James 4

¹Ikhotto n'uwana-wana eriyari anyu sinkhuma vai? Khino khasinkhuma wa makhalela ala, ansuwanyeya n'usiveliwa w'anyu ni minkhela s'erutthu siniwana mw'erutthu-ni mw'anyu?

²Mwaaphavelaka itthu sa mukhw'inyu, muhinawerya okuxa, munnimwiiva mwaneene, mwaamukhaleleka nrima mukhw'inyu muhinawerya ophwanya etthu, munnikumiha onyakulihana n'uwana-wana khamurina ethu maana khamuninvekela Muluku.

³Mwaavekelaka khamunivahiw'etthu, maana khamunivekela oratta-ene, etthu enivekel'anyu muniphavela ohononela itthu soonanara sintthuna erutthu anyu.

⁴Alipa ooraruwa nyu alopwana n'athiyana khamunsuwela wira mwaataanaka n'atthu ootakhala, munikhala awanani a Muluku? Tivo, mutthu ti mutthu ontthunaxa itthu sa vathi-va oniikhaliha n'wanani a Muluku.

⁵Wala munuupuwele wira soolempwa sinihimya mahala wira: Munepa yoowo Muluku onivanhaawe onninla ehace?

⁶Nto owo onninivaha mahala manci-ene. Tivo, Soolempwa sinihimyaya wira: Muluku onnanyokha aniisunnuwiha, nto onnaavaha mahala ale aniisuumaaliha.

⁷Tivo, mmwiiweleleke Muluku. Mmukhotteke Satana, Nave owo onimootthtawa-ni.

⁸Mmwaattameleke Muluku, nave Owo onoowaattamelani. Mpuputthe matat'anyu, nyuwo anatampi; nave nyuwo a mirima miili, murapihe mirima s'anyu.

⁹Moone otakhaliwa w'anyu, munleke mwiikhupanyeryaka. Otheya w'anyu othatuwe wunla; otteeliwa w'anyu murima othatuwe oriipiwa murima.

¹⁰Mwiiyeviheke vamaithoni v'Apwiya, Apwiya anoowunnuwihani.

¹¹Axinn'aka muhaapananeke. Ole onimwaapa mukhw'awe wala onimulamula mukhw'awe, onaapa ikano, onilamula seiyo. Vano mwaalamulaka ikano, khamuntthara ikano seiyo; muniikhaliha mphuki a ikano.

¹²Muluku paahi t'omkumiha malamulo ni kuri mphuki; Muluku paahi tuniwerya omoopola mutthu wala omowetexa. Nyuwo mw'apani munimulamula mukhw'inyu?

¹³Nkiwiriyaneni nyuwo, munihimya wira: Olelo wala meelo ninrowa opooma nakhale weiwo eyaakha emosa nimweetaaka nakoso, siiso nnoophwanya musurukhu munci-ene.

¹⁴Kinoohimeeryani wira nyuwo khamunsuwela enrowa okhumelela meelo. Exeeni ehalaka ekumi ahu? Olikana ni mwiixe onikhumelela okathi vakhaani, numala khunalakaseya;

¹⁵Mu nipuroni moohimya wira: Apwiya yatthuna, nave naxeleliwa saana, nnimwiira ela wala ele.

¹⁶Vano-nto, nyuwo munniisoona, mwiittottopaka, wiithamala inamuna seiya, ti woonanara.

¹⁷Tthiri, ale ansuwela wira sooreera, khuhiniira annittheka.