Hebrews 3

¹Tivo axinn'aka ooreera murima muniira mpantte w'atthu owiitthaniwa ni Muluku, mmuupuweleke Yesu, yoowo ori Murummwa ni Namukuttho Muulupale onimwamin'ahu.

²Owo aanimuroromela ole omuthanlale, ntoko Monse sakhanl'awe oororomeleya vatthokoni va Muluku.

³Yesu onnittittimihiwa vanci-ene onvikana Monse, ntoko ole onteka empa vanttittimihiw'awe ovikana emp'eyo entek'awe.

⁴V'ekeekhayi khul'empa entekiwa ni mutthu: Vano Muluku t'upanke itthu sothene.

⁵Monse aari epottha yoororomeleya, w'atthu othene a Muluku, akhalelaka onamoona iye saathuna ohimmwa ohoolo.

⁶Vano Kristu, t'ororomeleya, okhala wira owo Mwaana a vatthokoni va Muluku. Nto, etthoko eyo ti hiyo, vakhala wira hiyo nnoolipiherya ororomela, ni olipelela weiwo oniittottopan'ahu.

⁷Ntoko siiso Erooho Yooreera sinihimy'aya wira: Olelo nyuwo mwaiwa nsu n'awe,

⁸muhuumihe murima anyu ntoko sihiiwelenly'anyu okathi woottehattehiwa w'othakoni,

⁹weiwo axitiith'anyu akhalayi yaakittehattenh'aya, ekeereryaka, enamwi yaawenhe miteko s'aka va iyaakha miloko mixexe.

¹⁰Tivo vaviruwenlyaka nloko nlo, khuhimya wira: Atthu ale annithweleliha murim'aya mahiku othene: Nave nnikhotta otthara iphiro saka.

¹¹Nto miyo kaahilaphela kinanariwene khuhimya wira: Awo khankhala-khala erwaka omumula wa miyo.

¹²Mwiipasoope, axinnaka, wira ahikhale hata mutthu mmosa a nyuwo onrowa okhalana murima woonanara ni woohaamini, onrowa omuhiya Muluku mukumi.

¹³Nto ohiya vo, mulipihaneke mukina ni mukhw'awe, mahiku othene, variyari va okathi oniitthaniwa ?olelo? wira ohikhale hata mutthu mmosa a nyuwo onrowa olipihiwa murima ootothiwaka n'etampi;

¹⁴tthiri nnookhala vamosa ni Kristu, vakhala wira v'ekeekhayi hiyo nnookhalana ororomela weiwo warin'ahu okhuma woopaceryani, nlipiheryaka mpakha wookiseryani.

¹⁵Tivo vanihimmw'aya wira: Olele, mwaiwa nsu n'awe muhilipihe murima anyu, ntoko siiranene-aya nihiku noweehereryiwa.

¹⁶T'ani ale yaiwale nsu na Muluku, khumukhootta yoowo? Khahiyo othene ale Monse yakumihalyawe w'Exitu?

¹⁷T'ani Muluku aananariw'awe ni yaawo mpakha iyaakha miloko mixexe? Khahiyo atthu yaale yiirale itampi, khukhwa mothakoni?

¹⁸Nave-tho taani Muluku aalaphenlyawe wira awo khanrowa omumula mwa yoowo? Khahiyo yaale yahaamwiiwelela?

¹⁹Tthiri ninnoona wira awo khiyaawenrye ovolowa m'omumulani mwawe mwaha woohaamini waya.