Hebrews 11

¹Waamini ti ekeekhayi ya itthu sinlipelel'ahu, ni t'osuwelexa wa itthu sihinoon'ahu.

²Tthiri, mwaha wo waamini, atthu a khalayi yaahikhalana onamoona wooreera.

³Mwaha wo waamini, ti ninsuwel'ahu wira olumwenku opattuxiwe ni masu a Muluku, ni wira iye sinooneya sikhumme mwa itthu sihinooneya.

⁴Mwaha wo waamini, Apeele aahinvaha Muluku mukuttho wooreera ovikana wa Kayini. Mwaha wo waamini, owo aahittottopeliwa ni Muluku, okhala naxariya, okathi Muluku waakhelenly'awe soovaha s'Apeele. Siiso anamwi owo okhwiye, nlelo waamini wawe onnilavula.

⁵Mwaha wo waamini, Enookhi aahikuxiwa khuwelihiwa wiirimu wira ahivire mookhwani. Owo Khaaphwanyiwe okhala wira Muluku aahimukuxa. Tthiri owo ahinatthi okuxiwa, aahittottopeliwa ni Muluku mwaha woomusiveliha yoowo.

⁶V'ekeekhayi khaavo onimusiveliha Muluku ahaaminiki. Okhala wira ole onimwaattamela Muluku, ohaana waamini wira Muluku ookhala ni wira onnimutthuvela ole onimphavela.

⁷Mwaha wo waamini, okathi Noowe waahimeeriw'awe ni Muluku itthu sahooneya saarowa okhumelela, ni amoovaka Muluku, owo aahipaka ekalawa wira oopowe vamosa n'etthoko awe. Mwaha wo waamini owo aahaalamula atthu ootakhala, khuvahiwa exariya, yeeyo enrwa ni mwaha wo waamini.

⁸Mwaha wo waamini, Aparahaamu aahimwiiwelela Muluku, aitthaniwaka ni yoowo, khuvenya arowaka elapo Muluku yamuhimeenry'awe onvaha ntoko yoohiyeriwa. Owo aahihiya elapo awe ahisuwelaka waarow'awe.

⁹Mwaha wo waamini, owo aahirowa mulaponi mwaaroromelihiw'awe, khukhala ntoko namurwa a elapo eyo; aanikhala muheemani vamosa ni Isaakhi ni Yakope, yaawo yaahiyeryaniw'awe vamosa nroromeliho.

¹⁰Tthiri owo aaniwehererya muttetthe woororomeleya, yoowo mulipa ooteka ori Muluku.

¹¹Mwaha wo waamini, Sara aahivahiwa owerya wooyara, onamwi aari owuuluvala, okhala wira owo aahaamini wira ole aamuroromelinhe t'ororomeleya.

¹²Tivo wa mutthu mmosa aakhwaale, nokhumelela nloko nuulupale, nowatta ntoko itheneri sa wirimu, nohalikeleya ntoko mihava s'ophareya.

¹³Atthu awo othene akhwiiye yaaminne-ene. Awo yaari ehinaakhele itthu saaroromelihiw'aya. Nto awo ephavelaka itthu iyo, yaaniweha otteiwene siryaya ni yaanisuwela wira yaari anamurwa ni yaanvira elapo ela.

¹⁴Nto ale anlavula siiso, anooniherya wira aniphavela elapo.

¹⁵Awo yaakhanle wira yaanuupuwela elapo yaakhumalyaya, yanwerya ohokolowela weiwo.

¹⁶Nto vano, awo aniphavela elapo yootepa ottittimiheya, eyo p'iyo, elapo ya wirimu. Tivo, Muluku khanuuleliwa muru okhala Muluku aya, okhala wira Owo ohaalokiherya muttetthe onrow'aya okhalaka.

¹⁷Mwaha wo waamini, Aparahaamu okathi weehereriwawe ni Muluku, aahinvahererya mwan'awe Isaakhi, yoowo Muluku aamuroromelihaly'awe onvaha Aparahaamu. Owo aaphavela omwiiva mwan'awe mmoseene aaroromelihiw'awe ni Muluku.

¹⁸Onaamwi Muluku aamuhimeenrye wira: ?Mwa Isaakhi onookhumelela osuulu anyu.?

¹⁹Okhala wira Aparahaamu anuupuwela wira Muluku onniwerya woomuhihimuxa yowo mookhwaani, tivo owo, aahimwakhela mwan'awe, Isakhi aari mookhwaani.

