Hebrews 13

¹Mukhalele nthiti ophentana mukina ni mukhw'awe.

²Muhihiye owaakhela aletto; maana akina-ku ewaakhelaka aletto siiso, yaahiwakhela ankelo a Muluku ehisuwelaka.

³Nwuupuweleke alipa ootthukeliwa, ntoko mutthukeliwe vamosa ni yaawo. Nave nwuupuweleke ale anihaaxiwa, ntoko wira ti nyuwo munihaaxiwa.

⁴Othelana onniphwanela ottittimihiwa ovikana itthu sothene, siiso-tho ororomeleya waya atthu awo oothelana okhale woohipahuwa, okhala wira Muluku onimwaahukhuma anamararuwa n'ale ootakhala murima.

⁵Makhalelo anyu ahikhaleke a milili; mutteeliweke murima n'itthu sirin'anyu, okhala wira Muluku mwaneene oohimya wira: Miyo nkinoohiyani nnakhala nkinoonyanyalani.

⁶Tthiri nihimyeke ni nroromelo wira: Apwiya t'anikikhaliherya, miyo nkinoova etthu mutthu ontthuna okiiriha exeeni?

⁷Nwuupuweleke ahooleli anyu yoolaleyenryeni masu a Muluku. Muupuweleke enamuna yaakhal'aya ni mutthariheke waamini waarin'aya.

⁸Yesu Kristu ti yoowo okhuma nsana, olelo ni mahiku othene.

⁹Muhikuxiweke ni miixuttiho soonanara sa khula enamuna. Vanreerela wira murim'ahu olipihiweke ni mahala a Muluku, vahikhanle-olipihiwa n'ikano sa yoolya, seiyo ahinttottelaya etthu, ale aneettela.

¹⁰Hiyo nookhalana altaari yoowo ale anvara muteko muheemani ahimpwanelaya olya vo.

¹¹Mukhulupale a anamukuttho onikuxa ephome ya inama onarowana opuro wooreerexa ntoko yoovaha enttipiha etampi. Vano inama iyo sinipahiwa ota wa muttetthe.

¹²Siiso, Yesu nave vakhwiiy'awe ota wa muttetthe wira aareerihe atthu n'iphome awe.

¹³Tivo, nrowe ota weiwo wa muxaxa nakumane ni yoowo, nivilelaka oveehiwa weiwo ovilenly'awe.

¹⁴Okhala wira hiyo khanrina moolumwenkuni-mu muttetthe wookhala mahiku othene, hiyo nimphavela muttetthe onrwa.

¹⁵Tivo, mahiku othene mwa Yesu Kristu ninnvaheke Muluku mukuttho w'omutthapela, okhanle muhokorokho wa murim'ahu ni moolumo anttottopela nsina nawe.

¹⁶Muhiliyaleke wiira sooreera ni waavaha akhw'inyu itthu sirin'anyu, okhala wira seiyo tinimusivela Muluku.

¹⁷Nwiiweleleke ahooleli anyu, ni mutthareke sinoleelayani, okhala wira awo t'anikhapelela ekumi anyu, nave awo t'anrowa wakhula sa nyuwo wa Muluku. Siiso nwiiweleleke yaawo wira evareke muteko aya etteeliwe ene murima, ehisikulaka, maana mwaahiwiiweleleke khamunttottela etthu.

¹⁸Munivekeleleke hiyo. Ninnisuwela wira muupuwelo ahu ti wooreera, maana nimphavela okhala oottittimiheya mwa sothene.

¹⁹Nto vano kinnoovekelani vanci-ene wira munvekeleke Muluku wira miyo kihokolowele wa nyuwo voohilekela.

²⁰Muluku a murettele, yoowo omuhihimunxe pwiy'ahu Yesu mookhwani, makampusi muulupale a ipwittipwitthi, muhina mwa ephome ya waataana ohinimala,

²¹aareerihe mwa sothene wira evareke entthun'awe, nave yiireyeke mwa hiyo ele enimusivela, mwa Yesu Kristu. Owo attittimihiweke mahiku othene. Amen!

²²Axinn'aka, kinoovekelani wira mwakhelele n'uvilela masu ala ootumererya, okhala wira epaphelo ela koolepenlyaakani khiyaattale.

²³Vano kinthuna wira musuwele wira munn'ihu Timotiyo ootaphuliwa. Nto owo arwa naanaano, kinimoorwa ni yoowo.

²⁴Mwaakhomase ahooleli anyu n'atthu othene oreera murima. Nave atthu a wItaliya annookhomasani.

²⁵Mahala a Muluku ekhale ni nyuwo othene.