Hebrews 10

¹Ikano siri ntoko eruku paahi ya itthu sooreera sintthuna orwa, iyo kahiyo eruku ya itthu s'ekeekhayi. Tivo ikano iyo nnakhala khasinwerya waareeriha voomalela ale animwaattamela Muluku wira emukokhorele, ettharihelaka mikuttho sinheliwa imaara sinci-ene, mwaakha ti mwaakha.

²Tthiri vaakhanle wira ikano saaniwerya waareeriha voomalela ekhwaha emosa paahi ale aneettela seiyo, awo khiyaahiya ohela mikuttho? Nave awo yaatthuna wuupuwelaka itampi saya?

³Vano, mikuttho iyo sinniwuupuxerya atthu itampi s'aya, khula eyaakha,

⁴maana ephome ya inyompe ni ya ipuri kheniwerya ottipiha itampi.

⁵Vano Kristu varwiy'awe moolumwenkuni, oohimya wira: Nyuwo khamutthunne mukuttho ni soovaha nto mookupela erutthu.

⁶Nyuwo khisoosivenleni oheleliwa mikuttho sa inama soopahiwa, wala mikuttho s'olevelela itampi.

⁷Vano miyo koohimya wira: Miyo kiri va, muliivuruni soolempwa mwaha wa miyo; miyo kirweenle wiira sintthun'anyu, nyuwo Muluku.

⁸Numala ohimya wira: ?Nyuwo khamwaatthunne mukuttho ni soovaha, nnakhala mikuttho sa inama soopahiwa, wala mikuttho s'olevelela itampi. Khamwaasiveliwe ni sothene iya, mikuttho seiyo saapakiwa itthariheliwaka ikano.?

⁹Nave oohimya-tho wira: ?Miyo kiri-va, kirweenle wiira otthuna w'anyu, Muluku? mmalihe mikuttho sa khalayi, muranttelihi ni mukuttho musya.

¹⁰Nto, okhala wira Kristu ohiira otthuna wa Muluku, hiyo nookhalihiwa ooreera murima mwaha wa mukuttho w'erutthu ya Yesu Kristu, ovaherennrye erutthu awe emaara emosa paahi wa mahiku othene.

¹¹Nihiku ti nihiku khula namukuttho aaneemela onavara muteko awe w'onamukuttho; owo aanihela mikuttho seiyo simosaru imaara sinci-ene, seiyo sihinwerya ottipiha itampi.

¹²Nto, Yesu owo ohela mukuttho wottipiha itampi emaara emosa paahi, owo ookilaathi moono woolopwana wa Muluku,

¹³weiwo onweherery'awe wira Muluku aakhalihe awanani awe ntoko ntthatto na inawu sawo.

¹⁴Okhala wira mwaha wa mukuttho mmosa paahi, owo ohaareeriha voomalela wa mahiku othene ale anreerihiwa.

¹⁵Nave-tho mwa etthu ela, Erooho Yooreera ennikhalela onamoona ohimyaka wira:

¹⁶Mwaataano onrow'aka opaka n'awo t'ula: Yavira mahiku awo, Kinoohela ikano s'aka mmurimani mw'aya; ni kinoolepa masu aka mmuupuweloni mw'aya. Anihimya t'Apwiya.

¹⁷Annihimya-tho wira: Nnakhala nkinrowa-tho wuupuwela itampi s'aya, hata soonanara s'aya.

¹⁸Vano, valeveleliwaya itampi, khivamphwanela-tho ohela mukuttho w'olevelela itampi.

¹⁹Tivo, axinn'aka, hiyo ninniroromela n'ekeekhayi wira nnoovolowa nipuro nooreeraxa mwa ephome ya Yesu,

²⁰mwa ephiro esya ni y'ekumi, yeeyo enitthukulenly'awe eriyari y'ekuwo yuulupale, eyo p'iyo, mw'erutthuni mw'awe.

²¹Tivo, nookhalana Namukuttho Muulupalexa onikhapelela nloko na Muluku.

²²Siiso, nimwattameleke Muluku ni murima w'ekeekhayi, nisareyalene wamini, nireerihiwene murima wa muupuwelo wootakhala, nave erutthu ahu erapihiwene ni maasi ooreera.

²³Nlipiheryeke oratta-ene nroromelo nneettel'ahu, okhala wira ole oniroromelinhe t'ekeekhayi.

²⁴Nttittimihaneke mukina ni mukhw'awe, wira nlipiheryaneke moophentanani ni mmitekoni sooreera.

²⁵Vano nihihiye othukumana mmunthukumanoni mwahu, ntoko siniir'aya atthu akina. Nto niphaveleke olipihana mukina ni mukhw'awe, vanci-enexa vanoon'anyu wira nihiku n'Apwiya noophiya.

²⁶Okhala wira nlelo naakhanyereryaka wira etampi vootthuna wahu, hiyo nisuwenleene ekeekhayi, khuvo-tho mukuttho mukina wa itampi,

²⁷Nto enihala etthu emosa paahi: Olipelela olamuliwa wo woopiha, ni mooro onvarela onrowa waapwetexa awanani a Muluku.

²⁸Mutthu ahiiwelela ikano sa Monse, khusuweliwa n'anamoona anli wala araru, owo aaniiviwa ahimoreliwaka ikharari.

²⁹Nyuwo munuupuwela ehukhumu yuulupale enrowa wiirihiwa ale yaamunyakenle Mwaana a Muluku, ni yaavehale ephome yo waataana, weiwo wiiveliwawe, ni-tho yaaruwanne Erooho ya mahala?

³⁰Maana hiyo ninnimusuwela ole ohimmye wira: ??Miyo kinninla ikuhu, kinooliverya.?? Nave-tho, Apwiya animwalamula atthu aya.

³¹Etthu yoowoopihe ohukhummwa ni Muluku a ekumi.

³²Numala nyuwo omwaleeliwa, muupuweleke mahiku avinre okathi nyuwo mwaavilel'anyu ikhotto, n'uhaawa vanci-ene.

³³Okathi mukina, nyuwo mwaaniruwaniwa ni mwaanihaaxiwa eriyari y'atthu. Nave-tho okathi mukina mwaanitakanihiwa n'ale yaahaaxiwa siiso.

³⁴Nyuwo mwaahiwoonela othunku alipa-ootthukweliwa ni mwaahitthuna okuxiwa mihakhu sanyu mutteeliwene murima. Okhala wira mwaanisuwela wira mookhalana mihakhu sootepaxa oreera ni sihinimala.

³⁵Tivo, muhihiye ororomelo w'anyu; ororomela iwo wookhalana otthuveliwa wuulupale.

³⁶Nvileleke wira mweettele otthuna wa Muluku, wira niphwanye yoororomelinh'aweni.

³⁷Tthiri okathi ohanle vakhaani, orweeke ole ontthuna orwa voohilekela.

³⁸Vano naxariya onookhala ekumi mwaha wo waamini, nto owo atthikela ottuli, khanrowa okitteeliha murima.

³⁹Siiso hiyo khanihiyo atthu antthikela ottuli khuyarimeela; n'atthu oowamini ni owoopoliwa.