Hebrews 12

¹Vano hiyo-tho nrukureriwe n'anamoona oowaatta ntoko meeku, nirihe itthu sothene sinnittiyelela ni etampi enniruuhela sootakhala, nrowe ntthimakele ninthiti muteko yoowo oleeliw'ahu,

²ninnwehexexaka Yesu paahi, yoowo okhanle mulipa oopacerya ni oomaliherya waamini wahu, owo aahihiya otteeliwa murima waarin'awe, khuvilela mwiikimanyo, ahithokoreryaka wuliwa muru, ni okilaathale moono woolopwana w'ehice ya Muluku.

³Mmuupuweleke oratta-ene ole ovilenle ovaanyihana wa n'anatampi wira muhooceye, mmurimani mwanyu.

⁴Ekhotto eniwan'anyu mwaha w'etampi, nlelo khamunatthi ovilela mpakha omwarexa ephome anyu.

⁵Nave nyuwo munooliyala masu atumereriwanyu ntoko aana anihimya wira: Mwan'aka, muhikhootteke, mwaattaruxiwaka n'Apwiya; hata muhinanariweke, awo yoopwapwelakani,

⁶okhala wira Apwiya animpwapwela ole animphent'aya, ni annimuttaruxa ole onimwakhel'aya okhala mwan'aya.

⁷Nvileleke mwaalakiwaka, maana Muluku onookhapelelani ntoko an'awe. Nto mwaana xeeni ohinttaruxiwa n'atiithi awe?

⁸Tthiri nyuwo mwahittaruxiweke (ntoko sinttaruxiw'aya anamwane othene), waaso khamuhiyo aana a ekeekhayi, aana oophwanyiwa.

⁹Ohiya-tho vo, hiyo khalayi axitiith'ahu aniyanre yaaninttaruxa, nnaattittimiha. Vano nto khivatempanxe oreera hiyo omwiiwelela Tiithi a murohoni wira nikhalaneke ekumi?

¹⁰Siso-tho, axitiith'ihu aniyanre, yaninttaruxa okathi vakhani, ntoko soonel'aya oreera. Vano Muluku onnittaruxa wira nikhaleke oratta-ene, ni wira niireke mpatte mwa oreera wawe murima woomalela.

¹¹Tthiri khani-vo nttaruxo nintteeliha murima okathi yoowo onttharuxiw'awe mutthu, ninriipiha murima. Nto ohoolo waya, nlo niniruuha exariya ni murettele.

¹²Tivo, mulipihe matata anyu akhulumun'we, ni makutha anyu atteetthenye.

¹³Mookolole iphiro sinviranyu, wira nnawu nrakanle nihituthunye, nto nivonihiwe.

¹⁴Mphaveleke okhala ni murettele n'atthu othene wira mukhale ooreera murima, okhala wira khaavo onrowa owoona Apwiya ahikhanle ooreera murima.

¹⁵Mwiipasoopeke wira ahikhale onicompa ahiyaka mahala a Apwiya, nave ohiphuwe mutathaari woowaawa onrowa owuukhulani, waahononaka atthu anci-ene.

¹⁶Wala ahikhale mutthu oonanara murima nnakhala ohinttittimiha itthu sa Muluku ntoko Esawu, yoowo aatuminhe ni muhasa mmosa paahi wa yoolya, eyuulupale awe yoopacerya oyariwa, yeeyo yamphwaneliha ohalana soohiyeriwa.

¹⁷Nto ohoolo waya nyuwo musuwele wira okathi owo waaphavenly'awe ohalana mareeriho a soohiyeriwa, owo aahikhootteliwa, nto khaawenrye orukunuxa muupuwelo awe, onaamwi aavekela anlaka vanci-ene.

¹⁸Nywo nnlelo khamphiyale vamwaako onreerela ovara, yoowo ompatta mooro, hata khamunaphiye mw'epiphini, ni mapuro ooriipela, wala mapuro ari epheyo yoowuupa,

¹⁹ni khamwiiwale oruma wa nipetta ni olavula wa masu awo, yaawo ale yaiwale yaavekenly'aya wira ehitthikele-tho wiiwa,

²⁰okhala wira awo khiyaawerya ovilela sooruma saahimya wira: ?Hata mwamunama akwannya-ru mwaako owo, avonyiwe maluku.?

²¹V'ekeekhayi etthu yiiraneya yaari yoowoopiha, mpakha Monse ohimya wira: ?Kinnoova kinathukumela.?

²²Nto nyuwo moophiya omwaako Siyoni, muttetthe wa Muluku a ekumi, oYerusalemu wa wirimu, weiwo ory'aya ankelo ahinaalikeleya, athukumanne etteeliwaka murima,

²³Moophiya okerexa waana oowiixuttiwa, yaawo alempwe masin'aya wirimu. Moophiya wa Muluku, mphuki a atthu othene, ni a minepa s'atthu a exariya, ooreera murima voomalela.

²⁴Ni moophiya wa Yesu, mulipa-oowaattaniha a wataana wa naanaano, ni wa ephome enreeriha, y'ewo enihimya yooreera ovikana ephome y'APeli.

²⁵Mwipasope! Muhimukhootte ole onlavula. Opuro wahaatthyanwaaya ale yaakhontte omwiiwelela ole aalopola vathi-va, nto khavanrowa otepa ohiwerya omutthyawa ole onnilopola wiirimu.

²⁶Khalayi Nsu nawe naahithukumeliha elapo ela yavathi. Nto vano onnihimya-tho wira: ?Wookiseryani nkinthukumeliha elapo-ru ya vathi paahi, nave kinoothukumeliha erimu.?

²⁷Vano moolumo ala anthoonyiherya okumihiwa wa itthu sinttikinyeya ntoko saapakiwe aya, wira sihaleke paahi itthu sihinttikinyeya.

²⁸Tivo okhala wira ninnaakhela omwene ohinttikinyeya, nixukhuruku wira nimurumeeleke Muluku ntoko sinreerel'aya ni nttittimiho ni woova.

²⁹Okhala wira Muluku ahu onlikana ni mooro onipaha voomalela.