Titus 3

¹Annitumereriwa othene wira yaarumeeleke makhulupale a mulaponi mwahu, ni amakhulupale akina arina owerya, ewiiweleleke nave ekhaleke oolikane-ene wira sooreera.

²Ehimwaapaka mutthu, ekhaleke oolevelela ni ooreera murima, mahiku othene ni makhalelo oowaattittimiha atthu othene.

³Maana ni hiyo-tho khalayi naari alolo, oohiwelela. Neetta iphiro soohiloka nave naari ipottha soosiveliwa n'itthu sothene soowunkhela ni osiveliwa w'ahu woonanara wa khula enamuna. Naari ni makhalelo ootakhala murima nakhalelaka nrima nave akina yaaninnyokha, ntoko hiyo nave naanyokh'ahu.

⁴Nto okathi Muluku, Moopoli ahu, voonihenry'awe oreera w'awe murima ni waaphenta w'awe atthu othene.

⁵Oonoopola voohikhala mwaha wa miteko sooreera sivaraly'ahu. Nto paahi mwaha woomoriwa w'awe ikharari. Oonirapiha ni maasi akhanle oyariwa wa nenli onnivah'awe ekumi esya enruuheliw'ahu ni Erooho Yooreera.

⁶Muluku t'onimwarexenle Erooho Yooreera voowaatta, mwa Yesu Kristu, Moopoli'ahu,

⁷wira nireerihiwe-ene ni mahal'awe, niphwanele okhala alipa oohiyeriwa, nroromelaka ekumi ehinimala.

⁸Masu ala t'ekeekhayi! Tivo, miyo kintthuna wira muthipeleleke wiixuttiha itthu iya, wira ale animwaamini Muluku esiveliweke opaka itthu sooreera. Ikano iya ti sooreera ni sootthuneya w'atthu othene.

⁹Nto mutthyaweke ovaanyihana ohintekeliwa etthu, muhicaleke waalikela masina a amuhakhalayi, onyakulihana n'uwanawana mwaha wa ikano s'aYuta. Itthu iyo khasimphwanyiha etthu ni ti s'ethiru.

¹⁰Akhala onikawanya muloko w'aKristu, mmulopole emaara emosa wala imaara piili nto aahiwiiweleleni, n'valaaneno.

¹¹Musuweleke wira mutthu-ene yoowo oopahuwa ni wira ihukhumu oniiphwanyiha mmans'awe.

¹²Okathi onrow'aka woorumihelani Artema wala Tikiko, muhilekele orwa okumana ni miyo oNikoopoli, tthiri kinthuna wira kavirihe weiwo eyiita.

¹³Mmukhaliherye wa sothene sinwery'anyu Sena mulipa oowakiha nave-tho ni Apolo, wira ewerye ophwanya simphavelel'aya ekwah'aya.

¹⁴Kiniira amusi ahu exutte owiirela sooreera ni waakhaliherya akina yathoiwa vale, wira makhalelo a ekumi aya yaasiveleke atthu.

¹⁵Othene ari ni miyo annookhomasani. Annaatumererya aaxinn'ihu anaaphent'ahu mu waaminini. Mahala a Muluku akhale ni nyuwo othene.