Hebrews 1

¹Khalayi, Muluku aahaalavuliha axitiith'ahu imaara sinci-ene n'inamuna sinci-ene ni moolumo a maprofeta.

²Vano, mahiku ala ookiserya, owo onnilavuliha ni nsu na Mwan'awe, yoowo omuhiyenry'awe itthu sothene, nave-tho mwa yoowo opattuxanny'awe olumwenku.

³Mwaana yoowo t'ori omwaleela wa nttitimiho ni elatarato yoomalela ya Makhalelo a Muluku. Owo t'onlipiha itthu sothene n'owerya wa moolumo awe. Numala waareeriha atthu itampi s'aya, owo ookilaathi moono woolopwana wa Muluku oowerya sothene wirimu-rimu,

⁴Yoowo wunnuwa wawe woovikana vanci-ene ni wunnuwa wa Ankelo, siiso ntoko nsina nivahiwawe nivikannyaya masina aya.

⁵Nto munkelo xeeni Muluku otonkw'awe omuhimeerya wira: ?Nyuwo mwa Mwan'aka, miyo kooyanreni olelo?? Nave-tho wira: ?Miyo kinrowa okhala Tiith'awe, nave owo onrowa okhala mwan'aka??

⁶Nave-tho, amuruuhaka mwan'awe ompacerya m'olumwenkuni mu, aahihimya wira: ?Ankelo othene a Muluku emukokhoreleke yoowo.?

⁷Siiso-tho, wa mwaha w'ankelo awe, Muluku onnihimya wira: Owo onnapaka ankelo awe epheyo, ni arumeyi awe onnaapaka malumi a mooro;

⁸Nto wa mwaha wa Mwan'awe, oohimya wira: Ehice anyu, nyuwo Muluku, ti ya mahiku othene voohimala; Nave exariya enookhala ekopo y'omwene anyu.

⁹Nyuwo munniphenta exariya ni munninyokha etampi; tivo, Muluku, Muluku anyu, ohoothanlani eriyari y'akhw'inyu nto khoottikitthelani makhura ootteeliha murima.

¹⁰Nave owo oohimya-tho wira: Pwiya, ti nyuwo mpattunxe elapo woopaceryani, ni-tho erimu mpankiwe ni matat'anyu.

¹¹Itthu iyo sinoomala, nto nyuwo, munookhala, iyo sinimuusaala ntoko ikowo;

¹²nyuwo munookhunanya ntoko nlaya, iyo sinimwakakhanyiwa ntoko ikowo. Vano nyuwo munookhala siiso siryanyu; nave mahiku anyu khanimala.

¹³Nto munkelo xeeni Muluku otonkw'awe omuhimeerya wira: Mukilaathi moono aka woolopwana, mpakha miyo kaakhalihe awanan'inyu malaxi oottikithela inawu s'anyu.

¹⁴Nto ankelo t'ani? Ankelo irooho sirummwe wira saarumeeleke ale anrowa wakhela woopowa.