Hebrews 8

¹Wa itthu iya sinihimy'ahu, yootepexa wunnuwa t'ila: Wira hiyo nookhalana namukuttho muulupale, yoowo okilaathale moono woolopwana w'ehije ya Muluku oowerya sothene wirimu.

²Ni yoowo onvara muteko mpaani mwa Muluku, eheema y'ekeekhayi yeeyo Apwiya epanky'aya, ehipakiwe ni mutthu.

³Khula namukuttho muulupale onthanliwa wira avaheke soovaha ni avaheke mikuttho. Tivo vanreerelaya wira nave owo akhalaneke etthu y'ovaha.

⁴Vano, owo aari a elapo ya vathi-va, khaakhala namukuttho; okhala wira akhala anamukuttho anivaha soovaha sihimmwe n'ikano.

⁵Awo animurumeela mpaani mwa Muluku, ntoko ethoonyeryo ni elatarato ya itthu siri wirimu, okhala wira Monse aahileeliwa okathi waaphavel'awe oteka eheema wira: Nwehe oratta-ene, mpake sothene ntoko ethoonyeryo kiwoonihenryakani va mwaako.

⁶Vano, nto, muteko w'onamukuttho ovahiw'awe Yesu, ti muulupale ovikana onamukuttho aya, siiso siry'awe mulapeli muulupale a waataana weiwo onrwa mwa soororomelihiwa suulupale.

⁷Tthiri, wakhanle wira waataana woopacerya waari woomalela, khiwaareerela-tho oranttelihiwa ni waataana wa naanaano.

⁸Nto, Muluku aavanyihaka atthu awe aahihimya wira: Anoophiya mahiku, anihimya t'Apwiya, kinrow'aka opaka waataana musya n'atthu a nloko na Isarayeli ni a nloko n'aYuta.

⁹Mwaataano owo khunrowa olikanaka ntoko mwaataano waapanky'aka n'axitith'aya nihiku n'akuxaly'aka nuwerya waka khaakumihaka w'Exitu; okhala wira awo yaari atthu yaahaamini waataanaa waka, nto miyo kihaahiya, anihimya t'Apwiya.

¹⁰Vano, waataana onrowaka opaka ni nloko na Isaraveli mahiku anrwa ti nno: Kinoohela ikano saka mmuupuweloni mwaya ni kinoolepa masu aka mmirimani mwaya. Miyo kinookhala Muluku aya, nave awo anookhala atthu aka,

¹¹Khaavo onrowa omwiixuttiha mukhw'awe, nnakala omuhimeerya mukw'awe wira: Mwaasuweleke Apwiya, okhala wira atthu othene anookisuwela, okhuma anamwane mpakha atthu aalupale.

¹²Maana miyo kinimwaalevelela itampi saya nave nkinrowa-tho wuupuwela itampi saya.

¹³Naahimyaka waataana wa naanaano, waataana wa khalayi woovira ni itthu sothene sookhalihiwa sa khalayi, nave etthu ekhalihiwe ya khalayi ehaanle omala.