Hebrews 5

¹Tthiri khula namukuttho muulupale onnithanliwa eriyari y'atthu ni onnivahiva muteko wira aakhaliheryeke atthu mmitekoni sa Muluku, ni wira avaheke soovaha ni mikuttho soottipiha itampi.

²Owo onniwerya wakhupanyerya ale ahinsuwela eniir'aya ni anihiya mweettelo wooreera, okhala wira owo onnisuwela otteettheya wa mutthu.

³Ti vaavo varinawe ohela mukuttho mwaha wa itampi sawe mwaneene, ntoko vanihelawe mwaha wa itampi s'atthu.

⁴Nto, khaavo, oniithanlela mmans'awe nttittimiho nlo ohiitthaniwe ni Muluku, ntoko Arooni.

⁵Siiso-tho Kristu khaittittiminhe mmansawe wira akhale namukuttho muulupale. Muluku t'omuttittimihale, ahimyaka wira: ?Nyuwo mwa Mwan'aka; miyo kooyanreni olelo.?

⁶Siiso-tho sinihimmwaya nipuro nikina wira: Nyuwo mwa namukuttho a mahiku othene, ntoko onamukuttho wa Melikiseteekhi

⁷Yesu owo, mahiku aakhal'awe vathi-va, aahivekela avaraka metto ni akhuwela vanci-ene anvekelaka Ole aakhanle omwakiherya okhwa, nto owo aahaakhuliwa okhala wira aari mutthu aamwiiwelela Muluku.

⁸Aarookhalaru Mwaana a Muluku ahiixutta wiiwelela mwa itthu sothene sahaawenlyl'awe;

⁹nto, numala oreerihiwa voomalela, Owo aahikhala mulipa onaaphwanyiha woopowa ohinimala atthu othene animwiiwelela,

¹⁰nave khuthanliwa ni Muluku namukuttho muulupale, ntoko onamukuttho wa Melikisetekhi.

¹¹Wa mwaha yoola, hiyo nookhalana itthu sinci-ene so woohimeeryani ni soovila wootaphulelani, okhala wira nyuwo munnipisa wiiwa.

¹²Tthiri, okathi ola nyuwo mwahana okhala awiixuttihi, nto nlelo nyuwo vannireerela wiixuttihiwa-tho ikano soopacerya sa masu a Muluku. Nave nlelo munreerela wamwa nipele ohikhanle olya yoolya yoolipa.

¹³Ole onaamwa nipele, khansuwela etthu ya moolumo a exariya, okhala wira nlelo owo mwaana.

¹⁴Nto yoolya yoolipa ti y'atthu aalupale, yaawo alamalenle ni ansuwela othanlela etthu yooreera ni yootakhala.