Hebrews 2

¹Tivo, nihaana wiiwelela oratta-ene, ekeekhayi yiiwal'ahu, wira nihihiyeke.

²Vakhala wira ehapari elaleiwe n'ankelo yoolipiheryiwa, nave itampi sothene wala ohiiwelela sihaakhela ehukhumu eniphwanel'aya,

³nto hiyo ninrowa otthyawa sayi, nanyoonyeryiwaka woopowa iwo wuulupale? Woopowa weiwo opaceriwe olaleiwa n'Apwiya, numala hiyo khulaleeriwa n'ale yiiwale.

⁴Nave Muluku onnikhalela onamoona itthu iya muhina mwa itthoonyeryo, mitikiniho, ni miiriirya sa inamuna sinci-ene, ni soovaha sa Erooho Yooreera, ntoko sintthun'awe.

⁵Nto Muluku khaavahale ankelo owerya wo weettiha olumwenku onrwa, yoowo onlavul'ahu,

⁶wookhala opuro owo mutthu mmosa wakhanlely'awe onamoona ahimyaka wira: Mutthu ti pani, okhanl'anyu oomuupuwelaka? Nave mwaana a mutthu ti pani, oomphwanela okhapeleliwa ni nyuwo?

⁷Nyuwo moomuupa mutthu, onihala vakhaani olikana n'ankelo ni moonvaha nttittimiho ni nlemeliho.

⁸Monvaha owerya wo weettiha itthu sothene. Muluku vanvahaly'awe mutthu itthu sothene, khiivo etthu yaahiyaly'awe wira ehimwiiweleleke. Nto v'ekeekhayi mpakha va, hiyo khannoone itthu sothene simuruumelaka yoowo.

⁹Siiso, ninnimoona ole aakhalihiwe mukhaani eriyari y'ankelo okathi vakhaani. Yesu yoowo ovahiwe nttittimiho ni nlemeliho mwaha woohaawa mookhwani, wira mwa mahala a Muluku, owo avire mukhwani, aakhwelaka atthu othene.

¹⁰Vano aaruuhaka atthu anci-ene munttittimihoni, vaanireerela wira Muluku, yoowo ni mwa yoowo itthu sothene sinikhalel'aya, areerihiwe voomalela, mwaha woohaawa w'awe, muhooleli a woopowa waya.

¹¹Siiso hata ole onaareeriha atthu nnakhala ale anreerihiwa anrwa wa mutthu mmosaru. Tivo, Yesu vahinuuleliw'awe muru owiirela atthu ?axinnaka?,

¹²ahimyaka wira: Miyo kinoolaleya nsina nanyu, eriyari y'asinn'aka; kinoowiipelani isipo, mmutthukumanoni mw'atthu.

¹³Nave-tho, mwa yoowo, miyo kinoomuroromela. Oohimya-tho wira: Miyo kiri va n'ana Muluku okivahaly'awe.

¹⁴Tivo, okhala wira aana awo, atthu arina erutthu n'ephome, siiso-tho owo aahikhalana makhalelo a atthu yaawo arina erutthu n'ephome wira ni mwaha w'okhwa w'awe amuxintte ole orina owerya w'owiiva, eyo p'iyo, Xetwani, mukhulupale a minepa sootakhala,

¹⁵ni wira awoopole ale okumi aya wothene wari mw'epotthani mwaha wo woova okhwa.

¹⁶Tthiri, owo khahiyo onaakhaliherya ankelo, nto onaakhaliherya atthu a nloko n'Aparahaamu.

¹⁷Siiso, owo aahaana ailikanyihaka n'axinn'awe, mwa makhalelo othene, wira akhale namukuttho oomoriwa ikharari ni oororomelaya mwa itthu sa Muluku wira aliverye itampi s'atthu.

¹⁸Okhala wira owo oohaawa okathi weehereryiw'awe, siiso-tho onoowerya wakhaliherya ale aneehereryiwa.