James 5

¹Vano, tthiri, nyuwo athaaciri, munleke n'uttonyiha maithori, mwaha w'otakhaliwa onoorweelani,

²Muhakhu anyu ohintta, nave soowara s'anyu sookhuuriwa axikokho!

³Eweero anyu ni eprath'anyu soolyiwa mukwitha nto mukwith'aya onookhalela onamoona woovirikanyani nyuwo. Yoowo onookhuura erutthu anyu ntoko mooro. Nyuwo moothukumanya muhakhu mahiku ala, ookiserya.

⁴Tthiri nliveryo n'anamuteko alipa oohepha yaahepha mmatta mw'anyu, mwaavukunl'anyu annikhuwela, nave okhuwela iwo w'alipa oohepha ohaaphwanya Apwiya aneene etthu sothene.

⁵Mulyaaka soosiva mwiira mukhalaka mulaponi-muumu, nave soothuna s'erutthu anyu saahiwaattelane murukureryiwe n'upuha mooneneviha erutthu anyu, ntoko nihiku noohitiwa.

⁶Moomutthukela naxariya, khumwiiva, vano owo khookhoottenleni.

⁷Axinn'aka mulipihe murima nvilelaka mpakha orwa w'Apwiya. Mukhaleke ntoko mulipa-oolima onwehererya ipyo sa mmatta, avilelaka n'uroromela mpakha Muluku otthula ni mpakha epula yookiserya.

⁸Nyuwo-tho nvileleke mulipihaka murim'anyu okhala wira orwa w'Apwiya woophiya.

⁹Axinn'aka, muhootheryaneke, wira muhilamuliwe nto mwiipasoope maana mulipa oolamula ori va mukhora.

¹⁰Axinn'aka, nwuupuwele maprofeta alavunle ni nsina n'Apwiya, mutakiheke ohaawa n'uvilela w'aya mwaahaawaka.

¹¹Moone hiyo nniwiirela oreeriwa ale anivilela ohaawa. Nyuwo muhiiwa ohimmwaka ovilela wa Yopu; nave moosuwela sooreera Muluku sanvahaly'awe wookiseryani. Tthiri Muluku t'okhupanyerya ni t'osareya othunku.

¹²Axinn'aka otepexa wene, muhilapheke. Muhilapheleke wirimu nnakhala vathi-va wala enamuna ekina. Muhimyeke ?aya? paahi vakhala wira ?ayo? Muhimyeke Nnaari, paahi vakhala wira nnaari. Siiso khamunlamuliwa ni Muluku mwaha woolapha.

¹³Mwa nyuwo ookhala ovela-venle? Munvekele Muluku. Aakhala mwa nyuwo antteeliwa murima? Yiipe nsipo.

¹⁴Aakhala aretta mwa nyuwo? Ewiihane makhulupale a Ekerexa; awo yaavekeleleke, yaattikittheleke makhura ni nsina n'Apwiya.

¹⁵Mavekelo awo, yaveleelihiwa ni waamini, anoowoopola aretta awo. Apwiya animwaapenuxa nave yakhala wira iinre yoottheka animwaalevelela itampi siiraly'aya.

¹⁶Nave mweemerereke soottheka s'anyu, nvekelelaneke, wira mpenuxiwe. Mavekelo n'uvara metto wa mutthu ooreera murima onniwerya vaalupale.

¹⁷Eliya aari mutthu ntoko hiyo; owo aahinvekela Muluku, anvaraka metto wira epula ehirupeke khuhirupa mpakha iyaakha tthaaru ni myeeri mithanu namosa.

¹⁸Numala, Eliya aahivekela-tho, khurupa epula etthaya khuvaha mihokorokho s'aya.

¹⁹Axinn'aka, akhala mwa nyuwo ohiy'ale ephiro y'ekeekhayi, vano mukhw'awe khumuhokoloxerya ephiro eyo,

²⁰musuweleke wira ole onimuhokoloxerya mukhw'awe ephiro yooreera amukumihaka ephiro yoonanara yaakenly'awe, mutth'uwo onimwaakiha mukhw'awe mookhwaani, nave onoophwanya nlevelelo na soottheka s'awe sinci-ene.