James 2

¹Axinn'aka, muhimwaaminiki Pwiyahu Yesu Kristu, Pwiya a nttittimiho, mwaatthanyaka akhwinyu.

²Maana akela, mmuthukumanoni mw'anyu mutthu an'wanre-ene munela aweero mukathani, n'ikuwo sooreera ni soophwanela; arwa-tho mukina ori masikhini, awanre-ene ikuwo soonanara.

³Nto nyuwo khumwaakhela ni nttittimiho owanre oratta-ene, khumuhimeerya wira: Iwo awanre oratta-ene ekilaathi nipuro nla va nooreera, khumuhimeerya masikhi uwo wira: Nyuwo mweemeleke vo wala mukilaatthiki vathi v'ethatapo ak'eyo;

⁴mwiiraka siiso kahiyo wira munaathanla atthu? Kahiyo wira muhinimoonela vatthu mukin'ole mweettihiwaka ni malamulelo ootakhala?

⁵Axinn'aka oophentiwa, khino niireke Muluku khaathanlale alipa oohaawa a vathi-va wira ekhale atthaaciri mo waaminini ni atthu oohiyeriwa s'omwene awe, yoowo olakenly'awe waavaha ale animphenta?

⁶Nto nyuwo munnimuthanya mulipa oohaawa. Khamunoona wira athaaciri ti yaawo anoohaaxani, ni wira ti yaawo anooroihani omilattuni?

⁷Kahiyo yaawo anooroihani aniveeha nsina noowaarya ninromoliwa mwaha wa nyuwo?

⁸Vakhanle-ene siiso, munniira saana mwaattharaka masu a omwene wa Muluku, ntoko silempw'aya wira: Mumphenteke mukhw'inyu ntoko siniiphent'anyu.

⁹Nto mwaathanyaka atthu, munnittheka, munoolamuliwa n'ikano, okhala wira khamuniiwelela seiyo.

¹⁰Maana khula mutthu onikhapelela moolumo othene avirikanyaru nimosa, othekela moolumo othene.

¹¹Nto wira, ole ohimmye wira: Muhiraruweke, ti yoowo nave onihimya wira: Muhimwiive mutthu. Vano, nyuwo tthiri mwaahiraruweke, munamwiiva mutthu, nto nyuwo munnitthekela nlamulo.

¹²Mulavuleke ni mwiireke itthu sothene musuweleka wira munoorowa olamuliwa n'ikano seiyo sintaphula.

¹³Okhala wira nlamulo khanimmoreliha ikharari mw'ole ohikhalanne ikharari. Maana ikharari sinnixintta nlamulo.

¹⁴Axinn'aka akhala mutthu onihimya wira kookhalana waamini, nto khuhiniira itthu sooreera, ontthuna ophwanya exeeni mutth'uwo? Waamini weiwo onoowerya omoopola?

¹⁵Khi muhim'anyu hata murokor'inyu athaaleliwa nnakhala athoiwa yoolya ya khula nihiku,

¹⁶vano mmosa a nyuwo khumuhimeerya wira muroweke ni murettele; mooreke, nvone nto khuhinvaha etthu ehirin'awe mweerutthuni, moolumo anyu awo amphiyerya-ni?

¹⁷Siiso-tho waamini waahikhalane miteko sooreera khuna-muteko ti wookhwe-ene.

¹⁸Akhala mutthu onihimya wira: Akina aakhalana waamini w'aya, akina-tho anniira itthu soorera miyo kinoomwiirela mutth'uwo wira mukooniherye waamini w'anyu iwo, muhiiraka sooreera; vano miyo kiiraka itthu sooreera kinoowooniherya waamini w'aka.

¹⁹Nyuwo munnamini wira Muluku ori mmosa. Vaareera hata arumeyi a minepa sootakhala nave annaamini enathukumela yoovaka.

²⁰Vano nyuwo mulolo, munnitthuna osuwela wira waamini ohirina miteko sooreera, khuhiyo etthu?

²¹V'ekeekhayi Tiith'ihu a khalayi Aparahaamu khaakhalihiwe naxariya mwaha wa miteko s'awe? Vaanvahaly'awe Muluku ntoko mukuttho mwan'awe iihaniwa Isakhi.

²²Moone saana wira waamini waatakanihen'ye ni miteko sooreera siiso nave khumalelihiwa.

²³Vano saahimaliheriwa Soolempwa sinihimya wira: Aparahaamu oomwaamini Muluku, nave siiso khukhalihiwa naxariya, nave khwiihaniwa okhala mpatthani a Muluku.

²⁴Waaso moone wira mutthu onnikhlihiwa naxariya mwaha wa miteko sooreera, ohikhanle waamini paahi.

²⁵Siiso-tho kahi ti saakhalihiw'awe naxariya namuttompe ole iihaniwa Rahapi, vale vaawaakhenly'awe khwaavaha opuro aYuta oowehaweha, khwaakhaliherya otthyawela ephiro ekina?

²⁶Siisaale ntoko erutthu ehirina erooho ti yookhwa, siiso-tho waamini ohirina miteko sooreera ti wookhwa