Titus 2

¹Vano, nyuwo nwiixuttiheke muttharihaka mwiixuttiho wooreera.

²Nwiixuttiheke anakhulu alopwana okhala atthu oomala, oottittimiheya, ooreera murima, amiruku mo waaminini, ni moophentani, ni munroromeloni.

³Siiso-tho muwiixuttiheke anakhulu athiyana okhala oophwanelela ni makhalelo aya, awo yihikhaleke oowaapa akhw'aya, ni yihikhaleke ipottha sa eviinyu; nto akhaleke atthu ansuwela wiixuttiha etthu yooreera.

⁴Wira awo nave awiixuttiheke axithiyana enamuna yoowaaphenta axiiy'aya n'an'aya.

⁵Ni wira ekhaleke oowiisuumaaliha ni ooreera murima voomalela, aneettiha oratta-ene etthoko aya, aniwiiwelela axiy'aya, wira masu a Muluku ehithanyiweke.

⁶Siiso-tho nwiixuttiheke amiravo wira ekhaleke atthu owiisumaaliha.

⁷Mwa sothene, nyuwo mmansinyu mukhaleke muthonyeryo aya muvaraka miteko sooreera. Mmwiixuttihoni mwanyu mooniheryeke olipiherya ni ororomeleya w'anyu.

⁸Moolumo anyu akhaleke axariya wira ahikhale onrowa wooromolani wi munnipaka yootakhala ni wira awanani yuuliwe muru, vahinrow'aya woona yoohimya enaapaka ni moolumo oonivaanyiha muhina mooniveeha.

⁹Mwaahimeeryeke ale akhalihiwe ipottha wira ewiiweleleke apwiy'aya nave yiireke sothene wira yaasiveliheke, n'uhaavaanyiha,

¹⁰n'uhaahononela. Ohiya-tho vo, mahiku othene n'wiireleke sooreera n'uroromeleya mwa sothene, wira atthu othene yooneke wira makhalelo aya annilikanela n'ihapari ya Muluku Moopoli ahu.

¹¹Okhala wira mahala a Muluku ahooniherya woopowa w'atthu othene.

¹²Mahala ala, anniixuttiha okhootta makhalelo ahu ootakhala n'uhiya itthu sinsivela vathi-va, wira mahiku othene neetteke ni wisuumaliha n'ixariya n'omuttittimiha Muluku.

¹³Nave onninxuttiha-tho okhalana mmaaleleyo nlipelelaka wira onoomaliheriwa natiri aamaneliw'aya, okhanle wiisoniherya wa nttittimiho na Muluku ahu muulupale ni Moopoli Yesu Kristu.

¹⁴Ti yoowo aaivaherenre wiiviwa wahiyo, wira anoopole mutampini mw'ahu nave anikhalihe nloko atthu ooreera murima, nikhale aw'awe; niphavelaxaka wira sooreera.

¹⁵Ti seiyo itthu sikhanly'anyu oowiixuttiha atthu, mwaatumereryaka nave mwaapwapwelaka ni owerya w'anyu wothene ahikhale onrow'anyu omutthuniherya woothanyani.