Hebrews 4

¹Tivo, okhala wira noororomelihiwa ovolowa m'omumulani mwa yoowo, nto ahikhale hata mutthu mmosa a nyuwo onrowa ohiphwanela omumula iwo.

²Tthiri ni hiyo-tho noolaleeriwa Ehapari Yooreera ntoko awo yaalaleeriw'aya; Nto masu atthu awo yaiwal'aya khiyaattottenle etthu, okhala wira ale yaiwale khiyaatakaninhe ni wamini.

³Nto, hiyo nnaamini, ninrowa ovolowa nipuro nlo noomumula, ntoko Muluku ohimyaly'awe wira: ?Miyo koolapha kinanariweene wira: Awo khanikhala-khala erwaaka omumula wa miyo vanamwi miteko saya saamalelihiwe okhuma opattuxiw'aya olumwenku.?

⁴Tthiri vookhala valempwe-vo, vahimmwaka mwaha wa nihiku na nethanu-nanli wira: ?Nihiku na neethanu nanli Muluku aahimumula nuumala ovara miteko sothene.

⁵Nave vaavo-tho voohimmwa-vo wira: Awo khanivolowa moomumulani mwaka.?

⁶Tivo, vannihimmwa wira akina anoovolowa mapuro awo oomumula, nto akina khanivolowa mwaha woohiiwelela ehapari yooreera yaalaleiriwaya;

⁷siiso Muluku aahithanla nihiku emaara emosa paahi, khwiitthana nlo ?Olelo?, okhathi wa mahiku a khalayi owo aalavunly'awe muhina mwa moolumo a Taviti, ntoko saahimmw'aya wira: ?Olelo, mwaiwa nsu nawe, muhumihe murim'anyu.?

⁸Vaari wira Yoxuwa aahaavaha awo omumula iwo, Muluku khaarowa ohimya-tho nihiku nikina.

⁹Siiso, nlelo ninnihala nihiku na esaapatu atthu a Muluku anrow'aya omumulaka;

¹⁰nto othene ale anivolowa m'omumulani mwa Muluku, nave-tho annimumula miteko saavar'aya, ntoko Muluku omumunl'awe miteko saavar'awe.

¹¹Tivo, niilipiheke, wira nivolowe moomumulani mmo, wira ohikhale onrowa omora, ntoko nthoonyeryo nle noohiiwelela.

¹²Tthiri Masu a Muluku ekumi, t'owerya ni t'otepaxa wiitha onvikana xoowa a khula enamuna oniitha ninno-ninno. Masu awo annivolowa mpakha okawanya ekumi ni erooho, ni mapuro anikhomanyiwa makhuva mpakha muhina mwa makhuva awo, nave annilamula miupuwelo n'iye murima sinuupuwel'aya.

¹³Khivo etthu epattuxiwe envitheya vamaithoni va Muluku. Itthu sothene ti soowooneya va maithoni vawe ole onrowahu omuhimeerya miteko saavar'ahu.

¹⁴Tivo, okhala wira nookhalana Namukuttho Muulupalexa ovolonwe wirimu, Yesu Mwaana a Muluku, nto nlipiherye wamini weiwo onlaley'ahu.

¹⁵Siiso hiyo khanikhalanne namukuttho muulupale ohinwerya onimorela ikharari, mwaha wootteettheya wahu. Nto, nookhalana ole eehereryiwe ni wa khula enamuna ntoko hiyo, khuhikhalana etampi.

¹⁶Vano, naattameleke ehice ya mahala n'ororomela wothene, wira nimoreliwe ikharari nave ni wira niphwanye mahala anrowa onikhaliherya okathi woophwanelela.