²⁰Mwaha wo waamini, Isaakhi aahimureeriha Yakope ni Esawu mwaha wa makhalelo aya ohoolo.

²¹Mwaha wo wamini Yakobe, ahalaka okhwa, aahaareeriha aana a Yosefe, khula mmosa, numala aahinvarela ttootto awe wukhaani, khunvekela Muluku.

²²Mwaha wo wamini, Yosefe ahalaka okhwa, aahilavula mwaha w'okhuma w'atthu a Isarayeli w'Exitu, ni aahahimeerya atthu enamuna yaarow'aya wiirihiwa murutthu awe.

²³Mwaha wo waamini, Monse, okathi wayariw'awe, aahiipithihiwa ni axitiith'awe, mpakha miyeeri miraru, okhala wira awo yahoona wira mwan'owo aari ootepaxa oreera; nave khinawoopinhe nlamulo na mwene.

²⁴Mwaha wo wamini, Monse vannuwaly'awe, khatthunne wiireliwa mwaana a mwan'awe Farawo, muthiyana.

²⁵Owo aahithanla ohaaxiwa vamosa n'atthu a Muluku opuhaka okathi vakhaani n'itthu sooreera sa tampi.

²⁶Owo aahoona othanyiwa wa Kristu okhala muhakhu muulupale ovikana mihakhu sa w'Exitu, okhala wira owo aniwehererya itthu saarow'awe otthuveliwa.

²⁷Mwaha wo waamini, Monse, aahikhuma w'Exitu ahoovaka onanariwa wa mwene. Owo aahilipiha murima, ntoko mutthu orimoona ole ohinooneya.

²⁸Mwaha wo waamini, Monse aahimwiira Paasikha ni aahittikitthela ephome mikhora s'atthu a Isarayeli, wira mulipa oowiiva ohiwiive an'aya oowiixuttiwa.

²⁹Mwaha wo waamini, atthu a Isarayeli yaahilapuwa Ephareya Yooxeerya, ntoko yeetta vatthayani yoowuma. Vano atthu a w'Exitu ephavelaka olapuwa, ephareya yaahaamirya ekhwa.

³⁰Mwaha wo waamini, saahimora ixiri s'oYeriko, numala atthu a Isarayeli orukurerya mahiku mathanu na manli.

³¹Mwaha wo waamini, Rahapi, namuttompe, khaiviwe vamosa n'ale yaahaamini, okhala wira owo aahiwakhela ni murettele alipa oohottela elapo.

³²Nto kihimye-tho exeeni? Miyo nkirina-tho okathi woohimya sothene sa Kiitiyoni, Parakhi, Samusoni, Yefite, Taviti, Samuweli ni sa maporofeta,

³³yaawo ni mwaha wo waamini, yaahikuxa ilapo, yaaheettela exariya, yaahiphwanya itthu saaroromelihiw'aya, yaahitthuka iyano s'akharamu,

³⁴yaahittipiha owali wa mooro, yaahitthyawa wiiviwa n'ixoowa. Yaari atthu oolosowa, khukhala atthu oowerya owana mukhottoni, ni khwaxintta anakhotto a amalapo.

³⁵Athiyana yaahiwaakhela atthu aya yaakhwiiye, yaawo yaahihimuxiwe khuphwanya-tho ekumi ya naanaano. Akina yaahihaaxiwa, wira ephwanye ohihimuwa woottittimiheya.

³⁶Akinaku yaahiveehiwa nave yaahimaniwa, nave akina yaahittukiwa ni kwirinti khuheliwa mukhatteya,

³⁷akina yaahipwexiwa ni maluku, akina yaahikitthanyiwa eriyari, akina yaahiiviwa n'exoowa, akina yaahirowa ilapo sikina, ewanre-ene isapala sa ipwittipwitthi ni sa ipuri, ekhalaka ootthoiwa, elupatthiwaka ni ehaxiwaka,

³⁸yaahivira mutakhwani ni mmiyakoni, ekhalaka mukhukuni ni mmittuphani. Awo y'ari atthu yahaaphwanela mulaponi mwa vathi-va.

³⁹Atthu awo othene yaarina onamoona wooreera mwaha wo waamini waya. Nto khaavo hata mmosa a yaawo aakhenle yaaroromelihiwe.

⁴⁰Okhala wira Muluku oonilokiherya etthu yooreera yuulupalexa, wira awo ahireerihiwe voomalela hiyo nihikhanle.