Hebrews 6

¹Tivo-nto, nihiye miixuttiho soopacerya sa mwaha wa Kristu, vano nitthareke makhalelo ooreera, nihihokolowelaka-tho vasya othipela mapotto oorukunuxa murima wa miteko sinruuha okhwa ni miixuttiho soomwaamini Muluku,

²ni mwixuttiho w'opatiso ni wiixatherya matata atthu, ni ohihimuwa w'alipa-ookhwa n'ulamuliwa ohimala.

³Siiso hiyo nnomwiira, Muluku atthuna.

⁴Ttthiri, eyo khinweryaneya w'ale yaamwaleeliwe nkwaha mmosa, yaalawinhe yoovaha ya wirimu, nave khukhala atthu yiira mpantte wa Erooho Yooreera.

⁵Ni-tho yaalawihale masu a Muluku ni owerya wa olumwenku onrwa.

⁶Nave awo yaahiya waamini, khivanweryaneya wahokoloxerya-tho orukunuxa murima, okhala wira mwaha woopweteya waya, annimukhomela-tho Mwaana a Muluku, amuulihihaka muru ohoolo w'atthu.

⁷Tthiri etthaya enrupeliwa epula imaara sinci-ene, enaavaha mihokorokho ale anlima, ennirerihiwa ni Muluku.

⁸Nto etthaya eyo yaavaha miiwa ni malaxi oonanara, khirina-tho muteko, otakhalihiwa waya woophiya, nave emalelo aya opahiwa.

⁹Vano-nto nyuwo amus'ihu oophentiwa, nnamwi nlavulaka siisa, ninnaamini wira nyuwo munnetta ephiro yooreera, yeeyo emphwanyiha woopowa.

¹⁰Muluku naxariya okathi wothene. Owo onimuupuwela enamuna yaakhalihenryanyu atthu awe khalayi ni-tho enamuna ennaakhaliharyanyu atthu nlelo. Nyuwo mw'atthu a Muluku, nave owo khanliyala ophenta wanyu oniwiirel'anyu atthu.

¹¹Nto, hiyo, nimphavela wira khula mmosa a nyuwo ooniheryeke olipiherya w'awe mpakha mahiko ookiserya, wira mukhalane nroromelo noomalela n'ekheekhayi,

¹²wira muhikhale atthu oonyoonyiwa, nto mukhale atthu anaatakiha ale anaakhela yoohiyeryiwa yaaroromelihiwe ni mwaha w'oowaamini n'ovilela waya.

¹³Okathi Muluku ammanenly'awe natiri Aparahaamu, okhala wira khaavo mutthu muulupalexa onvikana yoowo, wira amulaphele nto owo aahiilaphela mmansawe,

¹⁴Ahimyaka wira: ?V'ekeekhayi, miyo kinimooreerihani ni kinimoovahani osuulu wo waatta.?

¹⁵Nto siiso, Aparahaamu numala olipelela avilelaka, owo aahivahiwa yaaroromelihiw'awe.

¹⁶Atthu yaalaphaka, anniromola nsina nuulupale ninvikana nsina naya, vano olapha iwo onnilipiherya etthu ehimmwe, nave onnimaliha onyakulihana wothene.

¹⁷Muluku aphavelaka wooniherya oratta-ene mukhalelo awe ohinvirikana w'etthu emphavel'awe waavaha ale oohiyeriwa muroromeliho, owo aahilipiherya amulaphaka natiri,

¹⁸wira ni mwaha wa itthu piili sihinvirikanyeya, mwa seiyo Muluku ohinooth'awe, nikhale oolipihiwa murima oratta-ene, hiyo nincawela mwa yoowo wira naakhele nroromelo nivahiwahu.

¹⁹Hiyo nookhalana nroromelo nlo mmurimani mwahu ntoko nankura a ekalawa, oolipa ni oororomeleya. Nenlo ninvolowa mpaani mwa empa ya Muluku nnakhala memmo.

²⁰Memmo Yesu okenl'awe-mo mwaha wa hiyo, nihinatthi okela-mo, khukhala namukuttho muulupale a mahiku othene, ntoko onamukuttho wa Melkisetekhi.