Hebrews 9

¹Waataana woopacerya waahikhalana inamuna soomukokhorela Muluku ni waahikhala opuro waakokhoreliw'awe yoowo vathi-va.

²Yaahitekiwa eheema. Muhina mwa eheema, ohoowa waya waitthaniwa nipuro nooreera, weiwo waariwo mutthuko woomwaleela nipuro naixathiwa mikatthe sooveleelihiwa Muluku.

³Mpantte wa neenli ohoolo weiwo, ottuli w'ekuwo ya neenli naahikhala nipuro nikina naitthaniwa Nipuro Nooreeraxa.

⁴Nipuro nlo, yaahikhala altaari a eweero, vaapahiwa erupani; ni naahikhala-tho nivuku noowaataana, namariwe n'eweero ota ni muhina mwaya. Muhina mwa nivuku nlo waahikhala mwaapu waapakiwe n'eweero, mwaaheliwe-mo yoolya ni ekopo y'Aroni, yeeyo yaaphuwa, ni mwaaheliwe mapawe oowaataana.

⁵Vano vasulu va nimuku nlo, saahikhala ilatarato s'ankelo a nttittimiho, yaaitthaniwa kherupi, yaawo eruku aya yaakhuneela mukhuneelo wa nivuku, eyo piyo, opuro waaheliwa mukuttho w'olivela itampi. Naanaano va khahiyo okathi woolavula itthu iya sothene.

⁶Siiso numala olokiheriwa itthu sothene, anamukuttho annivolowa mahiku othene muheemani mwa Muluku nipuronoopacerya enavara miteko saya s'onamukuttho.

⁷Nto nipuro na nenli, namukuttho muulupalexa, yoowo paahi, taakela-mo ekwaha emosa paahi khula eyaakha, akunxe ephome y'enama, ananvahererya Muluku mwaha wa itampi sawe ni mwaha wa itampi s'atthu othene.

⁸Siiso, nipuro noopacerya na muhemani naaphavela wooniherya wira, Erooho Yooreera nlelo khiwaaphiyale okathi wo wooniheriwa ephiro y'opuro Wooreeraxa.

⁹Ela ethoonyeryo ya mahiku ala a vano, yooniheryaka wira soovaha ni mikuttho saaheliwa khalayi, khisaawerya oreeriha voomalela mirima s'atthu yaakokhorela.

¹⁰Sothene iya saari itthu saapakeliwa mwaha wa soolya ni soowurya ni inamuma sinci-ene sa mikutthu sooreerihiwa. Nave itthu iya sa erutthu, sinneetteliwa mpakha okathi Muluku onrowaawe okumiherya makhalelo masya.

¹¹Nto Kristuv arwiy'awe ntoko namukuttho muulupalexa a itthu sooreera seiyo siiriwa vathi-va, attharihelaka eheema yuulupale ni yootepaxa oreera; eyo khahiyo eheema epakiwe n'atthu.

¹²Kahiyo muhina w'ephome ya ipuri ni ya mwaanyompe nto owo aalenve ephome awe, khuvolowa nipuro nooreeraxa ekwaha emosa pahi mwa sothene, khuphwanya woopola ohinimala.

¹³Moone wira ephome ya ipuri ni mwaanyompe ni ettuurwa ya mwaanyompe oopahiwa, yaanitatheliwa atthu yaarina mwiko, yanaareeriha atthu awo mweerutthuni,

¹⁴nto vano ephome ya Kristu khitempe owerya! Mwa Erooho ehinimala, owo ohiivahererya mmansy'awe okhala mukuttho onvahiwa Muluku. Ephome awe enoreeriha muupuwelo ahu ni miteko soonanara, wira hiyo nimurumeeleke Muluku a ekumi.

¹⁵Tivo Kristu tokhanle mulapeli a waataana wa naanaano wira muhina woxintta wawe okhwa anlevelele itampi sa waataana wa khalayi wira mwaakhele nroromeliho nihimmala ahiyeriwe atthu aniwiitthanelawe waamini.

¹⁶Tthiri vari mwaataano, vannireerela wooniheriwa okhwa wa mwaneene opanke mwaataan'owo.

¹⁷Nave mwaataano olempwe onooneliwa okhala etthu mwaneene olempe mwaataan'owo akhwiiye; okhala wira owo khukhanle owooneliwa vatthu mwaneene olempe nlelo ari mukumi.

¹⁸Tivo, hata mwaataano woopacerya khiwaalipa ehimwarexiwe ephome.

¹⁹Yoopacerya, Monse aahaalaleerya atthu othene miixuttiho sothene sa ikano. Numala aahikuxa ephome ya axaana a inyompe ni a ipuri khutakanxerya ni maasi, nto aahitathela eliivuru ya ikano, n'atthu othene, aatathelaka n'ekopo yaatthukelenlyawe n'ekuwo yooxeerya, ahimyaka wira:

²⁰?Ela ephome yoowataana Muluku oorumihenlyaweni.?

²¹Okathi yoowo Monse aahitathela-tho ephome eyo eheema yothene n'itthu sothene saarumeeliwa okathi waavekeliwa.

²²Tthiri sitthariheliwaka ikano, vannihimmwa wira, itthu sothene sinreerihiwa n'ephome. Nave vahimmwarexiwa ephome, khiwaavo oleveleliwa wa itampi.

²³Tivo, vakhala wira itthu iyo sinlikanyihiwa n'itthu s'ekeekhayi siri wirimu, nto saahaana sireerihiwaka oratta-ene; nave itthu iyo sa wiirimu sahaana oreerihiwa ni mikuttho sootepaxa oreera.

²⁴Tthiri Kristu khakenle nipuro nooreeraxa nipakiwe n'atthu; nipuro nlo naari nlikanyiho paahi na nipuro n'ekeekhayi. Yesu okenle wirimu, weiwo oryaawe nanano va, ohoolo wa Muluku mwaha wa hiyo.

²⁵Nave-tho khahiyo wira owo omphavela wiivahererya mmansawe imaara sinci-ene, ntoko mukhulupale a anamukuttho onivolow'awe n'ephome ehinreerela opuro Wooreeraxa iyaakha sothene.

²⁶Vaakhanle siiso, Kristu aahaana ohaawa imaara sinci-ene okhuma opattuxiwaya olumwenku mpakha va. Nto vano, owo orwiye emaara emosa paahi, mahiku ala ookiserya. Nave orwenle wira attipihe etampi, aikhalihaka mukuttho mwaneene yoowo.

²⁷Siiso ntoko mutthu onweherery'awe okhwa emaara emosa paahi: Numala, alamuliweke ni Muluku,

²⁸Nave-tho, Kristu oopakiwa mukuttho emaara emosa paahi, wira attipihe itampi s'atthu anci-ene. Nto onimoorwa-tho emaara ya neenli, ahirweelaka ottipiha etampi, nto arweelaka owoopola ale aninwehererya.