1 Peter 2

¹Muhin'ye-ene, tthiri sootakhala sothene ni woototha wothene ni woothererya ni nrima, ni waapa wothene,

²mphaveleke okhala ntoko axinamwane ayariwe naanaano, eleeti yooreerexa, yoohitakanihiwa n'itthu ekina, wira n'iyeeyo, nvire munnuwaka,

³mwiira mulawin'he-ene oreera w'aya murima Apwiya;

⁴Nave mmwaattamele yoowo ori nluku ni ekumi, nenlo v'ekeekhayi, nahooneliwa vatthu, n'atthu, nto nthanliwe ni Muluku okhala wira ti noorikexa,

⁵ni nyuwo-tho, nave vakhanly'anyu maluku makumi, mootekeliwa empa ya erooho ya nloko na anamukuttho ooreera murima wira muhele mukuttho wa munepa onrowa omusivela Muluku mwaha wa Yesu Kristu.

⁶Tivo, vansommw'aya mwa sooolempwa wira: Koothanla nluku noowaarya kitekele emp'aka osiyoni nri nluku ninlipiha empa. Ale anroromela nenlo, khanootothiwa.

⁷Nave siiso, nto variyari v'anyu nyuwo munaamini, ti nooreeraxa, vano w'ale ahinaamini esuweleke wira: Nluku alipa-ooteka naarihaly'aya, nookhalihiwa nluku ninlipiha empa yothene,

⁸Nave, ?ekwathula enkwathuliha ni nluku nuulupale nnamoroxa atthu.? Vano ale ahinaamini annikwattuliwa ni nenlo okhala wira awo khayiiwelenle Ehapari Yooreera wa y'ale athanleliwe.

⁹Nto nyuwo mwa nloko noothanliwa, nloko n'omwene, nloko nthummwe mulaleerye ekeekhayi y'ole owiitthanneni mw'epiphini mwaary'anyu wira mukhale moowaarya mw'awe mootikiniha.

¹⁰Nyuwo khalayi mwahaakhanle nloko na Muluku, nto vano mwa nloko na Muluku, khimwaamoreliwa ikharari nto vano moomoreliwa ikharari.

¹¹Oophentiwa, kinnoovekelani nyuwo muri aletto n'anamurwa vathi-va, kootumereryakani wira mwiinaneleke soosivela s'erutthu, seiyo sinivirikanya makhalelo ooreera.

¹²Mweettelo anyu okhanle-ene wooreera eriyari y'atthu ahikhanle aKristu, wira okathi aniwoothery'ayani wira mwaatakhali emwaleeliwe ni miteko s'anyu sooreera aniwoonan'ayani.

¹³Waaso, tthiri mwiiweleleke malamulo a mamwene a vathi-va, mwaha w'Apwiya hata akhale mwene nnakhala mukhulupale oneettiha elapo anyu,

¹⁴hata makuvernatori nnakhala arumeyi awe wira yaavaheke ihukhumu alavi-lavi nave yaavuwiheke ale aniira sooreera.

¹⁵Maana nno tukhanle otthuna wa Muluku, wira ale aniira sooreera, yaaphureke iyano ohisuwela w'atthu aneettiha olavi-lavi,

¹⁶Ntoko atthu ootaphuwa, nave muhikhalanne otaphuwa wookhuneela sootakhala, nave muri-ene ntoko arumeyi a Muluku.

¹⁷Mwaattittimiheke atthu othene, mwaaphenteke axinn'inyu oowaamini, mmooveke Muluku, mmuttittimiheke mwene.

¹⁸Nyuwo anamuteko nwiiweleleke mapwiy'anyu ni nttittimiho noothene, kahiyo ale ooreera murima ni oomaala paahi masi-tho n'ale oowali

¹⁹Maana etthu yootteeliha murima mutthu ovilela n'uhaawa ohimphwanenle mwaha wa Muluku khunahaaxiwa ahitthenk'etthu.

²⁰Vano onoophwanyihani exeeni ovilela omaniwa mmaneliwaka mwaha wa sootakhala siiraly'anyu? Nto mwahaaxiwa mwaha wo weettela exariya khuvilela t'itthu enimusivela Muluku.

²¹Maana mwiitthaneliwe yeeyo, nave Kristu oonihaawela, khunihiyerya nthoonyeryo, wira ntthareke nvinry'awe,

²²yoowo ahaatonko ottheka, nnakhala mwaano mw'awe khimunakhume-mo wootha;

²³aruwaniwaka owo khaaruwana, ahaaxiwaka owo khanlale ikuhu, nto aahivilela mmatatani mwa ole onlamula n'ixariya.

²⁴Aaikuxenrye owo mmans'awe, mweerutthuni mw'awe soottheka s'ahu va mwiikimanyo wira nakhwa mu soottheka, niwerye okhala anaxariya; ni mwaha woovulala w'awe hiyo nipenuxiwe.

²⁵Maana mwaari ntoko opwittipwitthi saarimeenle; nto, vano khumuhokolowela makampusi ni Muhooli onsuka mirima s'anyu.