James 3

¹Axinn'aka: Othene muhiikhalihe awiixuttihi, musuweleke wira hiyo nnoolamuliwa vanci-ene.

²Maana othen'ahu ninnittheka wa inamuna soovirikana, Vano akhala mutthu ohinttheka mwaha wa moolumo awe, mutth'uwo tooreera murima voomalela, Owo onniwerya weettiha oratta-ene erutthu awe yothene.

³Hiyo ninnihela eleemi mwaano mw'akhavelo, wira eniiweleleke, nto ninniwerya weettiha erutthu aya yothene ntoko sintthun'ahu.

⁴Hata muupuwele ikalawa, wira nave-tho sirimunnwaru ineettihiwa n'ipyo yuulupale nto sinttharihiwa ephiro sirowaka weiwo ontthun'awe mulipa onettiha.

⁵Siiso-tho nlumi etthu yaamukhaani ya mweerutthu-ni nto ninniittottopa mwaha wa itthu suulupale. Muupuwele mooro mwaamukhaani onniwerya opaha etakhwa yuulupale.

⁶Siiso-tho nlumi mooro; nlo olumwenku wa sootakhala; nlumi naaliwe variyari va itthu sa mweerutthuni mwaha, nto ninninanariha erutthu ahu yothene nave ninnipaha makhalelo othene, siiso-tho ninlo ninnipahiwa omooroni.

⁷Maana muxovo wothene onikhala vathi-va, hata okhala wa inama s'owalin hata wa ipalame, nnakhala wa inowa wala wa mphareya, onniisuwela khunawerya ohuuwa n'atthu;

⁸Nto khaavo oniwerya okhala mwaneene nlumi n'awe. Nlumi etthu yootakhala ehin'weryaneya weemexa. Nlumi noosareya murette woowiiva.

⁹Ni nlumi ninnimuttottopelano Muluku Tiith'ihu nave ni nlumi nimosaru nenlo ni naatakhaliha atthu, apattuxiwe elikanyihiwaka ni Muluku.

¹⁰Mwaano mmosaru munnikhumamo mareeriho ni masu ootakhaliha. Axinn'aka, khivanreerela wira viiraneyeke siiso.

¹¹Niireke vanniiraneya ehime emosaru yeeyo okhumamo maasi oosiva ni maasi oowaawa?

¹²Axinn'aka, mpheera khoniima epaphaya, hata murarance khoniima koroxo nnakhala ephareya khenivaha maasi oowurya.

¹³Mwa nyuwo ti pani orina ankhili ni miruku? Mooniherye, ni mweettelo anyu wooreera, miteko s'anyu, n'upixa-murima wa miruku.

¹⁴Vano mwakhalana mmurimani mw'anyu nrima nootakhala n'uhiiwanana, muhiittottopeke, muhootakheke nveehaka ekeekhayi.

¹⁵Awo kahiyo ankhili anikhuma wirimu, ta vathi-vaava t'axinama ni ta munepa wootakhala.

¹⁶Okhala wira vaavo varyayavo nrima n'uhiiwanana, vaavo-tho vookhalavo owana-wana n'itthu sothene soonanara.

¹⁷Vano ankhili anikhuma wirimu t'oreera, t'amurettele, t'omaala, t'axariya, t'osareya othunku ni miteko sooreera, khanaathanla atthu, kharina mirima miili.

¹⁸Tthiri muhokorokho wa exariya onaaliwa ni murettele, w'ale anruuha murettele.