrowa owiirelani sootakhala mwasuwela ni wira mukhalelo anyu wira sooreera?

¹⁴Nave mwaahaawaka mwaha wooweettela exariya, munooreeriwa. Nto muhiwooveke atthu, hata muhaatuthuwe ni woova w'aya wala muhithukumele.

¹⁵Vahinatthi mmuttittimihe Kristu ntoko Pwiya mmurimani mw'anyu, mukhaleke oolikaneene okathi t'ukathi wira mwakhule saana ni wiiyeviha ni woova, wa khula onrowa wookohani ehakhi y'olipelela ori mwa nyuwo.

¹⁶Miyo kookhalano muupuwelo ooreera ni a nttittimiho wira mwakhalana murima wooloka wira ale anaapa mweettelo anyu wooreera mwa Kristu yuuliwe muru mwaha woowootheryani

¹⁷Maana fataari ohaawa mwiiraka sooreera, vakhala wira entthun'awe Muluku ti yeeyo, ohikhanle ohaawaka mwaha woowiira sootakhala;

¹⁸Maana, nave-tho, Kristu aahihaawa omosa paahi mwaha wa itampi. Owo ari naxariya khwaakhwela alipa-oottheka iirelaka waaroiha wa Muluku. Khukhwa v'ekeekhayi ntoko mutthu nto akhalihiwa-tho muukumini n'utthuna wa erooho.

¹⁹Okathi uwo aahirowa-tho olaleerya minepa saatthukeliwe mukhatteya.

²⁰Eyo p'iyo, minepa s'atthu a khalayi yahaamwiiwelenle Muluku okathi waaweherery'awe n'uvilela, Noowa atekaka ekalawa. Atthu vakhaani, athanu n'araru paahi yaahikela mukalawani mmo khoopoliwa mmaasini,

²¹maasi ala ethoonyeryo y'opatiso weiwo vano oniwoopolani. Opatiso kahiyo orapihiwa w'erutthu paahi, onikhala wiivahererya wa Muluku ni murima wooloka. Opatiso onniwoopolani mwaha woohihimuwa wa Yesu Kristu mookhwaani

²²Yole owenle wirimu vano onikhala moono woolopwana wa Muluku. Wirimu weiwo Yesu onaarumawe ankeko aalupale ni owerya wothene.