1 Peter 1

¹Petru murummwa a Yesu Kristu onaalepela amalapo amwareenle o Ponto, oKalasia, o kapatosia, w'Asiya ni oPetaniya;

²moothanliwa okhuma khalayi ni Muluku Tiithi, mooreerihiwa ni Erooho Yooreera wira okhalevo wiiwelela n'uttittimiha omwareya w'ephome ya Yesu Kristu, Muluku nave oovaheeni mahala ni murettele munci-ene.

³Attottopeliwe Muluku, Tiithy'awe Pwiy'ahu Yesu Kristu, yoowo muhina moomoriwa w'awe ikharari wuulupale onivan'he ekumi ya naanaano wira niireke nlipelelaka n'ulipiherya mwaha woohihimuwa wa Yesu Kristu mw'alipa ookhwa.

⁴Wira naakhele mukela-mpa mmosa ohinipweteya, ohinraviheya mwiikho nave-tho ohinnyaala, musukeriw'anyu wirimu,

⁵nyuwo mukhapeleliwa n'uwerya w'awe mwaha wo waamini, wira mwaakhele woopowa onrowa wooniheriwa mahiku ookiserya.

⁶Muniir'anyu nyuwo mutteeliweke murima, enaamwi nlelo muhalanne okathi vakhaani onrow'anyu oriipiwa murima mwaha wo weehereriwa ni inamuna sinci-ene,

⁷wira wiireliwa namona oowaamini w'anyu, wooreeraxa ovikana eweero enihononeya enareerihiwa ni mooro, khunavuwihiwa ni nttittimiho n'uttottopeliwa nihiku onrow'awe orwa Yesu Kristu.

⁸Yoowo nyuwo onimphent'anyu munaamwi muhimoonne, khunamwaamini nlelo muhimoonaka. Tivo vasaren'y'anyu otteeliwa murima n'utthapa ohinaalikeleya,

⁹onrowa woophwanyihani wuumaleloni wo waamini w'anyu, woopowa wa munepa anyu.

¹⁰Woopowa wenno maprofeta yaaphavenly'aya osuwela khulavula mwaha wa sooreera saarowa okhala saw'inyu.

¹¹Vaakohaly'aya okathi xeeni, hata nthoonyeryo xeeni n'okathi, Erooho ya Kristu waakhanle mwa yaawo, yoonihery'aya khalayi yiirelaka onamoona ohaawa waarowa omphwanya ni ovuwa wa nttittimiho naarow'awe okhalana amala ohaawa.

¹²Wa yaawo yooniheriwe wira khivaahiyo wira vaari va waya, nto niireliwa hiyo, awo yeettiha itthu iya, munlaleeriw'anyu olelo-va n'ale yaaphwanyiwe ni Erooho Yooreera, yeewo yaarummwe wirimu, woolaleeryani Ehapari Yooreera, ya itthu seiyo ankelo aniphavel'aya woonexexa oratta-ene.

¹³Tivo, mulipiheryaka mukhalelo wa mwiiwanano anyu, mukhale oowiisiinanela nave mulipeleleke vanci-ene mmahalani nvahiw'anyu ni wiisooniherya wa Yesu Kristu,

¹⁴nto anamwane oowiiwelela, muhetteke-tho n'usiveliwa n'itthu soonanara seiyo mweettel'anyu khalayi mwaha woohisuwela w'anyu etthu;

¹⁵Nto, okhala wira ole owiitthanneni, tooreera murima, nave nyuwo-tho muhaana okhala atthu ooreera murima, mmakhaleloni mw'anyu motheene.

¹⁶Maana varoolempwa wira: Tthiri mukhale ooreera murima okhala wira miyo kooreera murima.

¹⁷Nave, vakhaala wira mwaavekelaka munaaromola aTiithi, yaawo ahinimuthanya mutthu, animulamula ettharihelaka miteko sa khula mmosa, mweetteke mmoovelelaka, okathi wootheene mury'anyu aletto vathi-va,

¹⁸Musuwelaka wira kahiyo n'itthu soowuntta, ntoko eparatha hata eweero, soopolaniw'anyu va makhalelo anyu oohimakeleleya, yaawo ntoko ephattu mwaakhenly'anyu w'axitiith'inyu,

¹⁹nto moopoliwe n'iphome yooreerexa ya Kristu, ntoko mwaapwittipwitthi owiisumaaliha ni ohinraviheya soottheka

²⁰yoowo tthiri khalayi aasuweliwe, wupaceryani w'elapo, nto khwooniheriwa mahiku ala mwaha woophentiwa w'anyu.

²¹Nave mwa yoowo mmuroromele Muluku, omuhihimunxe mookhwaani, nto khunvaha ovuwa iirelaka wira waamini w'anyu ni olipelela w'anyu okhale mwa Muluku.

²²Murapihaka munep'anyu muhina moowiiwelela ekeekhayi, wira mphentaneke ni munn'inyu, mphentaneke ni murima wooreera,

²³muyariwe ene-tho vasya, muhikhanle ntoko mmiso woowuntta nto murie-ene mmiso ohinintta mwa masu a Muluku anikhala ni ari va mahiku othene.

²⁴Maana atthu othene anlikana ni malaxi makithi, ni ovuwa wootheene w'atthu ari ntoko ithutu sa malaxi. Malaxi yuumaka-ru n'ithutu s'aya nave simoraka;

²⁵Nto Masu a Apwiya annikhala mahiku othene; nave n'ala t'ihapari elaleeriwe variyari v'anyu.