Hebrews 7

¹Melikisetekhi owo, aari mwene a oSalemi, namukuttho a Muluku a wirimu-rimu, yoowo aaronwe okumana ni Aparahaamu, okathi aahokolow'awe okhottoni nuumala waaxintta mamwene, ni khumureeriha Aparahaamu,

²Vano Aparahaamu aahinvaha ya namuloko ya itthu sothene Melikhiseteki. Nsina na Melikhiseteki nnihimya wira ?Mwene a exariya?, mwene a osalemi nnihimya wira ?Mwene a Murettele.?

³Owo khaarina tiithi awe hata mam'awe nnakhala nloko nawe; nave khiyaasuweliwe mahiku ayariw'awe wala makhwelo awe. Owo aalikana ni Mwaana a Muluku, namukuttho a mahiku othene.

⁴Nto moone, ekhulupale awe Melikisetekhi, Aparahaamu yoowo ori mukhulupale ahu, aahinvaha ya namuloko ya itthu sothene saawakhaly'awe awanani awe okhottoni.

⁵Vano ikano sa Monse sinniruma wira eriyari y'ana a Levi yaawo anikela muteko w'enamukuttho annirummwa waakhelela soovaha sa namuloko s'atthu, hata s'axinn'aya vanamwi awo ari-ene osuulu w'Aparahaamu.

⁶Vano ole ahaari osuulu wa Levi, ahaakhela sa namuloko s'Aparahaamu ni khumureeriha ole aaroromelihiwe.

⁷Nave v'ekheekhayi, khivanaanyiheriwa wira ole ori mukhaani t'onreerihiwa n'ule ori muulupale.

⁸Nto va, anaakhela ya namuloko, t'ale anrowa okhwa. Vano ohoolo onrowa waakhela t'ule onihimmwa wira ookhala.

⁹Vannihimmwa wira hata Levi yoowo aakhela ya namuluku, aanivaha yanamuloko awe anvahereryaka Aparahaamu.

¹⁰Maana okathi Melekisisetekhi vaakumanaly'awe n'Aparahaamu, Levi iira ahiyariwe ni tiithi awe.

¹¹Vano vaakhanle wira oreerihiwa woomalela waatthariheliwa onamukuttho wa nloko na Levi, (yoowo waatthariheliwa mwaha woottharela ikano sa Monse saavahiwa atthu) nto aaphaveleliwani-tho orwa namukuttho mukina ntoko onamukuttho wa Melekisetekhi, ohikhalaka ntoko saarumme awe Aroni?

¹²Tthiri arantteliwa namukuttho, khuheliwa mukina, nave-tho ohaana orukunxiwa ikano.

¹³Nto ole onihimmwa mwaha wa itthu iya aari a nloko nikina, mwa yoowo nenlo khaavo mutthu aatonko orumeela ohoolo w'altaari.

¹⁴Vano vannisuweliwa oratta-ene wira Pwiy'ahu aari a nloko n'aYuuta, nave mwa nloko nla, Monse khaatonko wathanla anamukuttho.

¹⁵Eyo p'iyo nlelo vannitepa osuweliwa mwaha w'ule onlikana ni Melikisetekhi, onimoorwa namukuttho mukina,

¹⁶yoowo othanliwe voohittharihela ntoko sinrum'aya ikano s'erutthu, nto vatthariheliwaka owerya w'ekumi ehinipweteya.

¹⁷Maana iyo sinnihimya wira: ?Nyuwo mwa namukuttho a mahiku othene, ntoko sihimmy'awe Melikisetekhi.?

¹⁸Tivo, miixuttiho sa khalayi soomalihiwa, okhala wira iyo saari soohiroromeleya nave khisaixuttiha etthu.

¹⁹Tthiri ikano sa Monse khiivo ekhoomalinh'aya, vano nooruuhiwa nroromelo nuulupale, nenlo hiyo nnimwattamel'ahu Muluku.

²⁰Nave mutthu khaakhala namukuttho ohipacerye olapha, vanamwi akina yaakhala onamukuttho ehilaphenle etthu,

²¹Nto owo ookhala namukuttho voolapheliwa, okathi Muluku aamuhimenry'awe wira: ?Apwiya aalapha ni khanrukunuxa murima: Nyuwo mwa namukuttho a mahiku othene.?

²²Tivo Yesu okhanly'awe mwaattaano muulupale woororomeleya.

²³Nto khalayi yaahikhala anamukuttho anci-ene, okhala wira okhwa khiwaahiya avaraka muteko aya mahiku manci-ene.

²⁴Nto okhala wira Yesu onnikhala mahiku othene, owo namukuttho ororomeleya ohimmala.

²⁵Tivo, owo vanwery'awe owoopola voomalela ale animwaattamela Muluku mwa yoowo, owo onookhala mahiku othene aavekelelaka yaawo.

²⁶Siso, Yesu ti namukuttho muulupale, yoowo ori ooreera murima, oohittheka, ohirina yoonanara, oovalaanyiwa n'anatampi, ni oottittimihiwa ovikana wirimu-rimu.

²⁷Nto owo khanlikana ni makhulupale a anamukuttho akina. Owo khaniphavela ohela mukuttho nihiku ti nihiku mwaha wa itampi sawe hata mwaha wa itampi s'atthu. Owo ohenle mukuttho ekwaha emosa paahi, okathi waivaherenry'awe mmansawe ntoko mukuttho.

²⁸Maana ikano sinnaakhaliha anamukuttho aalupale atthu otteettheya, vano noolumo Muluku naalaphenly'awe khalayi ohoolo wa ikano, noomukhaliha Mwaana a Muluku namukuttho oophwanelela.