James 1

¹Yakopo muhimaawe Yesu, epottha ya Muluku ni y'Apwiya Yesu Kristu, kinnaakhomasa atthu a maloko muloko ni manli amwareenle mulaponi mwothene.

²Axinnaka, mweehereriwaka wa khula enamuna, muupuweleke okhala etthu yooreeriwa,

³siiso nyuwo munnisuwela wira weehereriwa wo waamini wanyu, onnoovahani nthiti.

⁴Nave, nthiti nihaana okhalana miteko soomalela, wira nyuwo mukhale ookhomalihiwa owiivahererya, ehuuhaleelakani nnakhala etthu emosa.

⁵Nto, akhala mutthu mwa nyuwo ohirina ankhili, anvekele Muluku, yoowo onaavaha atthu mahala-ene, ni vootthuna murima awe, onoovahiwa.

⁶Mwaavekeleke ankhili waaminiki muhihoveryaka. Okhala wira ole onihoverya onlikana ni mawimpi amphareya ampuruliwa n'epheyo.

⁷Vano ole onihoverya ahuupuwele wira onimwaakhela etthu w'Apwiya;

⁸maana mutthu owo orina ankhi ohoverya paahu, makhalelo awe othene ni mwa sothene sinir'awe.

⁹Munna owiiyeviha, aittottopeke okathi oninnuwihiw'awe.

¹⁰Nto munna oothaaciri aittottopeke aiyevihaka; okhala wira tthaaciri onoovira ntoko ethutu ya moothakoni.

¹¹Tthiri nsuwa nakhuma ninniruuha oviha ni ninnuumiha munyepu, ni khunamoriha ithutu saya, ni oreera waya onnihononeya. Ntoko siiso, nave tthaaciri onoonyaalihiwa hata avaraka miteko sawe.

¹²Ooreeriwa mutthu onivilela eehereriwaka; okhala wira wavira okathi wo weehereriwa owo onimwaakhela ekumi ehinimala, ntoko saaroromelihaly'awe waavaha ale animphenta.

¹³Mweehereriwaka, ahikhale onihimya wira: ?Muluku t'onkeehererya?; maana Muluku khaneehereriwa ni sootakhala, ni khanimweehererya mutthu.

¹⁴Nto khula mutthu oneehereriwa n'itthu soosivela s'erutthu awe, seiyo ti nimootottha, sinamukuxa.

¹⁵Vano soosivela s'erutthu saata, sinniruuha etampi; nave etampi eyo yinnuwa voomalela enniruuha okhwa.

¹⁶Axinn'aka anoophentaakani, muhootothiwe.

¹⁷Soovahiwa ni sooreera sothene sinnrwa osulu, sikhumaka w'Atiithi aneene apattunxe omwaleela wirimu, ahinrukunuwa makhalelo aya ntoko muuttutthi.

¹⁸Vootthuna w'aya awo aanikhaliha muhina mwa masu a ekeekhayi, wira hiyo nikhale ntoko mihokorokho soopacerya, mwa sothene sipattunx'awe.

¹⁹Axinn'aka oophentiwa, muupuweleke wira khula mutthu ohaana okhala oowaakuva wiiwa ni oopisa olavula, ni oopisa onanariwa.

²⁰Maana onanariwa wa mutthu khunruuha exariya ya Muluku.

²¹Tivo, muhiye makhalelo othene oonanara ni sootakhala sothene siniiry'anyu, mwaakhelele ni wiiyeviha masu yaaliwe mwa nyuwo, yaawo arina owerya wo woopolani.

²²Mukhaleke oweettela masu awo, muhikhaleke alipa-oowiiwa paahi mwiisootothaka.

²³Ole oniiwa masu a Muluku, nto khuhineettela, onlikana ni mutthu oniiweha owiitho wawe valoolani,

²⁴numala wiiweha, onnirowa khuliyala naanaanoru siry'awe makhalelo awe.

²⁵Vano ole ontthokelela ikano soomalela sinoopola, oneettela oratta-ene, yoowo ohimmakela wiiwa paahi, onaliyala naanaanoru, nto oneettela ikano iyo onooreeriwa mwa sothene sinrow'awe wiiraka.

²⁶Akhala mutthu onuupuwela wira onnimuttittimiha Muluku, nto ahinasuwela weettiha nlumi n'awe, mutth'uwo oniisootatha mmans'awe; omuttittimiha w'awe Muluku ti w'ethiru.

²⁷Etiini yooreera (Omuttittimiha Muluku, Tiith'ihu, wooreera tinno: Oxekurya ikwaasuni ni anaamukhwele ni waakhaliherya moohaawani mw'aya, niisukeke naaxineene niviraka mootakhalani mwa vathi-va.)