Philemon 1

¹Miyo Paulo, ootthukweliwa mwa Kristu Yesu, ni munna Timotiyo, ninnoolepelani nyuwo Filimoni, mpatthani oophentiwa onivaran'ahu muteko,

²kinnimulepela-tho murokor'ihu Apia, n'Arikipo mpatthan'ihu amukhottoni. Nave-tho kinnilepela ekerexa entthukumana owannyu,

³Oreeriwa ni murettele wa Muluku Tiithi n'Apwiya Yesu Kristu okhale ni nyuwo.

⁴Kinnimuxukhuru Muluku aka, kiwuupuwelakani nyuwo okathi wothene onvekelaka,

⁵okhala wira kinniiwa ohimmwaka omwaamini w'anyu Pwiya Yesu, ni waaphenta wanyu atthu othene oreera murima.

⁶Kinnivekela wira mukhale oowaakuva okhaliherya ni waamini wanyu, wira nyuwo mukhale oosuwela oratta-ene itthu simmphwanyaanyu mwa Kristu.

⁷Nyuwo Filimoni, munn'aka, ophenta wanyu onnikitteeliha murima, nave onnikilipiha vanci-ene, okhala wira nyuwo munnaahakalaliha atthu ooreera murima.

⁸Tivo nto hata miyo kikhalanaka owerya mwa Kristu wo woorumani opaka etthu enreerela wira,

⁹nto kintthuna woovekelani mwaha w'ophenta. Kinooovekelani ti miyo, Paulo kuuluvanle, nave-tho vano kitthukweliwe mwaha wa Kristu Yesu.

¹⁰Kihoovarelani metto mwaha wa mwan'aka Oneesimo, yoowo ommphwanny'aka kinari mukhattheia.

¹¹Owo khalayi, nyuwo khimwaamoonela vatthu: Nto vano owo onniniirela hiyo othene ahu sooreera.

¹²Kinoorumihelani nyuwo, yoowo ori ntoko murim'aka ene onrwa wa nyuwo.

¹³Miyo kaatthuna wira akhaleke ni miyo wira akirumeeleke vanipuroni vanyu, okathi ola oriy'aka otthukweliw'aka mukhatteya mwaha w'Ehapari Yooreera.

¹⁴Nto nkitthunne wira etthu, nyuwo muhikemihenrye, wira oreera w'anyu murima ohikhale wookhanyereriwa: Okhale w'otthuna w'anyu.

¹⁵Atthunaka, owo aahimwalana ni nyuwo mahiku vakhaani, wira mumphwanye-tho wa mahiku othene.

¹⁶Vano nto kahiyo-tho ntoko epottha, owo oovikana epottha; owo munn'ahu oophentiwa. Woona waka miyo owo munna oophentexiwa: Oophentiwa ni miyo nave ni nyuwo mwaha wookhala muKristu.

¹⁷Tivo, mwaakoonaka okhala munn'inyu muhina moowaamini, owo mmwaakhele ntoko munikaakhela miyo.

¹⁸Yakhala etthu yootthekenlyaaweni wala yookophenlyaaweni mukhalihe sothene sookopha saka.

¹⁹Miyo Paulo, kinlepa va ni ntata naka nla: Kinimoolivani. Nkimphavela owuupuxeryani wira ni nyuwo-tho mmansinyu mookikophela ekumi anyu

²⁰Ayo munn'aka, miyo kinniphavela waakhela etthu yooreerela enrwa wa nyuwo mwaha wookhala mw'Apwiya, wira muriirihe murim'aka mwa Kristu.

²¹Kiroromelaka wiiwelela wanyu, miyo kihoolepelani nyuwo, kisuwelaka wira nyuwo munimwiira itthu iya hata munoovikaniha iye sinoovekelaakani wira.

²²Nave-tho kinnoovekelani wira mukilokiherye nipuro noomaka okhala wira kinnaamini wira kinoohokoloxeriwa wa nyuwo mwaha wa mavekelo anyu.

²³Epafara otthukwelaniwaaka mwaha wa Kristu Yesu, onnoovahani makhomaso.

²⁴Siiso-tho Marku, ni Aristariko, ni Tema, ni Luka anvaranaaka muteko, annookhomasani.

²⁵Mahala a Apwiya Yesu Kristu akhale ni nyuwo.